Read Caribbean Javanese Yésaya 9 Bible Online

Yésaya 9 - Caribbean Javanese bible

Yésaya 9

¹Bangsa sing mlaku ing pepeteng wis weruh pepadang gedé; wong sing pada manggon ing negara sing peteng ndedet wis pada kepletèkan pepadang.

²Panjenengan wis nukulaké surak-surak, lan kebungahan sing gedé. Wong-wong pada bungah-bungah ing ngarepé Panjenengan, kaya bungahé wong ing waktu panèn, kaya surak-suraké wong waktu ngedum rayahan.

³Awit pasangan sing numpang gulu lan rakit ing pundaké lan pentungé wong sing nindes wis Panjenengan tugel kaya kalahé Midian.

⁴Awit saben sepatuné prajurit sing grudak-gruduk lan saben jubah sing dlèwèran getih bakal dadi pangané geni.

⁵Awit ana Bayi sing wis lair kanggo kita, ana Putra sing wis dikèkké marang kita, lambangé pemrintahan ing pundaké, lan asmané disebut: Juru Pituduh sing nggumunaké, Gusti Allah sing Mahakuwat, Bapak sing Langgeng, Ratuné Katentreman.

⁶Gedé pangwasané, lan tentrem rahayu bakal ora ana entèkké ing damparé Daved lan ing kratoné, awit kuwi didasari lan dikuwatké karo keadilan lan kabeneran wiwit saiki nganti ing sak lawas-lawasé. Jalusuné atiné GUSTI sing ngwasani langit lan bumi, bakal nindakké iki.

⁷Gusti Allah wis ngekèki tembungé marang Yakub, lan tembungé kuwi nibani marang Israèl.

⁸Sak bangsa kabèh bèn weruh, ya kuwi Efraim lan sing manggon ing Samaria, sing ngomong karo sombong lan gemedé:

⁹“Pageré bata ambruk, kita arep ngedekké pager watu tatahan; wit ajir pada ditegori, bakal kita ganti karo wit tyemara.”

¹⁰GUSTI terus nglurukké para mungsuhé Resin, lan mboyongi para mungsuhé:

¹¹Wong Aram sangka wétan lan wong Filistèn sangka kulon, kuwi pada nguntal Israèl karo tyangkemé sing amba. Senajan iki mau kelakon kabèh, nesu-Né durung mandek, lan tangan-Né ijik dietungké.

¹²Senajan mengkono bangsa kuwi ora bali marang Panjenengané sing ngrangkèt, lan ora nggolèki GUSTI sing ngwasani langit lan bumi.

¹³Mulané GUSTI terus ngetok endasé lan buntuté Israèl, wité lan pangé bareng sedina.

¹⁴Para pinituwa lan para wong sing kajèn lan mulya kuwi endasé, lan nabi sing goroh kuwi buntuté.

¹⁵Awit wong-wong sing pada nuntun bangsa iki kuwi tukang nasarké, lan wong-wong sing dituntun kuwi dadi ketriwal.

¹⁶Awit sangka kuwi GUSTI ora seneng bab para nom-nomané, lan ora welas marang anak-anaké lola lan marang para randané, awit wong kuwi kabèh pada murtad lan nindakké penggawé ala, lan saben tutuk semauré gemblung. Senajan iki kabèh kelakon, nesu-Né durung mandek, lan tangan-Né ijik dietungaké.

¹⁷Awit duraka kuwi murup kaya geni sing mangan eri lan suket nganti entèk, terus ngobong kekayon ing alas, nganti kemebulé pada mumbul.

¹⁸Awit sangka nesuné GUSTI sing ngwasani langit lan bumi, negara kuwi kobong, lan bangsa kuwi dadi pangané geni; ora ana wong siji-sijia sing melasi seduluré.

¹⁹Pada ngemplok nengen, nanging ijik ngelih, pada ngemplok ngiwa, nanging durung warek, saben wong mangan dagingé kantyané:

²⁰Manasé mangan Efraim lan Efraim mangan Manasé, lan bebarengan pada nglawan Yéhuda. Senajan iki kabèh kelakon, nesuné durung mandek, lan tangan-Né ijik dietungké.