Read Caribbean Javanese Para Imam 9 Bible Online

Para Imam 9 - Caribbean Javanese bible

Para Imam 9

¹Sak terusé bareng dina kaping woluné Moses terus nyeluk Harun lan para anaké uga para tuwa-tuwané Israèl,

²lan ngomong marang Harun: “Kowé déwé njupuka pedèt, kanggo kurban ngluwari dosa lan wedus gèmbèl lanang kanggo kurban obongan, loro-loroné sing tanpa tyiri, terus pasrahna marang ing ngarepé GUSTI.

³Lan wong Israèl omongana mengkéné: Pada njupuka wedus gèmbèl lanang siji kanggo kurban ngluwari dosa, lan pedèt lan tyempé sing pada umur setaun sing tanpa tyiri, kanggo kurban obongan.

⁴Uga sapi lanang siji lan wedus gèmbèl lanang siji kanggo kurban keslametan, supaya pada dipasrahké ing ngarepé GUSTI, uga menèh kurban panganan sing diolah nganggo lenga, awit ing dina iki GUSTI bakal ngétok marang kowé kabèh.”

⁵Terus pada nggawa apa sing dipréntahké karo Moses menyang ing ngarepé Tarup Kumpulan, lan wong sak pasamuan kabèh pada maju lan ngadek ing ngarepé GUSTI.

⁶Tembungé Moses: “Iki tembungé sing dipréntahké karo GUSTI, pada kok lakonana, supaya kamulyané GUSTI ngétok marang kowé.”

⁷Tembungé Moses marang imam Harun: “Nyedaka ing mesbèh, kurban ngluwari dosa lan kurban obongan olahen, lan nganakna rukunan kanggo awakmu déwé lan kanggo bangsa kuwi; sakwisé mengkono kurbané wong okèh mau terus olahen, lan nganakna rukunan kanggo wong okèh kuwi, kaya sing wis dipréntahké karo GUSTI.”

⁸Imam Harun terus maju nyedekki mesbèh, lan terus mbelèh pedèt kurban ngluwari dosa sing kanggo dèkné déwé.

⁹Para anaké Harun terus masrahaké getihé marang bapaké, lan Harun nyelupna drijiné ing getih kuwi terus dilèlètké ing sunguné mesbèh. Turahané disiramké ing sikilé mesbèh.

¹⁰Gajihé, ginjel lan gèmbèlané atiné kurban ngluwari dosa kuwi diobong ing mesbèh, kaya sing wis dipréntahké karo GUSTI marang Moses.

¹¹Nanging daging lan lulangé diobong ing sak njabané tarup nganti entèk.

¹²Sakwisé mengkono terus mbelèh kurbané obongan, para anaké Harun terus masrahaké getihé marang bapaké, Harun terus ngesokké getih kuwi ing mesbèh mubeng.

¹³Terus ya pada masrahaké kurbané obongan miturut pérangan-pérangané sing wis ditemtokké kabèh endasé pisan; terus diobong ing mesbèh.

¹⁴Jeroané lan pupuné pada dikumbah lan diobong karo kurbané obongan ing mesbèh.

¹⁵Sakwisé kuwi kurbané wong okèh terus digawa menyang ing mesbèh: wedus gèmbèl kurban ngluwari dosa sing kanggo wong okèh terus dibelèhi kanggo kurban ngluwari dosa kaya sing ndisik.

¹⁶Kurbané obongan terus dikongkon nggawa menyang ing mesbèh, lan diolah manut pernatan.

¹⁷Sakwisé kuwi terus kurbané panganan dipasrahké, dijaluki sak gegem lan diobong ing mesbèh, ing sandingé kurban obongan ésuk.

¹⁸Terus uga mbelèh sapi lan wedus gèmbèl lanang sing dadi kurban keslametan kanggo wong okèh, para anaké Harun terus pada masrahaké getihé marang bapaké, Harun terus ngesokké kuwi ing sak ubengé mesbèh,

¹⁹nanging sakkèhé gajihé sapi lan wedus mau, ya kuwi buntuté sak gajihé, gajihé sing mbuntel jeroané, ginjel uga gèmbèlané atiné,

²⁰kuwi pada ditumpangké ing dadané kurban loro-loroné; kabèh terus diobong karo Harun ing mesbèh.

²¹Dadané lan sampilé sing tengen kuwi dipasrahké karo Harun dadi pisungsung goyangan ing ngarepé GUSTI; kaya sing wis dipréntahké Moses.

²²Sakwisé mengkono Harun terus ngetungké tangané munggah marang wong okèh lan mberkahi wong-wong kuwi. Sakwisé masrahaké kurban ngluwari dosa, kurban obongan lan kurban keslametan terus medun.

²³Moses lan imam Harun terus mlebu ing Tarup Kumpulan. Bareng metu terus pada mberkahi marang wong okèh, lan kamulyané GUSTI terus ngétok marang wong sak bangsa kabèh,

²⁴lan ana geni metu sangka ngarepé GUSTI sing mangan kurban obongan lan werna-werna gajihé ing mesbèh. Bareng wong sak bangsa weruh kahanané mengkono kuwi, terus pada surak-surak lan sendeku sujut.