Read Caribbean Javanese Para Imam 16 Bible Online

Para Imam 16 - Caribbean Javanese bible

Para Imam 16

¹Sakwisé anaké Harun sing loro mati waktu pada nyedaki marang ing ngarepé GUSTI, GUSTI terus ngetokké tembung marang Moses.

²Tembungé GUSTI marang Moses mau mengkéné: “Kowé ngomonga marang Harun, kakangmu, aja nganti saben waktu mlebu menyang ing omah sutyi ing sak mburiné geber, ing ngarepé tutupé pangrukunan ing nduwur peti, supaya aja nganti nemoni pati, awit Aku ngétok ing mendung ing sak nduwuré tutupé pangrukunan.

³Harun enggoné mlebu ing omah sutyi kuwi tyarané mengkéné: nggawaa pedèt siji kanggo kurban ngluwari dosa lan wedus gèmbèl lanang siji kanggo kurban obongan,

⁴karo nganggo klambi mori lenan sing sutyi lan mori lenan kanggo nutupi kewirangané, sabuké mori lenan lan uga kudu nganggo serban mori lenan; kuwi sandangan sutyi, sing dienggo sakwisé adus.

⁵Nanging pasamuané Israèl jalukana wedus gèmbèl loro kanggo kurban ngluwari dosa lan wedus gèmbèl lanang siji kanggo kurban obongan.

⁶Sakwisé mengkono Harun terus masrahaké sapi lanang sing arep dienggo kurban ngluwari dosa kanggo awaké déwé, karo tyara mengkono enggoné nganakké rukunan kanggo awaké déwé lan brayaté.

⁷Terus dèwèké njupuka wedus gèmbèl lanang loro mau digawa ing ngarepé GUSTI ing ngarepé lawangé Tarup Kumpulan,

⁸wedus gèmbèl lanang loro mau terus dilotré, sing siji kanggo GUSTI lan sijiné kanggo Asasèl.

⁹Wedus sing ketiban lotré kanggo GUSTI terus dipasrahké lan digawé kurban ngluwari dosa.

¹⁰Nanging wedus sing ketiban lotré kanggo Asasèl, kuwi dipasrahké ijik urip ing ngarepé GUSTI, digawé kanggo nganakké rukunan, terus dietyulké menyang ing ara-ara samun kanggo Asasèl.

¹¹Harun terus masrahaké sapi lanang kurban ngluwari dosa sing kanggo awaké déwé lan kanggo nganakké rukunan kanggo awaké déwé lan brayaté, lan mbelèha sapiné lanang kuwi;

¹²terus njupuka pedupan diisèni mawa mengangah sangka mesbèh ing ngarepé GUSTI nganti kebak, uga njupuka dupa ratyikan wangi sing alus rong gegem digawa mlebu menyang ing sak mburiné geber.

¹³Dupané terus ditumpangké ing geni ing ngarepé GUSTI, nganti kemebulé dupa nutupi tutupé pangrukunan ing duwuré angger-anggeré Gusti Allah, supaya Harun aja nemoni pati.

¹⁴Uga Harun njupuka getihé sapi lanang mau setitik, tyipratké karo drijiné ing duwuré tutupé pangrukunan panggonan ngarep, lan anaa setitik sing tyipratké karo drijiné ing ngarepé tutupé pangrukunan nganti dibalèni kaping pitu.

¹⁵Sakwisé mengkono wedus lanang sing bakal kanggo kurban ngluwari dosa kanggo wong okèh kuwi belèhen, lan getihé digawa menyang ing sak mburiné geber, lan getihé digawé pada kaya sing wis ditindakké kanggo getihé sapi mau, ya kuwi: Dityipratké ing duwuré tutupé pangrukunan lan ing ngarepé.

¹⁶Kaya mengkono enggoné nganakké rukunan kanggo omah sutyi, awit sangka sakkèhé najis wong Israèl lan awit sangka sakkèhé paneraké, apa waé dosané. Kaya mengkono kuwi sing kudu ditindakké ing Tarup Kumpulan, sing tetep dumunung ing antarané lan ing sak tengahé najisé wong Israèl.

¹⁷Wong siji waé ora kena ing Tarup Kumpulan, yèn Harun mlebu arep nganakké rukunan ing omah sutyi nganti sak metuné, sakwisé rampung enggoné nganakké rukunan, kanggo awaké déwé, brayaté lan sak pasamuan Israèl kabèh.

¹⁸Sakwisé mengkono terus metua marani mesbèh ing ngarepé GUSTI, lan nganakké rukunan kanggo mesbèh kuwi; dèwèké njupuka getihé sapi lanang lan getihé wedus gèmbèl mau setitik dilèlètké ing sunguné mesbèh mubeng.

¹⁹Nanging getihé sak bagéan dityipratké ing mesbèh karo drijiné nganti dibalèni kaping pitu, nganti mesbèh kuwi diresiki najisé lan disutyèkké sangka sak rupané najisé wong Israèl.

²⁰Sakwisé rampung enggoné nganakké rukunan kanggo ing omah sutyi, Tarup Kumpulan lan mesbèh, terus wedus gèmbèl sing ijik urip dipasrahké,

²¹Harun terus numpangké tangané loro pisan ing endasé wedus sing ijik urip kuwi, lan ngakonana sakkèhé kesalahané wong Israèl lan sakkèhé paneraké, senajan apa waé dosané; uga dosané diemotaké ing endasé wedus lanang kuwi, wedus kuwi terus dityulké ing ara-ara samun karo sakwijiné wong sing wis tata-tata kanggo kuwi.

²²Kaya mengkono enggoné wedus lanang mau kudu ngangkat sakkèhé kesalahané Israèl menyang ing tanah sing bongkor. Sakwisé wedus kuwi dityulké yèn wis tekan ing ara-ara samun,

²³ Harun terus mlebu ing Tarup Kumpulan lan utyula sandangané mori lenan sing dienggo waktu mlebu ing omah sutyi, pada ditinggal ing kono.

²⁴Terus adusa ing panggonan sing sutyi, terus kudu nganggo sandangané déwé, lan metua masrahaké kurban obongan déwé lan kurban obongan kurbané umat; karo tyara mengkono enggoné nganakké rukunan kanggo awaké déwé lan kanggo umat.

²⁵Gajihé kurban ngluwari dosa kuwi terus diobongi ing mesbèh.

²⁶Nanging wong sing ngetyulké wedus sing kanggo Asasèl kuwi, ya kudu ngumbah sandangané lan adusa, sakwisé mengkono ijik kena mlebu ing tarup.

²⁷Sapi lanang lan wedus lanang kurban ngluwari dosa, sing getihé wis digawa mlebu kanggo nganakké rukunan ing omah sutyi kuwi, pada kudu digawa metu sangka tarup, lan lulangé, dagingé lan tlétongé kuwi diobong nganti entèk.

²⁸Sapa sing ngobong kuwi kabèh, kudu ngumbah sandangané, adusa, sakwisé kuwi ijik kena mlebu ing tarup.

²⁹Iki dadia pernatan ing sak lawasé kanggo kowé kabèh, ya kuwi: ing sasi kaping pitu tanggal sepuluh, kowé pada ngasorké awakmu karo pasa, lan aja nyambutgawé, ya bangsa Israèl ya wong mantya sing manggon ing sak tengahmu.

³⁰Awit ing dina kuwi kudu dianakké rukunan kanggo kowé kabèh digawé ngresiki najismu. Kowé bakal pada diresiki sangka sakkèhé dosamu ing ngarepé GUSTI.

³¹Dina kuwi anggepen sabat, dina ngasuh babar pisan kanggo kowé lan kowé pada ngasorké awakmu karo pasa. Kuwi dadia pernatan ing selawasé.

³²Nanging imam sing wis dijebatani lan wis ditetepaké dadi imam nggentèni bapaké, kuwi kudu nganakké rukunan; kuwi kudu nganggo sandangan mori lenan, sandangan sing sutyi,

³³lan terus nganakké rukunan kanggo ing panggonan Mahasutyi, Tarup Kumpulan, lan kanggo mesbèh, uga kanggo para imam lan kanggo wong sak bangsa kabèh.

³⁴Kuwi dadia pernatan ing sak lawasé kanggo kowé, supaya setaun sepisan dianakké rukunan kanggo wong Israèl awit sangka sakkèhé dosané.” Imam Harun terus nglakoni kaya sing dadi préntahé GUSTI lantaran Moses mau.