Read Caribbean Javanese Yérémia 10 Bible Online

Yérémia 10 - Caribbean Javanese bible

Yérémia 10

¹Hé para turunané Israèl! Pada rungokna tembungé GUSTI, sing dipréntahké marang kowé:

²Mengkéné tembungé GUSTI: “Kowé aja mada rupa karo tindak-tanduké para bangsa, aja kagèt karo tanda-tanda ing langit, senajan para bangsa pada wedi awit sangka kuwi.

³Sing pada diajèni para bangsa kuwi tanpa guna. Brahala kuwi apa ora kayu sing ditegor karo wong ing alas, sing ditandangi karo tatah karo tangané tukang kayu?

⁴Sing dipatyaki karo emas lan slaka, lan dikuwatké karo paku lan amer, supaya aja moyak-mayik.

⁵Brahala kuwi kaya wong-wongan ing kebon timun, ora bisa guneman, kudu diangkat karo wong, awit ora bisa mlaku. Aja kok wedèni, awit brahala kuwi ora bisa nandangi ala lan nggawé betyik ya ora bisa.”

⁶Ora ana sing madani Panjenengan, duh GUSTI! Panjenengan kuwi gedé lan asma Panjenengan gedé awit Panjenengan kuwi Mahakuwat.

⁷Duh Ratuné para bangsa, sapa sing ora wedi marang Panjenengan? Tenan, wis sak mestiné wong wedi marang Panjenengan, awit ing antarané para wityaksana tunggalé para bangsa, lan ing antarané para ratuné, ora ana sing madani Panjenengan!

⁸Brahala kuwi kabèh bodo lan gemblung, piwulangé déwa kuwi tanpa guna, awit kuwi mung kayu waé.

⁹Slaka blébékan digawa sangka Tarsis lan emas sangka Ufas; brahala kuwi gawéané tukang lan gawéané tangané tukang emas. Sandangané mori wungu tuwa lan wungu nom, kabèh gawéané para tukang sing pinter.

¹⁰Nanging GUSTI kuwi Gusti Allah sing sejati, Panjenengané kuwi Gusti Allah sing urip, lan Ratu sing langgeng. Kabèh nesu-Né nggojingké bumi lan para bangsa ora bisa tetep urip karo bebendu-Né.

¹¹Kowé mréntaha marang para wong kuwi mengkéné: “Para allah sing ora nggawé langit lan bumi kuwi bakal entèk sangka bumi lan sangka sak ngisoré langit iki.”

¹²GUSTI sing nggawé bumi karo kekuwatan-Né, sing jejekké bumi karo kawityaksanan-Né lan mbèbèr langit karo akal pikiran-Né.

¹³Yèn Panjenengané ngetokké swara-Né, swarané banyu ing langit gembleger, Panjenengané ngumbulké mendung-mendung sangka pojokané bumi, nggawé klélap bareng udan lan ngetokké angin sangka simpenan-Né.

¹⁴Saben manungsa kuwi nyatané bodo ora ngerti apa-apa lan saben tukang emas pada kisinan awit sangka retya garapané. Awit retya tyor-tyorané kuwi ngapusi, ora nduwé nyawa.

¹⁵Sak kabèhé kuwi tanpa guna, garapan sing dadi wohé pemoyok, lan sing bakal lebur ing waktu disiksa.

¹⁶Panjenengané sing dadi pandumané Yakub ora kaya mengkono kahanané, awit Panjenengané sing nganakké samubarang kabèh, lan Israèl kuwi umat duwèké. Asmané ya kuwi GUSTI, sing ngwasani langit lan bumi.

¹⁷Hé para wong ing pangepungan, barang-barangmu pada gawanen sangka negara kéné.

¹⁸Awit mengkéné tembungé GUSTI: “sepisan iki Aku bakal mbuwang wong isiné kuta iki, lan bakal Tak susahké, supaya pada krasa.”

¹⁹Oh tyilaka aku, awit sangka laraku, tatuku ora bisa waras! Aku nggagas: “Ah iki kasusahan sing kudu tak alami!”

²⁰Tarupku wis rusak lan taliné wis pedot kabèh. Anak-anakku wis pada ninggal aku, wis ora ana menèh, wis ora ana sing ngedekké tarupku lan sing mentèng tarupku.

²¹Tenan, para pangon wis pada tanpa pikiran, pada ora takon marang pituduhé GUSTI. Mulané pada ora nemu beja, lan kabèh kéwan wedus pada pating plentyar.

²²Ana kabar sing aku krungu, uniné: Ana ombyak gedé sing bakal teka sangka negara lor, sing bakal nggawé kuta-kuta ing Yéhuda pada dadi sepi mamring, dadi pandelikané asu alasan.

²³Duh GUSTI, kula ngerti, yèn manungsa kuwi ora nduwé pangwasa netepké dalané déwé, lan wong sing mlaku ora nduwé pangwasa netepké jangkahé.

²⁴Duh GUSTI, kula supaya Panjenengan siksa, nanging sak pantesé, aja karo bebendu Panjenengan, supaya kula aja nganti Panjenengan entèkké!

²⁵Bebendu Panjenengan supaya Panjenengan esokna marang para bangsa sing ora kenal karo Panjenengan lan marang para taler-taler sing pada ora nyebut asma Panjenengan, awit wis pada mangan Yakub nganti entèk lan panggonané didadèkké ambruk.