Read Caribbean Javanese Para Imam 6 Bible Online

Para Imam 6 - Caribbean Javanese bible

Para Imam 6

¹GUSTI ngetokké tembung marang Moses:

²“Yèn ana wong sing nggawé dosa lan ora setia marang GUSTI, lan ora ngakoni marang sak pepadamu bab barang titipané, utawa barang tanggungan, ngrampas barang utawa ngenggoni barangé liyané karo sak wenang-wenang,

³utawa yèn nemu barang sing ilang, nanging ora ngakoni lan sumpah goroh bab perkara apa waé sing dilakoni, nganti dadi ngalami dosa,

⁴yèn awit sangka sing mengkono kuwi dadi nggawé dosa lan kesalahan, wong kuwi terus mbalèkna barangé sing wis dirampas utawa sing wis diduwèki utawa sing dititpké, uga barang enggoné nemu mau,

⁵utawa saben apa sing wis disélaki karo sumpah goroh, kuwi balèkna kabèh regané dipunjuli sak prolimané, diwènèhké marang sing nduwé, ing dinané enggoné masrahaké kurban denda,

⁶kanggo kurban tebusané kesalahané masrahna marang GUSTI rupa wedus gèmbèl lanang sing tanpa tyiri sangka wedus, sing wis regané, diladèkké marang imam kanggo kurban denda.

⁷Imam terus nganakké rukunan kanggo wong mau ing ngarepé GUSTI, nganti bakal olèh ngapura kanggo saben perkara sing wis digawé sing njalari kesalahané.”

⁸GUSTI ngetokké tembung marang Moses mengkéné:

⁹“Harun lan anak-anaké préntahana mengkéné: Kurban obongan kuwi kudu terus diobong geni ing mesbèh, sewengi muput. Geniné mesbèh ora kena mati.

¹⁰Imam terus nganggo klambi lan karo katoké lénan kanggo nutupi kewirangané lan ngukupi awuné sangka nduwuré mesbèh, terus didèkèkké ing sandingé mesbèh.

¹¹Sakwisé kuwi imam kudu ganti saliné lan ganti salin liyané, terus nggawa awu mau metu sangka tarup menyang panggonan sing resik.

¹²Geni ing mesbèh kudu dijaga supaya terus murup, ora kena mati. Saben ésuk imam kudu numpangké kayu ing mesbèh, lan nata kurban obongan ditumpangké ing geni mau, lan ngobong gajihé kurban keslametan.

¹³Geniné kudu dijaga supaya tetep murup, aja nganti mati.”

¹⁴“Iki pernatan bab kurban panganan. Anak-anaké Harun masrahna kuwi madep marang GUSTI ing ngarepé mesbèh,

¹⁵terus anaa siji sing njupuk kurban panganan sak gegem karo lengané, lan sak kabèhé menyan sing temumpang ing kurban panganan, kuwi kabèh terus diobongi ing mesbèh, terus ambuné nyenengké kanggo pengéling-éling ing ngarepé GUSTI.

¹⁶Turahané mau kudu dipangan karo Harun lan anak-anaké: kuwi olahen dadi roti tanpa ragi lan dipangan ing panggonan sing sutyi, ing platarané Tarup Kumpulan.

¹⁷Enggoné ngolah aja nganggo ragi. Kuwi panduman pawèh-Ku sangka duwèk-Ku kurban bakaran, kuwi panduman Mahasutyi, pada kaya kurban ngluwari dosa lan kurban denda.

¹⁸Saben wong lanang anak-turunané Harun kena mangan roti mau. Sak terusé dadia pernatan langgeng. Wong liya sing ndemèk panganan sing wis dienggo kurban, bakal katekan bilai awit sangka daya kesutyiané kurban mau.

¹⁹Gusti Allah ngekèkké pernatan-pernatan bab netepaké imam, anak-turunané Harun, mengkéné:

²⁰Ing dina tetepan mau imam sing arep dijebatani kudu masrahaké glepung gandum sak prosepuluh éfa marang Gusti Allah. Pada okèhé karo kurban panganan saben dina. Sing separo kudu dipasrahké kanggo kurban ing wayah ésuk, turahané kanggo soréné.

²¹Glepung mau kudu diolah karo lenga, terus dipanggang, terus diejur lan dipasrahké dadi kurban panganan. Gandané kurban mau nggawé senengé atiné Gusti Allah.

²²Mengkono dadia pernatan langgeng; saben turunané Harun sing dadi imam gedé kudu masrahaké kurban kaya mengkono. Kabèh kudu diobong pasrah marang Gusti Allah.

²³Kurban panganan sing dipasrahké karo imam, kabèh kudu diobong nganti entèk, ora ana setitik-titika sing olèh dipangan.”

²⁴GUSTI ngetokké tembung marang Moses mengkéné:

²⁵“Harun lan para anaké kuwi pada omongana, mengkéné: Iki pernatan bab kurban ngluwari dosa. Enggoné mbelèh kurban ngluwari dosa kuwi kudu ing ngarepé GUSTI ing panggonan mbelèh kurban obongan. Kuwi kurban sing Mahasutyi.

²⁶Imam sing masrahaké kurban kudu mangan bagéané ing panggonan sutyi, ya kuwi ing platarané Tarup Kumpulan.

²⁷Saben wong sing nggepok dagingé kurban kuwi dadi sutyi lan yèn getihé sing nyiprati ngenèngi sandangan, kuwi kudu kok kumbah ing panggonan sing sutyi.

²⁸Wajan sing kanggo ngolah kurban kuwi, kudu diremuk, nanging yèn ngolahé ing wajan tembaga, kuwi kudu digosok lan kudu dikumbah karo banyu.

²⁹Saben wong lanang turunané para imam kuwi mangana, kuwi kurban sing Mahasutyi.

³⁰Nanging saben kurban ngluwari dosa, sing getihé digawa mlebu menyang ing Tarup Kumpulan, kanggo nganakké rukunan ing sak njeruhné omah sutyi, kuwi aja kok pangan, kuwi kudu diobong nganti entèk.”