Read Caribbean Javanese Yérémia 36 Bible Online

Yérémia 36 - Caribbean Javanese bible

Yérémia 36

¹Waktu ing taun kaping papat pepréntahané Yoyakim anaké Yosia, GUSTI ngekèki tembungé marang Yérémia mengkéné:

²“Njupuka layang gulungan lan tulisen ing kono kabèh tembung sing Tak omongké marang kowé kanggo Israèl, Yéhuda lan kabèh bangsa, wiwit waktu Aku nggelar tembung marang kowé, ya kuwi wiwit jamané Yosia, nganti sepréné.

³Yèn turunané Yéhuda krungu bab sak okèhé tyilaka, sing Tak rantyam bakal Tak tibakké marang wong-wong kuwi, menawa déwé-déwé bakal mratobat sangka pertingkahé sing ala, nganti Aku ngapura kesalahan lan dosané.”

⁴Dadiné Yérémia terus ngundang Baruk anaké Neria, Baruk terus nulisi ing layang gulungan sangka tutuké Yérémia kabèh tembung, sing dipréntahké karo GUSTI.

⁵Ing sakwijiné dina Yérémia ngongkon marang Baruk mengkéné: “Aku iki ijik kena alangan ora bisa munggah menyang griyané GUSTI.

⁶Dadiné ing dina pasa kowé waé sing matyakké tembungé GUSTI sangka gulungan sing kok tulis sangka tutukku kuwi marang wong okèh ing griyané GUSTI; kuwi watyakna uga marang sak kabèhé wong Yéhuda sing teka sangka kuta-kutané.

⁷Menawa sambaté tekan ing ngarepé GUSTI, terus saben wong pada mratobat sangka pertingkahé sing ala kuwi, awit gedé bebenduné lan mulat-mulat nesu sing dienggo ngantyam karo GUSTI marang bangsa iki.”

⁸Baruk anaké Neria nindakké tyotyok kaya sing dipréntahké Yérémia, ya kuwi matyakké tembungé GUSTI sangka kitab kuwi ing griyané GUSTI.

⁹Nanging waktu ing taun sing kaping lima pepréntahané Yoyakim anaké Yosia, ratu ing Yéhuda, ing sasi kaping sanga, dikabarké pasa ing ngarepé GUSTI kanggo kabèh wong Yérusalèm lan rayat kabèh sing teka ing Yérusalèm sangka kuta-kuta Yéhuda.

¹⁰Baruk terus matyakké tembungé Yérémia sangka kitab kuwi marang rayat kabèh ing griyané GUSTI, ing kamaré Gemarya, anaké sèkretarisé Safan, ing plataran nduwuré, ing ngarepé gapurané griyané GUSTI sing anyar.

¹¹Bareng Mikaya, anaké Gemarya, anaké Safan krungu kabèh tembungé sangka kitab mau,

¹²terus medun menyang kratoné ratu menyang ing kamaré sèkretarisé. Ing kono kétok kabèh penggedéné pada njagong ya kuwi: juru tulis Elisama, Delaya, anaké Semaya, Elnatan, anaké Akbor, Gemarya, anaké Safan, Sedèkia, anaké Hananya lan kabèh penggedéné liyané.

¹³Mikaya terus ngomongi marang para penggedéné mau kabèh tembungé sing dirungokké, waktu Baruk matyakké kitab kuwi marang wong okèh.

¹⁴Para penggedéné mau terus ngongkon marang Yéhudi, anaké Netanya, anaké Selemya, anaké Kusi supaya ngomong marang Baruk: “Gulungan sing mentas kok watyakké marang wong okèh kuwi gawanen lan mrénéa!”

¹⁵Baruk terus mara karo nggawa gulungan mau. Préntahé para penggedéné: “Lungguha lan kuwi watyakna marang kita!”

¹⁶Bareng para penggedéné krungu tembungé kuwi kabèh, banget kagèté lan terus pada rerasanan: “Kita kudu gelis-gelis masrahké kabèh tembungé kuwi marang ratu!”

¹⁷Terus pada takon marang Baruk, tembungé: “Ngomonga marang kita, kepriyé tyarané enggonmu nulis kabèh tembungé iki!”

¹⁸Semauré Baruk marang wong-wong kuwi: “Kabèh tembungé kuwi kula nampa sangka tutuké Yérémia, terus kula tulisi nganggo mangsi ing kitab.”

¹⁹Para penggedéné terus ngomong marang Baruk: “Lungaa lan ndelika bareng karo Yérémia! Aja nganti ana wong sing ngerti panggonanmu!”

²⁰Para penggedéné mau terus pada nemoni ratuné ing plataran, sakwisé gulungan mau disinggahké ing kamaré juru tulis Elisama. Terus masrahaké tembungé kuwi kabèh marang ratuné.

²¹Ratu terus ngongkon marang Yéhudi njupuk layang gulungan mau sangka kamaré juru tulis Elisama. Yéhudi terus matyakké kitab kuwi marang ratuné lan kabèh penggedéné ngadek ing sandingé ratuné.

²²Waktu kuwi nalika sasi kaping sanga lan ratu ijik njagong ing balé ing waktu adem; rodok adoh nang ngarepé ratuné ana geni prapèn murup.

²³Saben-saben Yéhudi rampung sing matya olèh telu utawa patang katya, ratu ngetok-ngetoki layang kuwi karo pésoné sèkretarisé, terus kebuwang ing prapèn, nganti layang gulungan kuwi entèk diobong ing prapèn mau.

²⁴Ratu uga para pegawéné sing pada krungu tembungé kuwi ora ana sing kagèt utawa nyuwèk-nyuwèk sandangané.

²⁵Senajan Elnatan, Delaya lan Gemarya wis pada ngomongi supaya aja ngobong layang gulungan kuwi, nanging ratuné ora rungokké marang tembungé.

²⁶Ratu malah ngongkon marang Yerakméél, Seruya, anaké Asriel lan Selemya, anaké Abdèèl supaya nyekel juru tulis Baruk lan Yérémia, nanging GUSTI ndelikké wong loro kuwi.

²⁷Sakwisé ratu ngobong gulungan sing ngemot tembung sing ditulis karo Baruk sangka tutuké Yérémia, GUSTI ngekèki tembungé marang Yérémia mengkéné:

²⁸“Njupuka gulungan liyané tulisana kabèh tembung, ing gulungan sing ndisik lan sing wis diobong karo Yoyakim, ratu ing Yéhuda kaé.

²⁹Kanggo Yoyakim, ratu ing Yéhuda kuwi kowé omongana mengkéné: Mengkéné tembungé GUSTI: Kowé wis ngobong gulungan kuwi lan ngomong: Kenèng apa kowé nulis ing kono, yèn ratu ing Babèl mesti bakal teka ngentèkké negara kéné lan ngentèkké manungsa lan kéwan ing kono?

³⁰Awit sangka kuwi mengkéné tembungé Yoyakim ratu ing Yéhuda: Dèwèké ora bakal nduwé turunan sing nglungguhi damparé Daved lan layoné bakal keguwak, nganti kepanasan ing wayah awan lan kademen ing wayah mbengi.

³¹Aku bakal ngukum dèwèké, tyedak turunané lan para abdiné awit sangka kesalahané; Aku bakal nekakké marang wong-wong kuwi, marang sak kabèhé wong sing manggon ing Yérusalèm lan marang wong Yéhuda kabèh tyilaka sing wis Tak kanggokké ngantyam wong kuwi kabèh, nanging tembung-Ku ora dirungokké.”

³²Yérémia terus njupuk gulungan liyané lan dikèkké marang juru tulisé Baruk, anaké Neria, sing nulisi sembarang sing ditampa sangka tutuké Yérémia kabèh tembungé sing ketulis ing layang sing wis diobong karo Yoyakim, ratu ing Yéhuda kuwi. Apa menèh ijik ditambahi tembungé okèh tunggalé kuwi.