Read Caribbean Javanese Yérémia 25 Bible Online

Yérémia 25 - Caribbean Javanese bible

Yérémia 25

¹Tembungé sing dipréntahké marang Yérémia bab wong Yéhuda, jamané Yoyakim anaké Yosia, ratu ing Yéhuda wis nyandak patang tauné, ya kuwi waktu ing taun wiwitan jamané Nebukadnésar, ratuné Babèl.

²Tembungé mau diomongké Yérémia marang sak kabèhé wong Yéhuda lan sak kabèhé wong kuta Yérusalèm, mengkéné:

³“Wiwit nalika jamané Yosia anaké Amon, ratu ing Yéhuda wis nyandak telulas tauné tekan ing dina iki, dadi wis olèh telulikur taun enggonku nampa tembungé GUSTI kuwi lan ora mandek-mandek enggonku ngomongi marang kowé, nanging kowé ora gelem ngrungokké.

⁴Mengkono menèh GUSTI tansah ngutus para abdiné, ya kuwi para nabi, nanging kowé pada ora manut lan ora nggatèkké.

⁵Tembungé para nabi mau mengkéné: Pada mratobata sangka pratingkah lan pokal gawému, sing ala; kowé bakal pada tetep manggon ing negara sing dikèkké karo GUSTI marang kowé lan para leluhurmu ing sak lawas-lawasé.

⁶Aja nyembah marang allah liyané, aja kok bektèni lan kok sujuti. Kowé aja nggawé nesuné ati-Ku karo penggawéané tanganmu, supaya Aku nekakké tyilaka marang kowé.

⁷Nanging kowé pada ora manut marang tembung-Ku. Mengkono tembungé GUSTI, nganti nggawé nesuné ati-Ku karo penggawéané tanganmu, njalari kasangsaranmu déwé.

⁸Mulané mengkéné tembungé GUSTI sing ngwasani langit lan bumi: Awit kowé ora ngrungokké tembung-Ku,

⁹Aku bakal nyeluk sak kabèhé para umat sangka negara lor, mengkono tembungé GUSTI lan mréntah marang Nebukadnésar, ratu ing Babèl, abdi-Ku kuwi; Aku bakal nekakké para wong kuwi ngluruk negara kéné, wong-wongé sing pada manggon lan bangsa-bangsa ing sak ubengé, sing pada bakal Tak entèkké, Tak dadèkké sing nggegirisi, dadi tujuané tyatyatan lan dadi ludesan selawasé.

¹⁰Aku bakal nyingkirké swarané kesenengan lan kabungahan, swarané pengantèn lanang lan wadon, swarané gilingan lan pepadangé dimar.

¹¹Sak kabèhé negara iki bakal dadi ambruk lan bera lan bangsa iki bakal dadi batur marang ratu ing Babèl pitung puluh taun suwéné.

¹²Terus sakwisé genep pitung puluh taun, Aku bakal mbales ratu ing Babèl lan bangsa kuwi, uga negarané para wong Kasdim, karo Tak dadèkké panggonané sing bongkor tekan selawasé, awit sangka kesalahané. Mengkono tembungé GUSTI.

¹³Aku bakal nibakké marang negara iki, kabèh sing wis Tak omongké kanggo negara iki, ya kuwi: kabèh sing ketulis ing kitab iki, kaya sing wis dinubuatké karo Yérémia kanggo bangsa iki kabèh.

¹⁴Awit wong kuwi uga bakal pada dadi abdiné bangsa okèh lan para ratu sing gedé lan Aku bakal mulangi para wong kuwi sing tyotyok karo pertingkahé lan penggawéné.”

¹⁵Tembungé GUSTI, Gusti Allahé Israèl marang aku mengkéné: “Tampanana tuwung sing isi anggur panasé bebendu-Ku iki sangka tangan-Ku, terus ombèkna marang sak kabèhé para bangsa sing dadi tujuané enggon-Ku ngutus kowé,

¹⁶supaya kuwi pada ngombéa, nganti senpoyongan lan bingung awit sangka pedang, sing bakal Tak tekakké ing sak tengahé.

¹⁷Aku terus nampani tuwung kuwi sangka tangané GUSTI lan ngombèkké marang para bangsa sing dadi tujuané enggonku diutus karo GUSTI,

¹⁸ya kuwi marang kuta Yérusalèm lan kuta-kutané Yéhuda, uga para ratu lan penggedéné, supaya iki kabèh dadia ambruk, pada garing lan dadi tujuané tyatyatan lan bebendu, kaya sing kelakon ing dina iki;

¹⁹marang Parao, ratu ing negara Egipte uga para pegawéné, para penggedéné lan sak kabèhé bangsané.

²⁰Mengkono uga marang bangsa tyampurané bangsa werna-werna, para ratu ing negara Us; para ratu ing negara Filistèn, ya kuwi ing Askélon, Gaza, Ekron lan para wong turahé ing Asdod;

²¹ing Edom, Moab lan turunané Amon;

²²marang sak kabèhé ratu ing Tirus lan Sidon lan para ratu ing negara pinggirané segara ing sabrangé segara,

²³marang Dédan, Tema, Bus lan sak kabèhé wong sing rambuté dityukur pinggiré mubeng,

²⁴marang sak kabèhé ratu ing negara Arab, sing manggon ing ara-ara samun;

²⁵marang sak kabèhé para ratu ing Simri, ing Elam lan ing Madai;

²⁶marang sak kabèhé ratu sangka negara lor, sing tyedak lan sing adoh, siji-siji, uga marang sak kabèhé kraton ndonya ing sak lumahé bumi, uga ratu ing Sesak bakal ngombé sakwisé wong-wong mau.

²⁷Para wong mau terus pada omongana mengkéné: Tembungé GUSTI sing ngwasani langit lan bumi, Gusti Allahé Israèl mengkéné: Kowé pada ngombéa nganti mendem lan muntah-muntah. Pada ambruka, aja nganti tangi menèh! Awit sangka pedang sing bakal Tak tekakké ing tengahmu!

²⁸Nanging yèn pada ora gelem nampani tuwung kuwi sangka tanganmu supaya diombé, terus kowé omongana mengkéné: Pituturé GUSTI sing ngwasani langit lan bumi mengkéné: Kowé kudu ngombé!

²⁹Awit kuta sing nyebut asma-Ku kuwi, bakal wiwit Tak tibani bebendu; apa kowé bisa utyul sangka paukuman? Kowé pada ora bakal bisa utyul sangka paukuman, awit Aku wis ngatyungké pedang marang kabèh wong sak lumahé bumi. Mengkono tembungé GUSTI sing ngwasani langit lan bumi.

³⁰Kabèh tembungé kuwi gelarna marang para wong kuwi lan diomongi mengkéné: GUSTI bakal nggetak sangka nduwur lan mbengokké swara-Né sangka griya-Né sing sutyi; Panjenengané bakal ngumbar swara-Né marang pangonan-Né, bakal mbengok kaya bengokané para tukang ngiles anggur, sing tumuju marang wong sak isiné bumi.

³¹Gembruduké perang bakal tekan ing pojokané bumi, awit GUSTI nduwé perkara karo para bangsa; Panjenengané gelem nggawé perkara karo kabèh para sing urip; wong duraka bakal pada dipasrahké marang pedang. Mengkono tembungé GUSTI.

³²Mengkéné tembungé GUSTI sing ngwasani langit lan bumi: bebendu bakal nular-nular sangka bangsa siji marang bangsa sijiné, lésus gedé bakal ngamuk sangka pojokané bumi.

³³Ing dina kuwi terus bakal okèh wong mati glimpangan, sing dipatèni karo GUSTI, sangka pojokané bumi tekan pojokané bumi. Bakal pada ora ditangisi, ora diklumpukké lan dipendem, bakal pada dadi rabuk ing kebon.

³⁴Hé para pangon, pada sambata lan njerit-njerita! Hé para pemimpiné wedus kumpulan, pada gulung-gulunga ing lebu! Awit wis tekan ing wantyiné enggonmu bakal pada dibelèh lan kowé bakal pada tiba kaya wedus lanang pilihan.

³⁵Kanggo para pangon bakal ora ana keslametan menèh, lan kanggo penuntuné kumpulané wedus-wedusé wis ora ana dalan bisané utyul.

³⁶Rungokna! Para pangon pada sambat-sambat, para pemimpiné kumpulané wedus-wedusé pada ngaduh-aduh! Awit GUSTI wis ngrusak pangonané.

³⁷Pangonané sing tentrem dadi sepi mamring, awit sangka mulat-mulaté bebenduné GUSTI.

³⁸Panjenengané wis ninggalké kaya singa sing ninggal grumbul delikané, awit negarané wis dadi bera, jalaran sangka pedang sing medèni lan bebenduné GUSTI sing mulat-mulat.”