Read Caribbean Javanese Yésaya 61 Bible Online

Yésaya 61 - Caribbean Javanese bible

Yésaya 61

¹ Rohé Gusti Allah ana ing Aku, awit GUSTI wis njebati Aku; Aku diutus ngabarké kabar kabungahan marang para wong sing ngalami sangsara, lan ngrumati wong-wong sing pada remuk atiné, mbébaské para tawanan, lan nylametaké sangka paukuman marang wong sing pada diukum,

²ngabaraké taun kawelasané GUSTI lan dina tibané balesané Gusti Allah kita, nglipur kabèh wong sing ngalami susah,

³ngganjar marang wong-wong mau rerékan sirah kanggo gantiné awu, lenga pésta kanggo gantiné salin kasusahan, kidung pamuji kanggo gantiné kasukman sing nglokro, supaya wong-wong mau pada diarani “wit terbantin ing bab kabeneran”, “tandurané GUSTI” kanggo ngétokké kaluhurané.

⁴Wong-wong mau bakal pada mbangun gempuran sing wis maabad-abad anané, lan ngedekké menèh panggonan sing wis dadi sepi wiwit mbiyèn; bakal pada mbangun kuta-kuta sing wis dadi gempuran, panggonan sing wis turun-temurun sepi.

⁵Para wong mantya bakal pada ngréwangi kowé kabèh dadi pangoné wedus-wedusmu, lan wong-wong bangsa liyané bakal pada dadi para tani lan tukang kebon ing kebon anggurmu.

⁶Nanging kowé bakal pada diarani imamé GUSTI lan bakal disebut abdi Gusti Allah kita. Kowé bakal pada ngrasakaké énaké kasugihané para bangsa lan bakal pada rumangsa unggul awit sangka okèhé kasugihané wong-wong mau.

⁷Kanggo gantiné enggonmu pada kewirangan tikel kaping pindo, lan kanggo gantiné enggonmu dityatyat lan diidoni, kowé bakal pada nampa warisan tikel loro ing negaramu lan bakal ngrasakaké kabungahan sing langgeng.

⁸Awit Aku, GUSTI, seneng marang keadilan lan sengit marang tumindak ngrayah lan sing ala; Aku bakal ngekèki upahé marang kowé sing tyotyok, lan bakal nganakké perjanjian sing langgeng karo kowé kabèh.

⁹Turunanmu bakal kesuwur ing sak tengahé para bangsa, semono uga anak-putumu ing antarané para taleré bangsa, terus kabèh wong sing weruh bakal pada ngakoni, yèn kuwi turunan sing pada diberkahi karo GUSTI.

¹⁰Aku bungah ing njeruhné GUSTI, nyawaku surak-surak ing njeruhné Gusti Allahku, awit Aku nganggo klambiné keslametan lan dienggoni jubahé kabeneran, kaya pengantèn lanang sing nganggo rerékan sirah lan kaya pengantèn wadon sing nganggo patyakané.

¹¹Awit kaya bumi enggoné ngetokké tetukulan, lan kaya kebon sing nukulaké wiji sing disebar, ya mengkono kuwi enggoné Gusti Allah bakal ngetokké kabeneran lan pamuji ing ngarepé kabèh bangsa.