Read Caribbean Javanese Yérémia 22 Bible Online

Yérémia 22 - Caribbean Javanese bible

Yérémia 22

¹Mengkéné tembungé GUSTI: “Kowé lungaa menyang kratoné ratu ing Yéhuda lan omongna tembung iki ing kono!

²Préntahna mengkéné: Hé ratu Yéhuda sing lungguh nang damparé Daved, kowé, para pegawému lan abdimu sing mlebu liwat nang gapura-gapura kéné!

³Mengkéné tembungé GUSTI: Tumindaka sing adil lan bener; wong sing dirampas wewenangé utyulana sangka tangané sing nyia-nyia; kowé aja nindakké penggawé ala marang wong mantya, botyah lola lan randa, uga aja ngutahké getihé wong sing resik ing kéné!

⁴Awit yèn kowé pada bisa nindakké kuwi kabèh karo temen-temen, bakal kelakon para ratu, sing bakal lungguh nang damparé Daved, pada numpak kréta lan diarak mlebu ing gapura-gapurané kraton: para ratu kuwi, para pegawéné lan abdiné.

⁵Nanging yèn kowé ora ngrungokké tembungé iki, Aku wis sumpah kanggo Aku déwé, mengkéné tembungé GUSTI, kraton iki bakal dadi ambruk.

⁶Awit mengkéné tembungé GUSTI kanggo brayaté ratu ing Yéhuda: Kowé Tak anggep kaya Giléad, lan kaya putyuké gunung Libanon! Nanging Aku mesti bakal ndadèkké kowé dadi ara-ara samun, dadi kuta sing suwung.

⁷Aku bakal netepké tukang pengrusak kanggo kowé, sing pada nggawa gamané déwé-déwé: Wong kuwi bakal pada negori wit tyemara sing dadi pilihanmu sing terus dityemplungké ing geni.

⁸Yèn okèh wong sing liwat ing kuta kéné, kuwi bakal pada rembukan: Kenèng apa GUSTI nindakké sing kaya mengkéné marang kuta sing gedé iki?

⁹Wong bakal nyauri: Awit wis pada lali marang perjanjiané GUSTI, Gusti Allahé, lan wis sujut nyembah marang allah liyané lan ngabekti marang kuwi.”

¹⁰Kowé aja nangisi wong mati, lan aja béla sungkawa awit sangka wong kuwi. Luwih betyik kowé nangisana sing wis lunga, awit kuwi ora bakal bali menèh, lan ora bakal weruh negara kelairané menèh.

¹¹Awit mengkéné tembungé GUSTI kanggo Salum anaké Yosia, ratu ing Yéhuda, sing wis dadi ratu, nggentèni Yosia, bapaké lan sing wis ninggalké negara iki: “Dèwèké ora bakal bali mréné menèh;

¹²nanging bakal mati nang negara pembuwangan lan ora bakal weruh negara iki menèh.”

¹³Tyilaka wong sing mbangun kratoné karo sing ora adil, lan pendapané gedé karo penggawé peksa, lan sing ngerjakké sak pepadané nanging ora mbayar lan ora ngekèki upahé,

¹⁴sing ngomong: “Aku arep ngedekké kraton, sing gedé amba lan pendapané sing jembar!” Témboké kraton terus dipasangi jendéla-jendéla digawé sangka kayu tyemara, lan dityèt abang.

¹⁵Apa penganggepmu kowé kuwi ratu, yèn pada rebutan menang bab nggunakké kayu tyemara? Bapakmu apa ora uga mangan lan ngombé, lan olèh sing énak? Nanging wongé nindakké keadilan lan kabeneran,

¹⁶lan mutusi perkarané wong sangsara lan wong mlarat karo adil. Apa ora kuwi diarani nganggep marang Aku? Mengkono tembungé GUSTI.

¹⁷Nanging mripat lan atimu mung ngarah marang untungé, ngutahké getihé wong sing ora salah, lan nindakké meresi lan penggawé ala.

¹⁸Mulané mengkéné tembungé GUSTI kanggo Yoyakim anaké Yosia, ratu ing Yéhuda: “Wong ora bakal nangisi dèwèké: Oh kepriyé kakangku! Oh kepriyé mbakyuku! Wong ora bakal nangisi dèwèké: Oh kepriyé bendara! Oh kepriyé sampéyan!

¹⁹Enggoné dikubur tyarané bakal kaya mendem kimar, disèrèt lan dibuwang ing sak njabané gapurané Yérusalèm.”

²⁰Kowé munggaha ing gunung Libanon lan mbengok-mbengoka banter! Bengokna swaramu ing pegunungan Basan! Mbengok-mbengoka banter sangka pegunungan Abarim, awit sak kabèhé sing pada kok trésnani wis pada entèk!

²¹Aku wis ngomong marang kowé waktu kowé kuwat, nanging kowé nyauri: “Aku emoh ngrungokké!” Kaya mengkono tindak-tandukmu wiwit waktu nom-nomanmu, awit kowé emoh ngrungokké tembung-Ku!

²²Sak kabèhé wong sing ngengon kowé bakal kabur karo lésus, lan para sing kok trésnani bakal diangkat dadi wong tawanan. Ing kono kowé bakal ngalami kisinan lan reget awit sangka kabèh penggawé alamu.

²³Hé kowé sing manggon ing gunung Libanon, lan nusuh ing wit-witan tyemara! Tenan kowé bakal sambat, yèn kowé ngalami lara, ngalami lara sing rasané kaya wong wadon sing arep mbayi.

²⁴Mengkéné tembungé GUSTI: “Kanggo Aku sing urip, malah senajan Konyahu anaké Yoyakim, ratu ing Yéhuda kuwi dadi tyap ségel ing tangan-Ku tengen, nanging kowé bakal Tak tyopot!

²⁵Aku bakal masrahaké kowé nang tangané para wong sing pada ngarah nyawamu, marang tangané wong sing kok wedèni, marang tangané Nebukadnésar, ratu ing negara Babèl lan marang tangané wong Kasdim.

²⁶Aku bakal ngguwak kowé lan ibumu sing nglairké kowé menyang negara liyané sing duduk negara kelairanmu; kowé bakal mati ing kana.

²⁷Nanging wong kuwi ora bakal pada mulih menyang negara sing diangen-angen supaya bisa bali mbrana!”

²⁸Konyahu kuwi apa ora barang sing ora kajèn sing bakal diremuk karo wong, utawa kendi sing ora disenengi karo wong? Kenèng apa dèwèké kok dibanting lan dibuwang, menyang negara, sing ora dikenal?

²⁹Hé negara, negara, negara! Rungokna tembungé GUSTI.

³⁰Mengkéné tembungé GUSTI: “Wong kuwi tyateten ora nduwé anak, wong lanang sing ora tau olèh beja ing sak njeruhné uripé, awit turunané ora ana siji-sijia sing bisa nglungguhi damparé Daved lan nyekel pemrintahan ing Yéhuda menèh!”