Read Caribbean Javanese Yérémia 13 Bible Online

Yérémia 13 - Caribbean Javanese bible

Yérémia 13

¹Mengkéné tembungé GUSTI marang aku: “Lungaa tuku sabuk mori lenan lan ubetna ing bangkèkanmu, nanging aja kok tyelup ing banyu!”

²Aku terus tuku sabuk kaya préntahé GUSTI lan tak ubetké ing wetengku.

³Sakwisé mengkono GUSTI mréntah menèh:

⁴“Sabuk enggonmu tuku lan sing kok enggo kuwi utyulana! Menyanga ing kali Efrat sabuk kuwi delikna ing bolongané watu.”

⁵Aku terus lunga lan ndelikké sabuké kaya préntahé GUSTI marang aku.

⁶Sakwisé rodok suwé GUSTI ngomong marang aku: “Gelis lungaa menyang kali Efrat, sabuk sing Tak kongkon ndelikké kaé jupuken!”

⁷Aku terus budal menyang kali Efrat, terus ngeduk lan njupuk sabuk kuwi sangka panggonané enggonku ndelikké, nanging jebul kuwi wis metel, ora ana gunané kanggo apa-apa.

⁸Ing kono tembungé GUSTI marang aku:

⁹“Mengkéné enggon-Ku bakal ngentèkké sombongé Yéhuda lan Yérusalèm.

¹⁰Bangsa sing ala iki, sing nulak ngrungokké tembung-Ku, sing mung nuruti karepé atiné, ngetutké mburi allah liyané lan ngabekti lan sujut marang kuwi, bangsa kuwi bakal kaya sabuk sing wis ora ana gunané kanggo apa-apa iki.

¹¹Awit kaya sabuk sing rumaket ing wetengé wong, ya kaya mengkono mbiyèn enggon-Ku ngraketké turunané Yéhuda lan Israèl kabèh marang Aku, supaya bangsa iki dadia umat-Ku sing kesuwur, dipuji lan mulya kanggo Aku. Nanging pada nulak ngrungokké tembung-Ku.” Mengkono tembungé GUSTI.

¹²“Tembungé iki préntahna marang wong-wong kuwi: Tembungé GUSTI, Gusti Allahé Israèl mengkéné: Saben botol kudu dikebaki anggur! Lan yèn wong kuwi pada nyauri: Kula apa ora wis pada ngerti, yèn saben botol kudu dikebaki anggur?

¹³Ing kono kowé omongana menèh: Mengkéné tembungé GUSTI: kabèh wong ing negara iki uga para ratu sing lungguh ing damparé Daved, para imam lan para nabi, uga sak kabèhé wong kuta Yérusalèm bakal Tak mabukké,

¹⁴lan bakal Tak bantingi nganti remuk; para bapak karo anak-anaké, mengkono tembungé GUSTI. Aku bakal ngentèkké wong-wong kuwi, ora Tak welasi, ora Tak éman lan ora Tak ngapura.”

¹⁵Maraa rungokna, pasangen kupingmu, aja gemunggung, awit GUSTI wis ngomong.

¹⁶GUSTI, Gusti Allahmu kuwi luhurna, sak durungé Panjenengané ndadèkké dina dadi peteng, sak durungé sikilmu kesandung ing gunung-gunung, ing wantyi soré, ing sak njeruhné kowé ngarep-arep padang, nanging Panjenengané ndadèkké padang dadi peteng banget, dadi peteng ndedet.

¹⁷Yèn kowé pada nulak ngrungokké, aku bakal nangis ing pandelikan awit sangka gemunggungmu, luhku bakal kembeng-kembeng, malah nganti trotyosan, jalaran kumpulané wedusé GUSTI digiring dadi boyongan.

¹⁸Kowé ngomonga marang ratu lan ratu wadon mengkéné: “Kula njaluk njagong ing panggonan sing ngisor déwé, awit makutané kaluhuran sampéyan wis tiba sangka sirah sampéyan!”

¹⁹Kuta-kutané ing negara Negeb wis ditutupi gapurané, lan ora ana wong siji waé sing mbukakké. Yéhuda wis kebuwang kabèh ditawan menyang pembuwangan kabèh.

²⁰Hé Yérusalèm, delengen lan sawangen ana wong sing pada teka sangka lor! Ing ngendi kumpulan kéwan sing diwènèhké marang kowé, lan wedus-wedusé sing dadi kaluhuranmu?

²¹Kepriyé omongmu, yèn wong-wong sing kok anggep dadi demenanmu, dijunjung dadi penggedému? Apa kowé ora keterjang lara kaya sambaté wong wadon sing ijik mbayi?

²²Lan yèn ana pitakonan sing tukul ing atimu: “Kenèng apa aku katekan sing kaya mengkéné iki kabèh?” Awit sangka gedéné dosamu, mulané pojokané tapihmu dibiyak lan kowé dirujak!

²³Wong Etiopia apa bisa salin werna. Utawa matyan tutul apa bisa ngowahi tutulé? Hé wong sing wis kulina nggawé dosa, apa kowé bisa nindakké betyik?

²⁴Aku bakal ngabul-abul kowé kaya kulit gabah, sing kabur karo angin ing ara-ara samun

²⁵Ya kuwi sing dadi nasipmu, pandumanmu, sing wis Tak timbang kanggo kowé, mengkono tembungé GUSTI, awit kowé lali marang Aku lan manut marang goroh.

²⁶Nanging Aku uga bakal nyilakakké pojokané tapihmu nganti tekan raimu, nganti kétok kewiranganmu.

²⁷Enggonmu laku bédang lan paringkikmu, nglontému sing rusuh ing gunung-gunung lan ing ara-ara, Aku wis weruh pratingkahmu sing ala kuwi. Hé Yérusalèm, tyilaka kowé kuwi, nganti pira suwéné menèh enggonmu dadi sutyi?