Read Caribbean Javanese Para Imam 24 Bible Online

Para Imam 24 - Caribbean Javanese bible

Para Imam 24

¹GUSTI ngetokké tembung marang Moses:

²“Wong Israèl pada préntahana supaya pada masrahaké lenga saitun deplokan sing tulèn marang kowé kanggo dimar, supaya dimaré kena dipasang lan tansah murup.

³Harun kudu tansah njaga dimar-dimar kuwi ing ngarepé geber sing ngaling-alingi panggonan angger-anggeré Allah ing njeruh Tarup Kumpulan, wiwit wayah soré tekan ésuké, ing ngarepé GUSTI. Kuwi pernatan sing kanggo selawasé kanggo kowé turun-temurun.

⁴Dimar-dimaré nduwuré kandelar emas murni kudu tansah dijaga murup ing ngarepé GUSTI.

⁵Uga menèh kowé njupuka glepung gandum pilihan lan digawé roti bunder rolas iji. Roti siji rong prasepuluh éfa.

⁶Kuwi terus ditata ing méja emas murni ing ngarepé GUSTI dadi rong tumpuk, dadiné sak tumpuk nem iji.

⁷Saben sak tumpuk dèkèkana menyan sing tulèn; menyan kuwi dadia pengéling-éling kanggo roti mau, ya kuwi kurban bakaran sing dipasrahké marang GUSTI.

⁸Saben dina sabat roti kuwi tansah ajek ditata ing ngarepé GUSTI, kuwi kanggo Israèl dadi kuwajipan perjanjian kanggo selawasé.

⁹Nanging roti kuwi dadia bagéané Harun lan para anaké, lan pada dipangani ing panggonan sing sutyi; awit kuwi pandumané sing Mahasutyi, sangka kurban bakaran sing dipasrahké marang GUSTI, kuwi dadia tatanan kanggo selawasé.”

¹⁰Ing sakwijiné dina ana wong lanang, ibuné wong Israèl, bapaké wong Egipte sing nekani tarup tarupé wong Israèl. Wong mau terus gelut karo wong Israèl ing tarup.

¹¹Anaké wong wadon Israèl kuwi terus ngèlèk-èlèk lan nyepatani asmané GUSTI; terus digawa ing ngarepé Moses. Ibuné wong kuwi jenengé Selomit anaké Dibri sangka taler Dan.

¹²Wongé terus ditahan karo ngentèni putusané sing nyondongi karo tembungé GUSTI.

¹³GUSTI terus ngetokké tembung marang Moses:

¹⁴“Wong sing wis ngutyapké sepata kuwi gawanen metu sangka tarup lan sakkèhé wong sing krungu pada numpangké tangané ing sirahé, sakwisé mengkono wong kuwi bandemana watu karo wong sak pasamuan.

¹⁵Uga wong Israèl pada kok omongana mengkéné: Sapa sing nyepatani marang Gusti Allah, kuwi kudu nanggung kesalahané déwé.

¹⁶Sapa sing ngèlèk-èlèk marang asmané GUSTI, kuwi diukum pati, bandemana watu karo wong sak pasamuan. Dadia kuwi wong Israèl utawa bangsa liyané, yèn ngèlèk-èlèk marang asmané GUSTI, kuwi diukum pati.

¹⁷Mengkono menèh yèn ana wong sing matèni sembarang wong, kuwi kudu diukum pati.

¹⁸Nanging sapa matèni sembarang kewan, kudu ngijoli, siji pada siji.

¹⁹Mengkono uga yèn ana wong nggawé tyiri sak pada-pada, kuwi diwales manut sing dadi penggawéné mau;

²⁰tugel diwaleské tugel, mripat diwaleské mripat, untu diwaleské untu; kaya enggoné nggawé tyiriné liyané, dèwèké ya digawé mengkono.

²¹Sapa sing matèni kewan, kuwi kudu ngijoli, nanging sapa matèni wong, kuwi diukum pati.

²²Mung ana pernatan siji kanggo kowé, senajan wong mantya utawa wong Israèl, awit Aku iki GUSTI, Gusti Allahmu.”

²³Kaya mengkono tembungé sing dipréntahké karo Moses marang wong Israèl; wong sing ngutyapké sepata-sepata mau terus digawa metu sangka tarup, lan dibandemi watu. Dadi wong Israèl pada nindakké apa sing dipréntahké karo GUSTI marang Moses.