Read Caribbean Javanese Yérémia 14 Bible Online

Yérémia 14 - Caribbean Javanese bible

Yérémia 14

¹Tembungé GUSTI marang Yérémia bab waktu ngerak.

²Yéhuda kasusahan, gapurané pada ambruk, lan kétok memelas njepaplang ing lemah; sambaté Yérusalèm munggah menduwur.

³Para penggedéné pada kongkonan wong-wong golèk banyu, pada tekan ing sumur-sumur, nanging ora olèh banyu, terus pada bali karo kendi-kendi sing ijik kosong. Pada isin, praupané mbrabak, nganti sirahé dikudungi.

⁴Penggawéan ing kebon wis mandek, awit ora ana udan ing negara, terus wong tani pada gela lan sirahé dikudungi.

⁵Malah ana menjangan ing ara-ara sing ninggal lunga anaké sing ijik entas lair, awit ora ana suket nom.

⁶Kimar alasan pada ngadek ing puntuk-puntuk gundul, mangap-mangap kaya asu alasan, matané nglokro, awit ora ana suket.

⁷“Duh GUSTI, senajan duraka kita pada nuntut kita, supaya Panjenengan gelem ngekèki bantuan marang kita, awit sangka asma Panjenengan! Awit okèh kesalahan kita, kita pada nggawé dosa ing ngarepé Panjenengan.

⁸Duh Pengandel-andelé Israèl, Juru pitulungan ing waktu kangèlan! Kenèng apa nanging Panjenengan kaya wong mantya ing negara kéné? Kaya wong nglembara sing mung mampir arep nginep waé?

⁹Kenèng apa Panjenengan kaya wong bingung, kaya pahlawan sing ora saguh mitulungi? Nanging Panjenengan apa ora ing tengah-tengah kita, duh GUSTI, lan asma Panjenengan disebut ing nduwur kita. Kita supaya aja nganti Panjenengan tégakké!”

¹⁰Mengkéné tembungé GUSTI kanggo bangsa iki: “Wong kuwi pada seneng nglembara lan ora ngendek sikilé. Mulané ora ndadèkké senengé GUSTI, nanging saiki Panjenengané gelem éling durakané lan arep ngukum dosané.”

¹¹GUSTI ngomong marang aku: “Kowé aja ndedonga kanggo apiké bangsa iki!

¹²Senajan pada pasa Aku ora bakal ngrungokké; senajan pada masrahaké kurban obongan lan kurban panganan, Aku ora bakal seneng marang bangsa iki, nanging Aku bakal matèni bangsa iki karo pedang, pailan lan lara pès.”

¹³Aku terus ngomong: “Duh GUSTI, Gustiku! Para nabi apa ora wis nyritani marang wong-wong kuwi: Kowé ora bakal pada ngalami perang lan ora bakal katekan karo pailan, nanging kowé bakal Tak wènèhi tentrem rahayu, sing kuwat ana ing kéné!”

¹⁴GUSTI sing semaur marang aku: “Para nabi kuwi pada ngomongké goroh atas asma-Ku! Aku ora ngutus lan ngekèki préntah lan ora ngekèki tembung marang para wong kuwi. Wong kuwi pada nglairké wahyu goroh, nubuaté sing kosong lan akal kepinterané atiné déwé.

¹⁵Mulané tembungé GUSTI kanggo para nabi sing pada ngomongké kanggo asma-Ku, nanging Aku ora ngutus wong-wong kuwi lan sing omong: Ing kéné ora bakal katekan perang lan pailan: Para nabi kuwi déwé sing bakal entèk karo perang lan pailan!

¹⁶Lan bangsa sing pada dinubuwati kuwi bakal pada mati glangsaran ing dalan-dalané Yérusalèm awit sangka perang lan pailan lan ora ana wong sing bakal mendem wong-wong kuwi: ya wong-wong kuwi déwé, bojoné lan anak-anaké lanang lan wadon. Kaya mengkono enggon-Ku bakal ngutahké penggawé alané marang wong-wong kuwi.”

¹⁷Omongna tembung iki marang wong-wong kuwi: “Luhku trotyosan awan wengi tanpa mandek, awit prawan, anaké wadon bangsaku, ketaton banget, tatuné ora bisa ditambani babar pisan.

¹⁸Yèn aku metu menyang ing ara-ara ing kana ana wong sing pada mati, awit dipatèni karo pedang! Yèn aku mlebu ing kuta ing kana ana wong sing pada lara kaliren! Uga nabi lan imam pada nglembara ing negara sing ora dikenal.”

¹⁹Yéhuda apa Panjenengan tampik babar pisan? Ati Panjenengan apa jelèh marang Sion? Kenèng apa nanging kula pada Panjenengan digebuki nganti ora bisa waras babar pisan? Kula pada ngarep-arep tentrem rahayu, nanging ora ana apa-apa sing apik, ngentèn-entèni kewarasan, nanging sing ana mung rasa wedi.

²⁰Duh GUSTI, kula pada ngrumangsani tindak dursila kula lan durakané para mbah kula; tenan, kula nggawé dosa marang Panjenengan.

²¹Panjenengan supaya aja nampik kita, awit sangka asma Panjenengan, aja nganti nyepèlèkké kaluhurané dampar Panjenengan. Supaya éling marang perjanjiané Panjenengan karo kita, aja Panjenengan batalké!

²²Sangka tunggalé para déwané para bangsa, sing tanpa guna kuwi, apa ana sing bisa nibakké udan? Apa langit déwé bisa ngekèki udan deres? Apa ora mung Panjenengan déwé, duh GUSTI, Gusti Allah kita, Pengandel kita sing nindakké perkara kuwi kabèh?