Read Caribbean Javanese Yérémia 23 Bible Online

Yérémia 23 - Caribbean Javanese bible

Yérémia 23

¹“Tyilaka para pangon sing ngejarké waé wedus-wedus engon-engonan-Ku pada ilang lan buyar!” mengkono tembungé GUSTI.

²Mulané tembungé GUSTI, Gusti Allahé Israèl marang para pangon sing ngengon bangsaku, mengkéné: “Kowé wis ngejarké waé wedus-wedus-Ku buyar lan pating slebar, ora kok rumati. Mulané ngertia, Aku bakal mbales marang kabèh penggawému sing ala, mengkono tembungé GUSTI.

³Lan Aku déwé bakal nglumpukké turahé wedus-wedus-Ku sangka negara enggon-Ku mbuyarké lan bakal nggiring bali menyang pangonané menèh; kuwi terus bakal tangkar-tumangkar lan tambah okèh.

⁴Aku bakal milih pangon-pangon sing bakal ngengon wedus-wedus kuwi, nganti ora pada wedi menèh, ora kagèt lan ora ana siji-sijia sing kesasar. Mengkono tembungé GUSTI.

⁵Tembungé GUSTI mengkéné: bakal tekan ing waktuné, Aku bakal nukulaké Trubusané Daved sing adil. Kuwi bakal dadi ratu sing wityaksana lan nandangi adil lan bener ing negara.

⁶Ing jaman ngedekké ratu kuwi Yéhuda bakal diluwari lan Israèl bakal tentrem uripé; nanging jenengé sing diwènèhké karo wong marang dèwèké: GUSTI keadilan kita.

⁷Mulané, mengkéné tembungé GUSTI, bakal tekan ing waktuné wong ora ngomong mengkéné menèh: Kanggo GUSTI sing urip, sing ngetokké Israèl sangka negara Egipte!

⁸nanging mengkéné: Kanggo GUSTI sing urip sing nuntun lan nggawa mulih tyedak turunané Israèl metu sangka negara lor lan sangka kabèh negara, enggoné Panjenengané mbuyarké wong-wong kuwi lan kuwi terus bakal pada manggon ing negarané déwé.”

⁹Bab para nabi. Atiku remuk sak njeruhné dadaku. Kabèh balungku gogrok. Kahananku kaya wong mendem, kaya wong lanang sing kokèhan enggoné ngombé anggur, awit sangka GUSTI lan tembungé sing sutyi.

¹⁰Negara wis kebak karo wong laku bédang; tenan awit sangka bebendu iki negara iki dadi garing, lan suket-suket ing ara-ara pada alum; apa sing diuber wong mung sing ala, lan kekuwatané mung enggoné pada ora adil.

¹¹“Tenan, ya nabi, ya imam pada dursila; ing omah-Ku Aku uga nemoni penggawé alané. Mengkono tembungé GUSTI.

¹²Mulané dalan sing dilakoni para wong kuwi bakal kaya dalan sing lunyu; ing petengan bakal pada kesandung lan tiba ing kono, awit Aku bakal nekakké tyilaka kanggo para wong kuwi ing sak njeruhné taun waktu pada diukum. Mengkono tembungé GUSTI.

¹³Ing golongané para nabi ing Samaria, Aku weruh ana sing ora apik, pada nubuat kanggo Baal lan pada nasarké umat-Ku Israèl.

¹⁴Nanging golongané para nabi ing Yérusalèm Aku weruh penggawéné sing rusuh, pada laku bédang lan nandangi ora jujur, pada ngatoské atiné wong sing nindakké sing ala, nganti ora ana wong sing mratobat sangka durakané. Kabèh wis pada dadi kaya Sodom kanggo Aku, lan para sing manggon ing kono kaya Gomora.”

¹⁵Awit sangka kuwi tembungé GUSTI sing ngwasani langit lan bumi, kanggo para nabi kuwi mengkéné: “Aku bakal ngekèki pangan kayu pait lan ombèn-ombèn ratyun marang wong-wong kuwi, awit sangka para nabi ing Yérusalèm kuwi, tindak dursila wis dijembarké ing sak kabèhé negara.”

¹⁶Mengkéné tembungé GUSTI sing ngwasani langit lan bumi: “Aja ngrungokké tembungé para nabi sing nubuat marang kowé! Wong-wong kuwi mung ngekèki pengarep-arep kosong marang kowé, lan mung medaraké wahyu akal-akalané déwé, tekané ora sangka tutuké GUSTI.

¹⁷Wong kuwi pada omong marang wong sing pada ora ngajèni pituturé GUSTI: Kowé bakal pada slamet! lan marang saben wong mbeguguk nuruti karepé atiné, omongané mengkéné: Kowé ora bakal nemu tyilaka!”

¹⁸Awit sapa ta sing nyeksèni rembukané GUSTI, nganti bisa nggatèkké lan krungu tembungé? Sapa nggatèkké lan ngrungokké kuwi?

¹⁹Maraa delengen, angin lésusé GUSTI, ya kuwi panasé bebendu-Né, wis metu nyamber-nyamber, angin lésus lan tiba nyerang sirahé para wong duraka.

²⁰Bebenduné GUSTI ora bakal mandek, nganti Panjenengané wis nindakké lan mujutké apa sing wis dirantyam ing ati-Né; ing dina pungkasan kowé bakal ngerti perkara kuwi tenan!

²¹“Aku ora ngutus para nabi kuwi, nanging pada mempeng, Aku ora ngekèki tembungé marang para wong kuwi, nanging pada nubuat.

²²Sak umpama pada nunggoni enggon-Ku rembukan, mesti pada ngomongké tembung-Ku marang para umat-Ku, lan pada ngajak bali umat-Ku sangka tindak-tanduké sing ala lan penggawéné sing dursila.

²³Aku apa ora duduk Gusti Allah sing mung ing tyedakan, nanging ing kadohan uga. Mengkono tembungé GUSTI.

²⁴Yèn ana wong sing ndelik ing pandelikan, apa Aku ora weruh? Mengkono tembungé GUSTI. Apa duduk Aku sing ngebeki langit lan bumi? Mengkono tembungé GUSTI.

²⁵Aku wis krungu apa sing diomongké para nabi, sing nubuat goroh kanggo asma-Ku, karo ngandarké: Aku wis ngimpi, aku wis olèh impèn!

²⁶Nganti sak pira suwéné bab kuwi ing batiné para nabi, sing ngapus lan nggelarké sangka otak-atiké déwé,

²⁷sing ngrantyam supaya umat-Ku pada lali marang Aku karo impèn-impèn, sing diomongké nabi siji marang sijiné, pada kaya para leluhurmu, sing lali marang asma-Ku awit sangka Baal?

²⁸Sing olèh impèn, bèn ngomongké impèné lan sing nampa tembung-Ku ya bèn tembung-Ku ing sak beneré! Apa gegandèngané damèn karo gandum? Mengkono tembungé GUSTI.

²⁹Tembung-Ku apa ora kaya geni, mengkono tembungé GUSTI lan kaya amer sing ngremuk gunung watu?

³⁰Mulané, Aku bakal nglawan para nabi sing pada nyolong tembung-Ku sangka kantyané. Mengkono tembungé GUSTI.

³¹Sak temené Aku bakal nglawan para nabi sing ngempakké ilaté karo sak wenang-wenang kanggo ngomongké tembungé Gusti Allah. Mengkono tembungé GUSTI.

³²Aku bakal nglawan para nabi, sing nggelarké impèné sing goroh, mengkono tembungé GUSTI; lan sing pada ngomongké kuwi lan nasarké umat-Ku karo enggoné goroh lan umuk. Aku iki ora tau ngutus lan ngongkon marang para wong kuwi. Wong-wong kuwi ora ana gunané babar pisan kanggo bangsa iki. Mengkono tembungé GUSTI.

³³Yèn bangsa iki, ya nabi, ya imam, takon marang kowé: Tembungé apa sing dimomotké karo GUSTI? Terus semaurana mengkéné: Ya kowé kuwi momotané! Mulané kowé bakal Tak buwang sangka negara-Ku, mengkono tembungé GUSTI.

³⁴Nanging nabi utawa imam utawa rayat sing ijik ngomongké bab momotané GUSTI, Aku bakal nibakké balesan marang wong kuwi uga brayaté.

³⁵Sing kudu kok omongaké, siji-sijiné marang kantyané utawa seduluré: Apa semauré GUSTI? Utawa: Apa tembungé GUSTI?

³⁶Nanging bab ‘momotané GUSTI’, aja kok omongké menèh, awit sing dadi momotané saben wong ya kuwi tembungé déwé, awit kowé wis pada ngowahi tembungé Gusti Allah sing urip, GUSTI sing ngwasani langit lan bumi, Gusti Allah kita.

³⁷Kowé ngomonga marang para nabi mengkéné: Kepriyé semauré GUSTI marang kowé utawa: Apa tembungé GUSTI?

³⁸Iki tembungé GUSTI: Nanging kowé ijik tetep ngutyapké bab ‘momotané GUSTI’, sakjané Aku wis ngendek perkara kuwi marang kowé.

³⁹Mulané, Aku bakal nyekel lan mbuwang kowé sangka ngarep-Ku, kowé lan kuta-kutamu sing wis Tak wènèhaké marang kowé lan leluhurmu kuwi.

⁴⁰Aku bakal ngekèki tyatyatan lan kewirangan sing langgeng marang kowé sing ora bakal dilalèkké.”