Read Caribbean Javanese Para Imam 2 Bible Online

Para Imam 2 - Caribbean Javanese bible

Para Imam 2

¹“Yèn ana wong sing arep masrahaké kurban rupa kurban panganan marang GUSTI, kurbané kuwi kudu rupané glepung pilihan karo disirami lenga lan ditumpangi menyan,

²kurban mau terus digawa menyang ngarepé para imam anaké Harun. Sakwisé kuwi terus njupuk glepungé sak gegem karo lengané lan menyané kabèh, terus diobongi karo imam ing mesbèh, kanggo pisungsung pengéling-éling, dadi kurban bakaran, sing ambuné nggawé senengé GUSTI,

³turahané kurban panganan kuwi dadia pandumané Harun lan para anaké, dadi panduman Mahasutyi sangka kurban bakaran, pasrah marang GUSTI.

⁴Yèn kurban sing arep kok pasrahké kuwi kurban panganan sing diolah ing panggangan roti, kuwi sing digawé kudu glepung pilihan, rupa roti bunder tanpa ragi sing diolah karo lenga, utawa roti tipis tanpa ragi, sing diosèr-osèri lenga.

⁵Yèn kurbanmu rupa kurban panganan sing dipanggang ing panggangan, kuwi sing digawé kudu glepung sing apik déwé karo lenga, tanpa ragi,

⁶terus diiris-iris lan kok esoki lenga; kuwi dadi kurban panganan.

⁷Yèn kurbané rupa kurban panganan sing diolah ing wajan, kuwi kudu glepung pilihan karo lenga.

⁸Kurban panganan sing tyara ngolahé kaya mengkono mau, kuwi kok pasrahké marang GUSTI, diladèkké marang imam, kuwi sing nggawa menyang mesbèh.

⁹Kurban panganan kuwi terus dijukuk karo imam kanggo pisungsung pengéling-éling, diobong ing mesbèh, dadi kurban bakaran, sing ambuné nggawé senengé GUSTI.

¹⁰Turahané kurban panganan kuwi dadia pandumané Harun lan para anaké, dadi panduman Mahasutyi sangka kurban bakaran pasrah marang GUSTI.

¹¹Sak rupané kurban panganan sing kok pasrahké marang GUSTI kuwi ngolahé aja nganggo ragi, awit sing karo ragi utawa madu kuwi ora kena kok obong dadi kurban bakaran marang GUSTI.

¹²Kowé olèh masrahaké marang GUSTI sangka wiwitané unduh-unduhan kanggo kurban, mung waé aja diladèkké ing mesbèh kanggo ambuné sing nggawé senengé.

¹³Sak rupané pisungsungmu kurban panganan kuwi kok bumboni uyah; kurbané panganan aja nganti lali uyahé perjanjiané Gusti Allahmu; saben kurbanmu kuwi kok wènèhi kurban uyah.

¹⁴Yèn wiwitan pametuné bumi sing arep dipasrahké dadi kurban panganan marang GUSTI, kuwi kudu rupa wohé gandum, dipanggang ing geni, ya kuwi roti gandum anyar, kanggo kurban panganan sangka wiwitan panèn gandummu.

¹⁵Kuwi kok wènèhi lenga lan kok tumpangi menyan, kuwi dadi kurban panganan.

¹⁶Terus sing rupa roti gandum lan lengané lan menyané kuwi sak bagéan diobongi karo imam kanggo pisungsung pengéling-éling, dadi kurban bakaran marang GUSTI.”