Read Caribbean Javanese Para Imam 3 Bible Online

Para Imam 3 - Caribbean Javanese bible

Para Imam 3

¹“Yèn masrahaké kurban keslametan lan sing dipasrahké kuwi rupa sapi, senajan lanang utawa wédok, kuwi kudu sing tanpa tyiri sing dipasrahké ing ngarepé GUSTI.

²Wong terus numpangké tangané ing endasé kurbané, sapi kuwi terus dibelèh ing ngarepé lawangé Tarup Kumpulan lan getihé disiramké ing sak ubengé mesbèh karo para imam anaké Harun.

³Sakwisé mengkono kurbané keslametan kuwi sak bagéan dijukukké dadi kurban sing dipasrahké marang GUSTI karo dibakar, ya kuwi gajihé sing mbuntel jeroané lan sakkèhé gajihé sing nèmplèk ing jeroané,

⁴uga menèh ginjelé loro pisan sak gajihé, ing lempèng lan ing gèmbèlané atiné, jupukana dipisah bareng karo ginjelé.

⁵Kuwi terus diobongi ing mesbèh karo para anaké Harun, ditumpangké ing kurban obongan sing ijik diobong ing geni; kuwi dadi kurban bakaran, sing ambuné nggawé senengé GUSTI.

⁶Yèn sing kanggo kurban keslametan ngadep marang GUSTI kuwi rupa wedus, senajan lanang utawa wédok, kuwi kudu sing tanpa tyiri.

⁷Yèn wedus gèmbèl sing dipasrahké dadi kurban, kuwi diladèkké ing ngarepé GUSTI.

⁸Wong numpangké tangané ing endasé kurban, wedus kuwi terus dibelèh ing ngarep Tarup Kumpulan, lan getihé terus disiramké ing sak ubengé mesbèh karo para anaké Harun.

⁹Sakwisé mengkono kurbané keslametan kuwi sak bagéan dijukuk diladèkké dadi kurban bakaran marang GUSTI, ya kuwi gajihé lan buntuté kabèh, diketok mèpèt ing balung mburiné lan gajihé sing nutupi jeroané uga sakkèhé gajihé sing nèmplèk ing njeruhné,

¹⁰Uga menèh ginjelé loro pisan sak gajihé sing kelèt ing kono, uga gèmbèlé atiné, jupukana bareng karo ginjelé.

¹¹Kuwi terus diobongi karo imam ing mesbèh kanggo panganan rupa kurban bakaran dipasrahké marang GUSTI.

¹²Yèn kurbané rupa wedus, kuwi diladèkké ing ngarepé GUSTI.

¹³Wong numpangké tangané ing endasé wedus, terus wedusé dibelèh ing ngarepé Tarup Kumpulan lan getihé disiramké ing sak ubengé mesbèh karo para anaké Harun.

¹⁴Terus sak bagéan dipasrahké dadi kurban bakaran marang GUSTI, ya kuwi gajihé sing mbuntel njeruhné lan sakkèhé gajihé sing nèmplèk ing jeroané

¹⁵lan ginjelé loro pisan sak gajihé, sing kelèt ing kono, ing lempèng uga gèmbèlé atiné, jupukana bareng karo ginjelé mau.

¹⁶Kuwi terus diobongi kabèh karo imam ing mesbèh kanggo panganan rupa kurban bakaran, sing ambuné nyenengké. Sakkèhé gajihé kuwi dadi duwèké GUSTI.

¹⁷Iki pernatan sak lawasé kanggo turunanmu ing ngendi-endi panggonanmu: Ati-ati kowé aja pisan-pisan mangan gajihé lan getih.”