Read Caribbean Javanese Yésaya 63 Bible Online

Yésaya 63 - Caribbean Javanese bible

Yésaya 63

¹“Sapa ta sing teka sangka Edom, sing teka sangka Bosra karo nganggo klambiné abang kuwi, sing kétok semlorot awit sangka sandangané sing kaya mengkono kuwi, sing mlaku nganggo kekuwatan sing gedé kuwi?” “Ya Aku iki, sing janji bakal ngekèki pengadilan, lan sing nduwé kwasa ngekèki keslametan!”

²“Apa sebabé, nanging sandangané Panjenengan abangé kaya mengkéné, lan nganggo klambiné kok nganti kaya klambiné wong sing meres anggur?”

³“Aku mung dèwèkan waé enggon-Ku meres, lan tunggalé umat-Ku ora ana sing mèlu Aku! Aku wis ngumpulké para bangsa ing sak njeruhné bebendu-Ku, wis pada Tak idak-idak ing sak njeruhné mulat-mulat nesu-Ku, getihé muntyrat-muntyrat ing klambi-Ku, lan sandangan-Ku kabèh wis gluprut getih.

⁴Awit dinané balesan wis Tak rantyam lan wis tekan taun enggon-Ku mulihké.

⁵Aku weruh ngiwa-nengen: ora ana sing nulungi; Aku nggumun: kok ora ana sing ngréwangi. Tangan-Ku sing terus mitulungi Aku, lan mulat-mulat bebendu-Ku, kuwi sing ngréwangi Aku.

⁶Ing sak njeruhné nesu-Ku kuwi bangsa-bangsa pada Tak idak-idak, pada Tak remuk ing sak njeruhné mulat-mulaté bebendu-Ku, getihé Tak gawé blabaran ing lemah.”

⁷Kula bakal nyatakké kasetiané GUSTI, penggawéané GUSTI sing kesuwur, tyotyok karo kabèh sing ditindakké karo GUSTI marang kita, lan kawelasan-Né sing gedé marang bangsa Israèl sing ditindakké tyotyok karo kawelasan lan tyotyok karo kasetian-Né sing gedé.

⁸Panjenengané apa ora wis ngomong: “Kuwi tenan umat-Ku, anak-anaké sing ora bakal nandangi lityik,” mila Panjenengané dadi Juruslameté

⁹ing njeruhné kasusahané kabèh. Duduk kongkonan utawa utusan, nanging mulékaté Gusti Allah déwé sing ngluwari; Panjenengané sing nebus awit sangka trésna lan welasé. Ing jaman mbiyèn pada dijunjung lan digéndong.

¹⁰Nanging terus pada mbruntak lan nggawé susahé Rohé sing sutyi; mila Panjenengané terus ganti dadi mungsuhé, lan Panjenengané nglawan perang marang umaté.

¹¹Banjur pada kèlingan marang jaman mbiyèn, jamané Moses, abdiné kuwi: Ing ngendi ta Panjenengané sing ngentasaké sangka segara bareng karo pangoné wedus-wedusé? Ing ngendi ta Panjenengané sing ngesokké Rohé sing sutyi ing atiné;

¹²sing karo tangan-Né sing luhur nuntun Moses ing tengené; sing metyah banyu ing ngarepé umaté Gusti supaya langgeng asmané;

¹³sing nuntun umaté ngliwati segara gedé kaya jaran ngliwati ara-ara samun? Wong-wong iki ora tau kesandung,

¹⁴kaya kéwan-kéwan sing mudun ing legokan. Rohé GUSTI nuntun ing panggonan kanggo lèrèn. Ya kaya ngono kuwi enggèn Panjenengan nuntun umat Panjenengan supaya asma Panjenengan diluhurké.

¹⁵Panjenengan supaya gelem weruh sangka swarga lan gelem weruh sangka griya Panjenengan sing sutyi lan gedé! Ing ngendi ta panasé ati Panjenengan lan kekuwatan Panjenengan, ati Panjenengan sing trenyuh lan kawelasan Panjenengan? Panjenengan supaya aja nganti ngendek ati Panjenengan piyambak!

¹⁶Panjenengan kuwi apa ora Bapak kita? Abraham tenan ora ngerti apa-apa ing bab kita, lan Israèl ora kenal karo kita. Duh GUSTI, Panjenengan piyambak kuwi Bapak kita; asma Panjenengan kuwi “Penebus kita” wiwit ing jaman mbiyèn.

¹⁷Duh GUSTI, apa sebabé Panjenengan ngejarké waé enggèn kita pada kesasar nyimpang sangka dalan Panjenengan, lan apa sebabé Panjenengan mangkotké ati kita, terus ora pada wedi marang Panjenengan? Panjenengan supaya gelem mulih awit sangka para abdi Panjenengan, awit sangka taler-taleré bangsa duwèké Panjenengan!

¹⁸Apa sebabé wong-wong dosa pada ngrèmèhké griya Panjenengan sing sutyi, mungsuh kita pada ngidak-idak griya sutyi Panjenengan?

¹⁹Kahanané kita kuwi kaya-kaya wiwit jaman mbiyèn durung naté ing ngisoré pemrintahan Panjenengan, kaya-kaya asma Panjenengan durung naté disebutké kanggo kita.