Read Caribbean Javanese Para Imam 1 Bible Online

Para Imam 1 - Caribbean Javanese bible

Para Imam 1

¹GUSTI nyeluk Moses lan ngetokké tembung marang dèkné sangka Tarup Kumpulan, préntahé:

²“Kowé ngomonga marang bangsa Israèl lan kowé ngomonga: Yèn ana wong sak panunggalmu sing arep masrahaké kurban marang GUSTI, kurbanmu kuwi kudu kéwan, ya kuwi sapi utawa wedus.

³Yèn kurbané kuwi kurban obongan rupa sapi, kudu lanang sing tanpa tyiri. Enggoné masrahaké kuwi ing ngarep lawang Tarup Kumpulan, supaya ndadèkké senengé atiné GUSTI.

⁴Terus tangané ditumpangké ing endasé kurban obongan, nganti kurbané ketampa lan kanggo ngluwari dosané.

⁵Sakwisé mengkono terus mbelèha sapiné ing ngarepé GUSTI; para anaké Harun, para imam ngladèkké getihé sapi mau lan disiramké ing sak ubengé mesbèh ing ngarepé lawangé Tarup Kumpulan.

⁶Terus kurbané dikelèti lan ditengkel-tengkel manut pérangan-pérangan sing wis ditemtokké.

⁷Para anaké imam Harun terus nggawéa geni ing mesbèh lan nataa kayu temumpang ing geni,

⁸lan terus nataa tengkel-tengkelan kurbané kuwi, endasé lan gajihé ditumpangké ing kayu sing murup ing mesbèh.

⁹Nanging jeroané lan pupuné kudu dikumbah, terus diobongi kabèh karo imam ing mesbèh kanggo kurban obongan, kanggo kurban bakaran sing ambuné nggawé senengé GUSTI.

¹⁰Yèn kurbané kanggo kurban obongan rupa wedus, wedus gèmbèl apa wedus berok, sing dipasrahké kuwi kudu lanang sing tanpa tyiri.

¹¹Mbelèhé ing pinggirané mesbèh sebelah lor ing ngarepé GUSTI, para imam anaké Harun, terus nyiramké getihé ing sak ubengé mesbèh.

¹²Sakwisé mengkono terus ditengkel-tengkel manut bagéan-bagéané kaya sing wis ditemtokké, tengkel-tengkelané, endasé lan gajihé ditata karo imam ing kayu sing murup ing mesbèh mau.

¹³Jeroané lan pupuné kudu dikumbah, terus kabèh dipasrahké lan diobongi karo imam ing mesbèh: kuwi kurban obongan, kurban bakaran sing ambuné nggawé senengé atiné GUSTI.

¹⁴Yèn kurban sing dipasrahké marang GUSTI kanggo kurban obongan kuwi rupa manuk, kurbané kuwi kudu manuk deruk utawa anak dara.

¹⁵Manuké mau digawa menyang mesbèh karo imam, endasé manuk terus dipuntir lan diobongi ing mesbèh lan getihé dipijetké ing bangkèkané mesbèh.

¹⁶Telihé lan wuluné kudu disisihké lan dibuwang sak étané mesbèh, ing panggonan awu.

¹⁷Terus manuké disuwèk ing poké swiwiné, nanging ora nganti pisah; terus diobongi karo imam ing mesbèh, ing kayu sing murup; kuwi dadi kurban obongan, ya kurban bakaran, sing ambuné nggawé senengé GUSTI.”