Read Caribbean Javanese Para Imam 23 Bible Online

Para Imam 23 - Caribbean Javanese bible

Para Imam 23

¹GUSTI terus ngetokké tembung marang Moses:

²“Kowé omongana marang wong Israèl lan ngomonga: Kanggo dina gedé sing ditetepaké karo GUSTI sing kudu diumumké dadi dina kumpulan sutyi, ya dina riyaya gedé sing Tak tetepké, kuwi mengkéné:

³Nem dina wong pada nyambuta nggawé, nanging dina kaping pitu kuwi sabat, dina kanggo ngasuh babar pisan, ya kuwi dina kumpulan sutyi; kowé aja pada nglakoni penggawéan apa-apa; kuwi sabat kanggo GUSTI ana ngendiwaé ing panggonanmu.

⁴Iki dina gedé sing ditetepaké karo GUSTI dina kumpulan sutyi, sing siji-sijiné kudu diumumké ing tetep waktuné.

⁵Ing sasi kaping pisan tanggal kaping patbelas ing sasi kuwi, ing wayah soré kuwi Paskah kanggo GUSTI.

⁶Ing sasi kuwi tanggal kaping limalas dadi riyayané roti tanpa ragi pasrah marang GUSTI; pitung dina suwéné kowé mangané roti tanpa ragi.

⁷Ing dinané sing kaping pisan kowé pada nganakna kumpulan sutyi, kowé aja nglakoni penggawéan sing abot.

⁸Pitung dina suwéné kowé pada masrahna kurban bakaran marang GUSTI; ing dinané sing kaping pitu ya nganakna kumpulan sutyi, kowé aja pada nglakoni penggawéan sing abot.”

⁹GUSTI ngetokké tembung marang Moses:

¹⁰“Kowé mréntaha marang wong Israèl lan ngomonga: Ing waktu kowé wis mlebu ing negara sing bakal Tak wènèhké marang kowé, saben bubaran panèn, wiwitané panènanmu sak bentèl kok ladèkna marang imam,

¹¹bentèlan kuwi terus digoyangké karo imam ing ngarepé GUSTI, supaya GUSTI seneng marang kowé. Enggoné nggoyangké ing dina sakwisé sabat.

¹²Uga ing dinané enggonmu nggoyangké bentèlan kuwi, kowé nyawisna wedus gèmbèl siji sing tanpa tyiri umur setaun; kanggo kurban obongan ngadep marang GUSTI,

¹³karo kurbané panganan rupa glepung gandum pilihan rong prasepuluh éfa dityampuri lenga, kanggo kurban bakaran, kuwi ambuné sing nggawé seneng, lan kurbané ombèn rupa anggur seprapat hin.

¹⁴Nganti tekan ing dina kuwi kowé aja pada mangan roti, gandum gorèngan utawa gandum anyar, nganti tekan enggonmu wis pada masrahaké kurbané Gusti Allahmu mau; kuwi pernatan sing kanggo selawasé kanggo kowé turun-temurun ing ngendiwaé ing panggonanmu.

¹⁵Esuké sakwisé dina sabat kuwi, ya kuwi dinané enggonmu pada masrahaké bentèlan pisungsung goyangan mau, kowé pada ngitunga pitung minggu wutuh;

¹⁶kowé ngitunga nganti tekan ing dina sakwisé sabat sing kaping pituné, kuwi sèket dina, terus kowé pada masrahna kurban panganan anyar ngadep marang GUSTI.

¹⁷Kowé pada masrahna roti kanggo pisungsung goyangan rong iji, sangka omahmu, sing digawé glepung pilihan rong prasepuluh éfa, enggoné mbakar sakwisé dityampuri ragi, kuwi kanggo pisungsung wiwitan ngadep marang GUSTI.

¹⁸Roti mau kok barengi karo wedus gèmbèl pitu sing umur setaun sing tanpa tyiri lan sapi lanang siji sing nom lan wedus gèmbèl lanang loro, kabèh mau digawé kurban obongan ngadep marang GUSTI, karo kurban panganan lan kurban ombèn, dadi kurban bakaran sing ambuné nggawé senengé GUSTI.

¹⁹Sakwisé kuwi kowé ngladèkna wedus lanang siji kanggo kurban ngluwari dosa, lan wedus gèmbèl loro sing umur setaun kanggo kurban keslametan.

²⁰Kuwi terus digoyangké karo imam bareng karo rotiné pisungsung wiwitané panènan lan wedusé gèmbèl loro mau ing ngarepé GUSTI, dadi pisungsung sutyi dipasrahké marang GUSTI lan kanggo bagéané imam.

²¹Ing dina kuwi uga kowé ngumumna yèn kuwi dina riyaya gedé lan nganakké kumpulan sutyi, kowé aja pada nglakoni penggawéan sing abot; kuwi pernatan kanggo selawasé ing ngendiwaé ing panggonanmu turun-temurun.

²²Yèn kowé pada panèn pametuné lemahmu, aja kok entèkké nganti tekan ing pinggiré lemahmu, lan turahé panènanmu aja kok jukuki, kuwi kudu kok tinggal kanggo wong mlarat lan wong mantya; Aku iki GUSTI, Gusti Allahmu.”

²³GUSTI ngetokké tembung marang Moses:

²⁴“Kowé mréntaha wong Israèl mengkéné: Ing sasi kaping pitu tanggal sepisan ing sasi kuwi, kuwi kok dadèkna dina lèrèn tenan, dina pengéling-éling karo nganggokké swarané trompèt ya kuwi dina kumpulan sutyi.

²⁵Kowé aja pada nglakoni penggawéan sing abot lan kowé pada masrahké kurban bakaran marang GUSTI.”

²⁶GUSTI ngetokké tembung menèh marang Moses:

²⁷“Nanging tanggal kaping sepuluh ing sasi sing kaping pitu kuwi dadia dina rukunan; kowé pada nganakna kumpulan sutyi, lan pada ngasorna awakmu lan pasaa uga pada ngladèkna kurban bakaran marang GUSTI.

²⁸Ing dina kuwi kowé aja pada nyambut nggawé; awit kuwi dina rukunan kanggo nganakké rukunan kanggo kowé ing ngarepé GUSTI Allahmu.

²⁹Nanging saben wong sing ora ngasorké awaké lan pasa ing dina kuwi, kuwi kudu dientèkké sangka antarané bangsané.

³⁰Mengkono uga saben wong sing nindakké penggawéan apa-apa ing dina kuwi, wong kuwi bakal Tak entèkké sangka sak tengahé bangsané.

³¹Kowé aja pada nindakké penggawéan; kuwi pernatan selawasé, kanggo kowé turun-temurun, ing ngendi waé panggonanmu.

³²Kuwi dadèkna sakwijiné sabat, dina ngasuh babar pisan lan kowé ngasorna awakmu lan pasa. Wiwit sangka malem tanggal sanga sasi kuwi, ing wayah mingslepé srengéngé tekan wayah mingslepé srengéngé, kowé pada ngriyayakna sabatmu.”

³³GUSTI ngetokké tembung marang Moses:

³⁴“Kowé mréntaha marang wong Israèl, mengkéné: Ing sasi kaping pitu mau tanggalé kaping limalas, kuwi dina Riyaya Tarup Godong kanggo GUSTI lawasé pitung dina.

³⁵Ing dina sing kaping pisan kowé nganakna kumpulan sutyi, kowé aja pada nglakoni penggawéan sing abot.

³⁶Pitung dina lawasé kowé pada ngladèkna kurban bakaran marang GUSTI lan ing dina sing kaping wolu kowé pada nganakna kumpulan sutyi lan ngladèkna kurban bakaran marang GUSTI. Kuwi dina riyaya gedé kumpulan, ing dina kuwi kowé aja nglakoni penggawéan sing abot.

³⁷Kuwi mau dina riyaya sing ditetepaké karo GUSTI sing kudu pada kok undangaké dadi dina kumpulan sutyi, lan kowé pada ngladèkna kurban bakaran marang GUSTI, ya kuwi kurban obongan lan kurban panganan, kurban sing dibelèh lan kurban ombèn, saben dina tyatyahé manut sing wis ditetepaké kanggo ing dina kuwi.

³⁸Kuwi mau kabèh durung mlebu dina sabaté GUSTI, lan pisungsung-pisungsungmu uga sakkèhé kurban mbayar janji, kurbanmu kebungahan sing arep kok pasrahké marang GUSTI.

³⁹Nanging ing sasi kaping pitu tanggalé kaping limalas, ing waktu nglumpukké pametuné lemahmu, ing kono kowé pada nganakna riyaya pasrah marang GUSTI pitung dina suwéné; dinané kaping pisan kuwi dina ngasuh babar pisan, mengkono uga dinané kaping wolu, kuwi uga dina ngasuh babar pisan.

⁴⁰Ing dinané kaping pisan kowé nggolèka woh-wohan sing apik-apik, papah-papah kurma, uga pangé wit-witan sing ngrembuyung lan wit gandarasa lan pada bungah-bungaha ing ngarepé GUSTI, Gusti Allahmu, pitung dina suwéné.

⁴¹Kowé pada ngriyayakna kuwi kanggo riyaya pasrah marang GUSTI, saben taun pitung dina suwéné. Kuwi pernatan selawasé kanggo kowé turun-temurun. Kuwi riyayakna ing sasi sing kaping pitu.

⁴²Pitung dina lawasé kowé pada manggona ing tarup godong, saben wong Israèl pada manggona ing tarup-tarup godong kuwi,

⁴³supaya turunmu pada weruh, yèn wong Israèl kuwi pada Tak panggonaké ing tarup-tarup, waktu wis pada Tak etoké sangka negara Egipte; Aku iki GUSTI Allahmu.”

⁴⁴Kaya mengkono préntahé GUSTI bab dina gedé sing ditetepaké karo GUSTI, sing diumumké karo Moses marang wong Israèl.