Read Caribbean Javanese Yérémia 2 Bible Online

Yérémia 2 - Caribbean Javanese bible

Yérémia 2

¹Tembungé GUSTI marang aku mengkéné:

²“Budala ngomongi wong sak isiné Yérusalèm: Mengkéné tembungé GUSTI: Aku kèlingan marang katrésnanmu ing waktu nom-nomanmu, marang katrésnanmu waktu kowé dadi mantèn, enggonmu ngetutké Aku ing ara-ara samun, ing negara sing ora ana tetukulané.

³Ing waktu semono Israèl dadi sutyi kanggo GUSTI, kanggo woh wiwitan sangka panènané. Sak kabèhé wong sing mangan mesti kesalahan, kena karo tyilaka, mengkono tembungé GUSTI.

⁴Hé tyedak turunané Yakub, rungokna tembungé GUSTI, hé sak kabèhé brayaté tyedak turunané Israèl.

⁵Mengkéné tembungé GUSTI: Para leluhurmu nindakké ora bèrès apa awit sangka Aku nanging pada ngedohi Aku, lan terus ngetutké déwa sing tanpa guna nganti pada ora olèh apa-apa?

⁶Lan kok pada ora takon menèh: Ing ngendi GUSTI, sing nuntun kita metu sangka negara Egipte; sing nuntun kita ing ara-ara samun, ing negara sing bongkor lan legak-legok, ing tanah sing garing lan peteng, ing tanah sing ora dilakoni wong lan ora dipanggoni karo manungsa?

⁷Kowé wis Tak tuntun menyang negara sing subur, supaya ngrasaké wohé lan sak pametuné kabèh sing betyik sangka kono. Nanging bareng kowé wis mlebu ing tanah-Ku, kuwi kowé najisaké, tanah duwèk-Ku kowé ndadèkké rereget.

⁸Para imam ora takon menèh: GUSTI ing ngendi? Para wong sing nyekel angger-angger wis ora kenal marang Aku menèh, lan para pangon pada nyingkur Aku. Para nabi pada nubuat kanggo Baal, pada ngetutké mburi marang sing tanpa guna.

⁹Mulané Aku bakal nganakké perkaran menèh karo kowé kabèh, lan karo anak putumu Aku bakal nganakké perkaran, mengkono tembungé GUSTI.

¹⁰Nyabranga waé menyang tanah pinggiré segarané wong Kitim lan sawangen; ngongkona wong menyang Kedar lan gatèkna tenan! Titènana apa ana sing kelakon kaya mengkéné iki!

¹¹Apa ana bangsa sing ngijoli allahé, senajan kuwi sak temené duduk allah? Nanging umat-Ku pada ngijoli Kaluhurané karo sing ora ana gunané.

¹²Hé langit, pada nggumuna awit sangka sing kaya mengkono kuwi, ndredeka lan gemetera sing luwih banget, mengkono tembungé GUSTI.

¹³Awit umat-Ku nglakoni dosa kaping pindo: pada nyingkur Aku, sing dadi sumberé urip, arep ngeduk blumbang kanggo awaké déwé, ya kuwi blumbang sing botyor, sing ora bisa ngadahi banyu.

¹⁴Israèl kuwi batur tukon, apa anak-anaké batur? Kenèng apa kok dadi rampasan?

¹⁵Singa nom pada nggeruh marang bangsa kuwi, karo swara banter, negarané didadèkké bongkor, kuta-kutané diobongi, ora dienggoni menèh.

¹⁶Uga para wong Mèmfis lan Tapanhes pada nggunduli batuké sirahmu.

¹⁷Apa ora kowé déwé sing njalari kowé katekan sing kaya mengkono kuwi, awit kowé nyingkur GUSTI, Gusti Allahmu, waktu Panjenengané nuntun kowé ing ndalan?

¹⁸Lah saiki, apa olèh-olèhmu enggonmu lunga menyang ing Egipte, apa arep ngombé banyuné kali Nil? Lan apa batinmu enggonmu lunga menyang ing Asyur, apa arep ngombé banyuné kali Efrat?

¹⁹Penggawé alamu bakal ngrangkèt kowé, lan awit nyingkur Aku, kuwi bakal nyèksa kowé! Ngertia lan delengen, sak pira ala lan perihé kowé nyingkur GUSTI, Gusti Allahmu kuwi; lan ora gemeter wedi marang Aku, mengkono tembungé Gusti, GUSTI sing ngwasani langit lan bumi.

²⁰Awit wiwit mbiyèn enggonmu nugeli pasanganmu lan medoti taliné sing nalèni kowé, lan omong: Aku emoh dadi batur menèh. Malah ing saben puntuk-puntuk sing metongol, lan ing sak ngisoré wit sing ngrembuyung, kowé turu lan laku bédang.

²¹Nanging kowé Tak tukulké dadi wit anggur pilihan, lan dadi wiji sing murni. Kenèng apa ta, nanging kowé kok malih dadi wit sing mambu penguk, dadi wit anggur alasan!

²²Malah, senajan kowé adusa karo banyu awu lan nganggo sabun okèh, nanging blentongé kesalahanmu ora ilang ing mripat-Ku, mengkono tembungé Gusti Allah.

²³Kepriyé kowé kok wani ngomong: Aku ora tau najisaké awakku, aku ora tau ngetutké mburi para Baal? Delengen tindak-tandukmu ing legokan, ngertènana apa sing wis kok lakoni; hé, unta wadon sing èntèng sikilé lan mbloya-mblayu mbrana-mbréné,

²⁴sing mbedal mblayu menyang ara-ara samun, awit kepéngin ngisis! Sapa sing bisa ngendek enggoné gandrung? Kabèh sing nggolèki dèwèké, ora perlu rekasa, bakal pada ketemu ing waktu kawinan.

²⁵Jaganen, supaya sikilmu ora nganggo sepatu, lan gorokanmu ngelak! Nanging kowé ngomong: Tanpa guna! Tanpa guna! Awit kula seneng marang wong-wong mantya, mila kula bakal ngetutké nang mburiné wong-wong kuwi.

²⁶Kaya wirangé maling sing konangan, mengkono enggoné turunané Israèl kewirangan, ya kuwi para ratuné, penggedéné, para imamé lan nabiné,

²⁷sing ngomong marang kayu sak tengkel: Sampéyan kuwi bapak kula! lan marang watu: Sampéyan kuwi sing nglairké kula! Tenan, pada nyingkur marang Aku lan ora ngadepké praupané marang Aku, nanging bareng katekan bebaya, terus ngomong: Panjenengan supaya gelem mitulungi kula!

²⁸Ana ngendi para allahmu, sing kok nggawé kanggo awakmu déwé kuwi? Bèn pada tangi, yèn bisa mitulungi kowé, ing waktu kowé nemu tyilaka. Hé Yéhuda, awit kaya okèhé kuta-kutamu, ya semono kuwi uga okèhé allahmu!

²⁹Apa perlune kowé arep bantahan karo Aku? Kowé kabèh wis pada mblénjani Aku, mengkono tembungé GUSTI.

³⁰Tanpa guna enggon-Ku nggebuki anak-anakmu, piwulang ora dianggep pedangmu déwé wis mangan para nabimu nganti entèk, kaya singa nom sing nubruk nyempali pangané.

³¹Kowé kuwi tyedak turunané sapa? Gatèkna tembungé GUSTI! Apa Aku wis dadi ara-ara samun kanggo Israèl utawa negara sing peteng ndedet? Kenèng apa umat-Ku kok ngomong: Kula wis merdéka, kula pada ora gelem nemoni menèh ing ngarepé Panjenengan?

³²Prawan apa bisa lali marang barang rerégané, utawa pengantèn wadon lali marang patyakan mantèné? Nanging umat-Ku lali marang Aku wiwit ing waktu sing ora kena diitung suwéné.

³³Apik temen enggonmu nata dalanmu kanggo nggolèki katrésnan! Mulané kowé wis kulina nglakoni sing ala.

³⁴Nganti getihé para wong mlarat sing ora salah ketemu ing jubahmu; ora waktu pada mbobol arep maling enggoné pada kok konangi! Senajan kabèh kuwi mengkono,

³⁵nanging kowé ngomong: Aku ora nggawé dosa! Pantyèn bebenduné wis sumingkir sangka aku! Aku arep nggawa kowé menyang pengadilan, awit kowé ngomong: Aku ora nggawé dosa!

³⁶Entèng temen penganggepmu ing bab ngowahi tindak-tandukmu kuwi! Kowé bakal kisinan uga awit sangka Egipte, kaya kowé ngalami kisinan awit sangka Asyur.

³⁷Sangka kana uga kowé bakal metu karo ngangkat tanganmu, awit GUSTI wis nampik para sing kowé endelaké, lan kowé ora bakal olèh nggawé karo para wong kuwi.”