Read Caribbean Javanese Yésaya 62 Bible Online

Yésaya 62 - Caribbean Javanese bible

Yésaya 62

¹Awit sangka Sion aku ora bisa meneng, lan awit sangka Yérusalèm aku ora bakal lèrèn, nganti tekan kebenerané semlorot kaya semloroté padang lan keslametané murup kaya ontyor.

²Para bangsa terus bakal pada weruh kebeneranmu, lan kabèh ratu bakal pada weruh kamulyanmu, lan wong bakal ngarani kowé nganggo jeneng anyar sing bakal ditemtokké karo GUSTI piyambak.

³Kowé bakal dadi makutané kamulyan ing tangané GUSTI, lan makutané kraton ing tangané Gusti Allahmu.

⁴Kowé ora bakal dijenengké menèh “sing ditinggal karo bojo”, lan negaramu ora bakal disebut menèh “sing sepi”, nanging kowé bakal diarani “sing ndadèkké kesenengan-Ku” lan negaramu “sing nduwé bojo”, awit kowé wis ndadèkké kesenengané GUSTI, lan negaramu bakal nduwé bojo.

⁵Awit kaya jaka nduwé bojo prawan, mengkono uga Panjenengané sing mbangun kowé bakal dadi jodomu, lan kaya bungahé atiné pengantèn lanang weruh pengantèn wadon, mengkono uga Gusti Allahmu bakal seneng ing ati awit sangka kowé.

⁶Ing duwuré témbok-témbokmu, hé Yérusalèm, wis Tak pasangi wong jaga. Ing sedina-dina lan ing sewengi-wenginé, kuwi pada ora tau meneng. Hé kowé sing kudu ngélingké GUSTI marang Sion, kowé aja pada mung meneng waé

⁷lan aja kok jarké waé Panjenengané meneng, nganti Yérusalèm dikuwatké karo Panjenengané lan didadèkké kesuwur ing bumi.

⁸GUSTI wis sumpah kanggo tangan-Né sing tengen, kanggo tangan-Né sing kuwat: “Aku ora bakal ngekèkké gandumu menèh marang mungsuhmu kanggo pangané, lan wong-wong bangsa liyané ora bakal ngombé anggurmu sing wis kok masak karo rekasa;

⁹nanging wong sing panèn uga bakal mangan lan bakal memuji marang GUSTI, lan wong sing nglumpukké uga bakal ngombé ing platarané sutyi-Ku.”

¹⁰Mlakua, mlakua metu ing gapura, tyawiské dalan kanggo umat, bukaken, bukaken dalané gedé, singkirna watu-watuné, masanga gendéra kanggo para bangsa!

¹¹Awit iki sing wis diumumké karo GUSTI nganti tekan pojokané bumi! Kabarna marang putri-putri Sion: keslametanmu teka; kabèh sing dadi upahé rekasané pada bareng karo Panjenengané, lan sing wis dadi duwèké kuwi pada mlaku ing ngarepé.

¹²Kuwi bakal pada diarani karo wong “bangsa sing sutyi”, “para tebusané GUSTI”, nanging kowé bakal disebut “sing digolèki”, “kuta sing ora ditinggal”.