Read Caribbean Javanese Yérémia 18 Bible Online

Yérémia 18 - Caribbean Javanese bible

Yérémia 18

¹Tembungé GUSTI marang Yérémia mengkéné:

²“Gelis lungaa menyang omahé tukang kendi! Ing kana kowé bakal Tak wulangi tembung-Ku marang kowé.”

³Aku terus budal menyang omahé tukang kendi lan ketepakan dèwèké pinuju nggawé kendi karo pirantiné.

⁴Yèn kendi sing sangka lempung ing tangané kuwi rusak, kendi mau terus mbangun kendi kuwi menèh didadèkké kendi liyané, sing dianggep betyik miturut panemuné.

⁵Terus tembungé GUSTI marang aku mengkéné:

⁶“Hé turunané Israèl! Apa Aku ora bisa nandangi marang kowé kaya kendi kuwi, mengkono tembungé GUSTI. Kaya lempung ing tangané tukang kendi kuwi, mengkono uga kowé ing tangan-Ku, hé turunané Israèl!

⁷Ana waktuné tembung-Ku kanggo ing sakwijiné bangsa utawa kraton, yèn Aku gelem mbedoli, mbubrah lan ngentèkké kuwi.

⁸Nanging yèn bangsa, sing wis Tak omongké kaya mengkono mau mratobat sangka penggawéné ala, Aku terus dadi gela, yèn Aku bakal nibakké tyilaka sing wis Tak rantyam kanggo bangsa kuwi.

⁹Ana waktuné Aku ngomong bab sakwijiné bangsa utawa negara, yèn Aku gelem mbangun lan nandur kuwi.

¹⁰Nanging yèn bangsa kuwi nglakoni apa sing ala ing ngarep-Ku lan ora ngrungokké marang tembung-Ku, Aku dadiné gela nanging Aku bakal nekakké untungé sing Tak janjèkké marang bangsa kuwi.

¹¹Mulané kowé ngomonga marang bangsa Yéhuda lan wong isiné kuta Yérusalèm: Mengkéné tembungé GUSTI: Aku iki ijik nyepakké tyilaka kanggo kowé lan mikir rantyaman nglawan marang kowé. Apiké kowé pada mratobat kabèh, ninggala pratingkahmu sing ala lan betyika mlakumu lan penggawému!

¹²Nanging omongé wong-wong kuwi: Ora ana gunané! Awit aku arep pada nandangi miturut rantyamanku déwé lan arep nuruti karepé atiku déwé-déwé sing ala.”

¹³Awit sangka kuwi tembungé GUSTI mengkéné: “Tyoba takokna ing antarané para bangsa: sapa sing tau krungu perkara sing kaya mengkéné iki? Prawan ing Israèl wis nglakoni perkara-perkara sing ala banget!

¹⁴Apa bisa kelakon salju putih arep ngalih sangka gunung watu Siryon? Mokal yèn banyu ing gunung bakal asat, banyu sing seger lan mili!

¹⁵Nanging umat-Ku wis lali marang Aku, pada ngobong kurban kanggo para déwa sing tanpa guna, pada tiba kesandung ing dalané déwé-déwé, ya kuwi dalan-dalané ing jaman mbiyèn, lan ménggok ing dalan simpangan, ya kuwi dalan sing ora dirata.

¹⁶Pada nggawé negarané dadi ala lan dadi tyatyatan selawasé. Saben wong sing liwat pada mukok lan gèdèk-gèdèk

¹⁷Aku bakal mbuyarké bangsa iki ing ngarepé mungsuhé kaya angin sangka wétan. Mburi-Ku lan duduk praupan-Ku sing Tak kétoké marang wong-wong kuwi ing dina tibané tyilakané.”

¹⁸Omongé para wong kuwi: “Hayuk pada nganakké komplotan nglawan Yérémia, awit imam kuwi ora bakal kentèkan piwulang, wong wityaksana ora bakal kentèkan pitutur lan nabi ora bakal kentèkan tembungé. Hayuk kita ngantem dèwèké karo basané déwé lan ora nggatèkké marang saben tembungé!”

¹⁹Duh GUSTI, supaya gelem nggatèkké kula lan ngrungokna sambat kula!!

²⁰Sing betyik apa bakal kewales ala? Nanging pada ngeduk juglangan kanggo kula! Panjenengan supaya éling, yèn kula teka ing ngarepé Panjenengan, lan njaluk apa sing apik kanggo para wong kuwi, supaya diowalaké sangka bebendu Panjenengan.

²¹Mila anak-anaké supaya pada Panjenengan pasrahké marang patyeklik, lan para wong kuwi supaya Panjenengan pasrahaké marang landepé pedang! Sing wédok ya bèn pada kélangan anak lan bojo! Sing lanang ya bèn pada mati karo memala lan para nom-noman pada mati karo pedang ing peperangan.

²²Ya bèn krungu jeritan sangka omahé ing waktu Panjenengan dadakan nekakké grombolan rampok, awit pada ngeduk juglangan kanggo nyekel kula, lan wis masang jiret kanggo sikil kula.

²³Malah Panjenengan, duh GUSTI, Panjenengan ngertèni, kabèh rantyamané anggèné bakal matèni kula. Aja Panjenengan ngapura kesalahané, lan aja Panjenengan birat dosané sangka ngarepé Panjenengan: Nanging supaya pada kesandunga ing ngarepé Panjenengan supaya Panjenengan gelem nindakké ing dina bebendu-Mu marang wong-wong kuwi!