Read Caribbean Javanese Yérémia 33 Bible Online

Yérémia 33 - Caribbean Javanese bible

Yérémia 33

¹Tembungé GUSTI marang Yérémia sing kaping pindoné, waktu ijik diukum ing lataré penjagan, mengkéné:

²“Mengkéné tembungé GUSTI, sing nggawé bumi karo mbangun lan jejekké, GUSTI kuwi asmané:

³Sambata marang Aku, Aku mesti bakal nyauri marang kowé lan Aku bakal ngekèki weruh marang kowé, perkara-perkara sing gedé lan sing ketutup, ya kuwi bab sing kowé durung weruh.

⁴Awit, mengkono tembungé GUSTI, Gusti Allahé Israèl, kanggo omah-omah ing kuta iki lan gedong-gedongé kratoné ratu ing Yéhuda sing dibubrah kanggo ngadepi témbok-témboké kepungané mungsuh lan pedang:

⁵Wong bakal maju perang nglawan wong Kasdim lan kuta iki bakal kebak layoné manungsa sing wis Tak patèni awit sangka nesu-Ku lan mulat-mulat bebendu-Ku, awit Aku wis ndelikké praupan-Ku sangka kuta iki, awit sangka kabèh penggawé alané.

⁶Hé, Aku bakal nukulaké kewarasan lan keséhatan lan Aku bakal maraské wong kuwi lan ngekèki keslametan lan katentreman nganti lubèr-lubèr.

⁷Aku bakal mulihké kahanané Yéhuda lan Israèl lan bakal Tak bangun menèh kaya mbiyèn.

⁸Aku bakal nyutyèkké para wong kuwi sangka sak kabèhé kesalahané sing digawé, enggoné nindakké dosa ing ngarep-Ku lan Aku bakal ngapura kabèh kesalahan sing digawé enggoné nindakké dosa lan enggoné nglawan marang Aku.

⁹Lan kuta iki bakal dadi pokoké kabungahan, kesuwur lan dadi elem-eleman lan diajèni kanggo Aku, ing ngarepé sak kabèhé bangsa ing bumi; sing wis pada krungu bab kabèh katrésnan sing Tak sokké kanggo bangsa iki; para bangsa bakal pada kagèt lan gemeter, awit sangka kabèh katrésnan lan katentreman sing Tak sokké marang bangsa kuwi.

¹⁰Mengkéné tembungé GUSTI: Ing panggonan kéné, sing kok arani wis dadi ambruk, ora dipanggoni manungsa lan kéwan, ing kuta-kutané Yéhuda lan ing dalan-dalané Yérusalèm, sing sepi mamring kuwi, lan ora ana wong sing ngenggoni lan ora ana kéwan-kéwan,

¹¹bakal krungu menèh swarané kabungahan lan pada bungah, swarané pengantèn lanang lan wadon, swarané wong sing pada ngutyapké: Masrahna pamuji maturkesuwun marang GUSTI, sing ngwasani langit lan bumi, awit GUSTI kuwi kebak katrésnan, katrésnan-Né kuwi langgeng tekan selawasé!, karo masrahaké kurban maturkesuwun ing griyané GUSTI. Awit Aku bakal mulihké kahanané negara iki kaya ing mbiyèn. Mengkono tembungé GUSTI.

¹²Tembungé GUSTI sing ngwasani langit lan bumi, mengkéné: Ing panggonané kéné, sing wis dadi jugrukan, ora dipanggoni manungsa lan kéwan lan kabèh kutané, bakal ana pangonan menèh kanggo para pangon, sing nglumpukké wedus-wedusé a ing kono.

¹³Ing kuta-kuta Pegunungan, ing kuta-kuta Panggonané Pegunungan, ing kuta-kuta tanah Negeb, ing panggonané Bényamin, ing sak ubengé Yérusalèm lan ing kuta-kutané Yéhuda, wedus-wedusé bakal liwat menèh ing sak ngisoré tangané sing ngitung. Mengkono tembungé GUSTI.”

¹⁴“Tembungé GUSTI mengkéné: Sak temené, bakal tekan waktuné enggon-Ku bakal netepi perjanjian, sing Tak wènèhaké marang turunané Israèl lan Yéhuda.

¹⁵Ing waktu kuwi Aku bakal ngetokké Trubusané keadilan kanggo Daved, sing bakal nindakké keadilan lan kabeneran ing negara.

¹⁶Ing waktu kuwi Yéhuda bakal diluwari lan Yérusalèm uripé bakal tentrem. Lan karo jeneng iki, dèkné bakal disebut: GUSTI kuwi keadilan kita.

¹⁷Awit tembungé GUSTI mengkéné: Tyedak turunané Daved bakal ora pedot-pedot nglungguhi damparé kratoné bangsa Israèl!

¹⁸Lan tyedak turunané para imam bangsa Lèwi uga ora mandek-mandek masrahaké kurban obongan lan kurban panganan, uga kurban sing dibelèh ing sak uruté jaman, ing ngarep-Ku.”

¹⁹Tembungé GUSTI marang Yérémia, mengkéné:

²⁰“Tembungé GUSTI mengkéné: Yèn kowé bisa mbubrah perjanjian-Ku karo awan lan wengi, nganti awan lan wengi ora netepi ing waktuné,

²¹ing kono perjanjian-Ku marang abdi-Ku Daved uga bisa dibubrah, nganti ora nduwé turunan menèh sing nglungguhi damparé kratoné, mengkono uga perjanjian-Ku karo bangsa Lèwi, ya kuwi para imam sing dadi peladèn-Ku.

²²Kaya suradadu ing langit sing tanpa itungan tyatyahé lan kaya wediné segara sing ora kena ditaker, ya kaya mengkono uga enggon-Ku nangkar-nangkaraké tyedak turunané Daved lan para wong Lèwi, sing ngladèni Aku.”

²³Tembungé GUSTI marang Yérémia, mengkéné:

²⁴“Apa sing diutyapké para wong kuwi ora kok gatèkké: Turunan rong brayat, sing dipilih karo GUSTI kuwi wis ditampik karo Panjenengané? Karo tyara mengkono wong kuwi pada ngrèmèhké umat-Ku, awit kuwi ora dianggep dadi bangsa menèh.

²⁵Tembungé GUSTI mengkéné: Yèn Aku ora netepi perjanjian-Ku karo awan lan wengi, uga tatanané langit lan bumi,

²⁶ing kono Aku mesti uga bakal nampik tyedak turunané Yakub lan abdi-Ku Daved, nganti mandek enggon-Ku ngangkat sangka tyedak turunané, ngwasani marang tyedak turunané Abraham, Isak lan Yakub. Awit Aku bakal mulihké kahanané para wong kuwi lan kuwi bakal pada Tak welasi.”