Read Caribbean Javanese Para Imam 17 Bible Online

Para Imam 17 - Caribbean Javanese bible

Para Imam 17

¹GUSTI ngetokké tembung marang Moses:

²“Kowé mréntaha marang Harun lan marang anak-anaké lan marang sakkèhé wong Israèl, pada omongana mengkéné: Iki préntahé sing dikèkké karo GUSTI:

³Saben wong turunané Israèl sing mbelèh sapi, wedus gèmbèl utawa wedus ing njeruh tarup utawa ing sak njabané,

⁴nanging ora digawa menyang ing ngarepé lawangé Tarup Kumpulan perlu dipasrahké kanggo kurban marang GUSTI ing ngarepé Tarupé sutyi-Né GUSTI, sing mengkono kuwi diutangké marang wong mau kanggo utang getih, awit wis ngutahké getih, wong kuwi kudu dibuwang sangka sak tengahé bangsané.

⁵Mila kuwi supaya wong Israèl yèn pada nggawa kurbané sing dibelèh, sing adaté dipasrahké ing ara-ara, marang GUSTI ing lawangé Tarup Kumpulan karo dipasrahké marang imam, kanggo kurban keslametan ngadep marang GUSTI.

⁶Imam terus nyiramké getihé ing mesbèhé GUSTI ing ngarepé lawangé Tarup Kumpulan, lan gajihé diobongi kanggo ambuné sing nggawé senengé GUSTI.

⁷Aja ana sing pada masrahaké kurbané menèh marang para demit, awit nyembah marang demit kuwi mlebu bédang. Kuwi dadia pernatan ing sak lawasé kanggo wong-wong kuwi nganti turun-temurun.

⁸Lan kuwi pada kok omongana: Saben turunané Israèl utawa tunggalé bangsa liyané sing manggon ing tengahmu, sing masrahaké kurban obongan utawa kurban sing dibelèh,

⁹nanging ora digawa menyang ing lawangé Tarup Kumpulan supaya dipasrahké marang GUSTI, wong sing kaya mengkono kuwi dientèkké sangka antarané bangsané.”

¹⁰“Saben wong turunané Israèl lan tunggalé bangsa liyané sing manggon ing tengahmu, sing mangan saben getih, kuwi bakal Tak lawan lan Tak entèkké sangka sak tengahé bangsané.

¹¹Awit nyawané angger daging kuwi ing getihé, lan enggon-Ku ngekèki getih marang kowé ing mesbèh kuwi supaya dadia dalané rukunan kanggo nyawamu, awit getih kuwi ngekèki rukunan marang nyawa.

¹²Mulané Aku ngongkon marang wong Israèl: Aja ana wong sak panunggalmu sing mangan getih, ya kabèh bangsa liyané sing manggon ing tengahmu, aja ana sing mangan getih.

¹³Saben wong Israèl utawa wong liyané sing manggon ing tengahmu, sing beburon terus olèh kéwan mau utawa manuk sing kena dipangan, getihé kudu ditokké, terus diuruki karo lemah,

¹⁴awit nyawané angger daging kuwi getihé, mulané wong Israèl wis pada Tak préntahké mengkéné: Kowé aja mangan getihé saben daging, awit nyawané angger daging kuwi getihé; sapa sing mangan kuwi mesti kudu dibuwang.

¹⁵Uga sapa sing mangan batang utawa turahé kéwan galak, dadia wong Israèl utawa wong liyané, kuwi kudu ngumbah sandangané lan adus lan bakal dadi najis tekan mingslepé srengéngé, terus mari najisé.

¹⁶Nanging yèn ora kudu ngumbah sandangané lan ora adus, mesti bakal nyangga kesalahané.”