Read Caribbean Javanese Para Imam 18 Bible Online

Para Imam 18 - Caribbean Javanese bible

Para Imam 18

¹GUSTI ngetokké tembung marang Moses:

²“Kowé ngomonga marang wong Israèl lan pada kok omongana: Aku iki GUSTI, Gusti Allahmu.

³Kowé aja tiru-tiru tingkah lakuné wong negara Egipte, sing kok enggoni mbiyèn; lan solah tingkahé wong negara Kanaan, sing dadi tujuané enggon-Ku nuntun mlakumu; kuwi ya aja pada kok tiru adat-istiadaté.

⁴Pernatan-Ku kuwi pada kok lakonana lan katetepan-Ku pada kok tindakna karo urip miturut kuwi kabèh; Aku iki GUSTI Allahmu.

⁵Sak mestiné kowé kudu pada netepana pernatan lan katetepan-Ku. Sapa wong sing manut mesti bakal urip; Aku iki GUSTI.

⁶Aja ana wong sing kumpul karo wong sing mlebu kulit dagingé sing tyedak déwé lan mbukaki kewirangané; Aku iki GUSTI.

⁷Kewirangané bojoné bapakmu aja kok bukaki, kuwi ibumu, kewirangané aja kok bukaki.

⁸Bojoné bapakmu aja kok bukaki kewirangané, kuwi wewenangé bapakmu.

⁹Kewirangané sedulurmu wadon, anaké bapakmu utawa anaké ibumu aja kok bukaki, senajan sing lairé tunggal sak omah utawa ing liyané panggonan.

¹⁰Anaké wadon anakmu lanang utawa wadon, aja kok bukaki kewirangané, awit karo tyara mengkono kowé nggawé blentongé turunmu.

¹¹Anaké wadon bojoné bapakmu, sing patutan sangka bapakmu, dadiné sedulurmu wadon, kuwi aja kok bukaki kewirangané.

¹²Seduluré wadon bapakmu aja kok bukaki kewirangané, awit kuwi kulit dagingé bapakmu.

¹³Seduluré wadon ibumu, aja kok bukaki kewirangané, awit kuwi kulit dagingé ibumu.

¹⁴Kewirangané bojoné seduluré lanang bapakmu aja kok bukaki, bojoné aja kok turoni, awit kuwi bojoné seduluré bapakmu.

¹⁵Kewirangané mantumu wadon aja kok bukaki, kuwi bojoné anakmu lanang, mulané aja kok bukaki kewirangané.

¹⁶Bojoné sedulurmu lanang aja kok bukaki, kuwi wewenangé sedulurmu mau.

¹⁷Kowé aja nuroni kewirangané wong wadon lan anaké wadon, ya aja kok wayuh anaké wadon sangka anaké lanang utawa sangka anaké wadon, lan kok bukaki kewirangané, kuwi pada mlebu kulit dagingmu, kuwi penggawé sing ala.

¹⁸Kowé aja ngepèk pada sedulur didadèkké wayuh, pada kok bukaki kewirangané waktu sing tuwa ijik urip.

¹⁹Kowé aja nuroni wong wadon sing ijik éntuk reget, kuwi najis yèn kok bukaki kewirangané.

²⁰Kowé aja tyampur turu karo bojoné sak pepadamu, nganti dadi najis loro-loroné.

²¹Anakmu aja ana sing kok pasrahaké digawé sajèn marang Molok, supaya kowé aja nganti sembrana marang kesutyiané asmané Gusti Allahmu; Aku iki GUSTI.

²²Kowé aja pada tyampur turu karo pada wong lanang pada kaya karo wong wadon, kuwi tumindak rusuh.

²³Lan menèh kowé aja laku bédang karo kéwan, nganti ndadèkké kowé lan kéwan kuwi pada najis. Uga menèh wong wadon ya aja nganti mapan ing ngarepé kéwan supaya dituroni, kuwi penggawé rusuh.

²⁴Sak mestiné kowé aja nggawé najismu déwé, awit sangka saben penggawé sing kaya mengkono kuwi, awit bangsa liyané sing Tak tundung sangka ngarepmu kuwi wis pada najiské awaké awit sangka penggawé mau kabèh.

²⁵Negara kuwi wis dadi najis, lan Aku wis mbales kesalahané kuwi marang bangsa-bangsa kuwi, nganti negara kuwi nglepèh sing pada ngenggoni.

²⁶Nanging kowé kuwi pada netepana pernatan lan katetepan-Ku, lan aja pisan-pisan nglakoni sak rupané penggawé ala kuwi, senajan wong Israèl déwé utawa bangsa liyané sing manggon ing sak tengahmu,

²⁷- awit wong negara kono sing ndisiki kowé, kuwi wis pada nglakoni sak rupané penggawé ala mau, nganti negara kuwi wis dadi najis -

²⁸supaya kowé aja nganti pada dilepèh karo negara kuwi, yèn kowé ndadèkké najis, kaya enggoné wis nglepèh bangsa sing ndisiki kowé.

²⁹Awit sapa sing nglakoni salah sakwijiné sing njijiki kuwi, wong mengkono kuwi mau kudu dientèkké sangka sak tengahé bangsané.

³⁰Jalaran sangka kuwi kowé pada netepana kuwajipanmu marang Aku, lan aja pisan-pisan nglakoni salah sijiné pakulinan sing ala kuwi, sing digawé sak durungé kowé, lan kowé aja ndadèkké najisé awakmu awit sangka kuwi; Aku iki GUSTI Allahmu.”