Read Caribbean Javanese Para Imam 20 Bible Online

Para Imam 20 - Caribbean Javanese bible

Para Imam 20

¹GUSTI ngetokké tembung marang Moses:

²“Wong Israèl pada kudu kok omongana: Saben wong tunggalané Israèl utawa bangsa liyané sing manggon ing antarané Israèl, sing ngekèkké salah sijiné anaké marang Molok, kuwi kudu diukum pati, dibandemi watu karo para umat.

³Aku déwé bakal nglawan wong sing kaya mengkono kuwi, Tak entèkké sangka sak tengahé bangsa, awit ngekèkké anaké salah siji marang Molok, dadiné najiské omah sutyi-Ku, lan ora ngajèni asma-Ku sing sutyi.

⁴Nanging yèn rayat ing negara étok-étok ora weruh marang wong kuwi waktu ngekèkké salah sijiné anaké marang Molok, lan ora ngekèki ukuman pati marang wong kuwi,

⁵ing kono Aku déwé bakal nglawan wong sing kaya mengkono kuwi lan uga marang brayaté, lan wong kuwi bakal Tak entèkké sangka antarané bangsané, lan kabèh sakkèhé wong sing pada mèlu nglonté lan nyembah marang Molok kuwi.

⁶Wong sing madep marang rohé wong sing wis ninggal ndonya utawa marang rohé para tukang ramalan, ya kuwi sing nglonté karo takon marang roh-roh mau, Aku déwé bakal nglawan marang wong sing kaya mengkono kuwi lan Tak entèkké sangka tengahé bangsané.

⁷Mulané kowé kudu pada nyutyèkké awakmu, supaya pada dadi sutyi, awit Aku iki GUSTI Allahmu.

⁸Lan kowé pada gatèkna lan pada nandangana pernatan-Ku; Aku iki GUSTI sing nyutyèkké kowé.

⁹Yèn ana wong nyepatani bapaké utawa ibuné, kuwi diukum pati; awit wis nyepatani bapaké utawa ibuné, getihé ngenèkana awaké déwé.

¹⁰Yèn ana wong lanang sing laku bédang bojoné liyané, dadi laku bédang karo bojoné sak pepadané, kuwi loro-loroné pada diukum pati; ya wong lanang ya wong wadon sing dibédangi kuwi.

¹¹Yèn ana wong sing ngantyani turu karo bojoné bapaké, dadiné bukaki kewirangané bapaké, wong loro kuwi pada diukum pati; getihé ditibakké marang wong-wong kuwi déwé.

¹²Mengkono uga yèn ana wong lanang sing ngantyani turu karo mantuné wadon, loro-loroné pada diukum pati; sebabé pada nglakoni penggawé sing rusuh; getihé ditibakké marang wong-wong kuwi déwé.

¹³Mengkono uga yèn wong lanang ngantyani turu karo pada wong lanang tyarané kaya karo wong wadon, dadi pada nglakoni penggawé sing rusuh, wong loro kuwi pada diukum pati; getihé ditibakké marang wong-wong kuwi déwé.

¹⁴Yèn ana wong lanang rabi loro, anak wadon lan ibuné, kuwi penggawé rusuh lan ala. Wong kuwi lan bojoné pisan diobongi, supaya aja ana penggawé rusuh lan ala ing tengahmu.

¹⁵Uga menèh yèn ana wong lanang sing ngantyani turu karo sembarang kéwan, kuwi kudu diukum pati, uga kéwané ya patènana uga.

¹⁶Mengkono uga yèn ana wong wadon sing ngumpuli sembarang kéwan supaya dituroni, wong wadon kuwi uga kéwané pada kok patènana; loro-loroné kudu diukum pati; getihé ditibakké marang loro-loroné.

¹⁷Yèn ana wong lanang sing ngrabi seduluré wadon, anaké bapaké utawa ibuné, dadi sing lanang weruh kewirangané sing wadon, lan sing wadon weruh kewirangané sing lanang, kuwi penggawé rusuh lan ala, wongé pada kudu dibuwang ing ngarepé bangsané, awit wis nuroni kewirangané seduluré wadon.

¹⁸Yèn ana wong lanang sing tyampur turu karo wong wadon sak njeruhné ijik éntuk reget, dadi mbukaki kewirangané lan mbukak tutupé, lan sing wadon ya ngekèki tutupé getihé dibukak, kuwi loro-loroné pada dientèkké sangka tengahé bangsané.

¹⁹Lan menèh kowé aja mbukaki kewirangané seduluré ibumu utawa seduluré wadon bapakmu; awit sing dibukaki kuwi kewirangané kulit dagingmu déwé, loro-loroné kudu pada nyangga kesalahané déwé.

²⁰Yèn ana wong lanang sing ngantyani turu karo bojoné seduluré bapaké, kuwi dadi nglanggar wewenangé seduluré bapaké, loro-loroné pada njalari dosané déwé, lan bakal pada mati tanpa anak.

²¹Uga yèn ana wong lanang ngepèk bojoné seduluré, kuwi penggawé sing ala, awit nglanggar wewenangé seduluré lanang, mesti bakal pada ora nduwé anak.

²²Mila kuwi kowé pada gatèkna sakkèhé pernatan-Ku lan sakkèhé katetepan-Ku, lan kuwi pada kok tindakna, supaya negara sing dadi tujuané enggon-KU nuntun mlakumu supaya kok enggoni kuwi, aja nganti nglepèh marang kowé.

²³Mlakumu aja miturut adat tata-tyarané bangsa sing bakal pada Tak tundung sangka ngarepmu; awit kuwi wis pada nglakoni sing kaya mengkono kuwi mau, nganti pada Tak emohi.

²⁴Nanging tembung-Ku marang kowé: Kowé sing bakal pada ngenggoni negarané bangsa kuwi, lan Aku sing bakal ngekèkké marang kowé dadi duwèkmu, negara sing lubèr mèlek lan madu; Aku iki GUSTI Allahmu, sing misahaké kowé sangka para bangsa.

²⁵Kowé pada mbédakna kéwan sing halal lan sing haram, uga manuk sing haram lan sing halal, supaya awakmu aja nganti kok najiské, awit sangka kéwan sing sikil papat lan manuk, lan sembarang sing mbrangkang ndlosor utawa nggremet ing bumi, sing wis pada Tak pisahké supaya kok haramké.

²⁶Kowé pada dadia sutyi kanggo Aku, awit Aku GUSTI sing sutyi, lan kowé wis pada Tak pisahké sangka para bangsa, supaya dadia duwèk-Ku.

²⁷Uga yèn ana wong lanang utawa wong wadon sing ketèmpèlan rohé wong mati utawa rohé préwangan, kuwi pada diukum pati, pada bandemana watu, lan getihé ditibakké marang wong-wong kuwi déwé.”