Read Caribbean Javanese Yérémia 46 Bible Online

Yérémia 46 - Caribbean Javanese bible

Yérémia 46

¹Tembungé GUSTI marang Yérémia kanggo para bangsa.

²Kanggo Egipte. Kanggo para suradaduné Parao Neko, ratu ing Egipte, sing ngedekké tarup ing pinggir kali Efrat, ing sak tyedaké Karkemis lan sing dikalahké karo Nebukadnésar, ratu ing Babèl, waktu ing taun sing kaping papat pepréntahané Yoyakim, anaké Yosia, ratu ing Yéhuda:

³“Tyepakna tamèng gedé lan tamèng tyilik lan majua perang!

⁴Hé para suradadu numpak jaran, jaranmu tlapakana lan tunggangana! Nataa ing panggonanmu karo nganggo topi waja, landepana tumbakmu, nganggoa klambi wesi!

⁵Kenèng apa sing Tak sawang pada wedi lan pada mundur? Penggedéné pada kalah, mblayu nasar-nasar, tanpa nolah-nolèh, rasa wedi sangka kéblat papat!, - mengkono tembungé GUSTI—.

⁶Wong sing èntèng sikilé ora bisa mlayu, pahlawan ora bisa utyul, ing sisih lor ing pinggir kali Efrat pada kejengklok lan ambruk.

⁷Sapa ta sing mbludak kaya kali Nil lan sing banyuné molak-malik kaya kali?

⁸Ya kuwi Egipte sing mbludak kaya kali Nil, lan banyuné molak-malik kaya kali. Sumbara: Aku arep nglubèri lan nutupi bumi ngentèkké kuta sak isiné.

⁹Hé jaran, pada majua! Hé kréta perang, pada mbalapa! Hé para pahlawan majua perang! Hé kowé wong Etiopia lan wong Libia sing nggawa tamèng lan wong Lidiya sing mentèng gendéwa!

¹⁰Iki dinané GUSTI sing ngwasani langit lan bumi, dina tibané balesan marang para mungsuhé. Pedang bakal mangan nganti warek, lan nyedot getihé nganti marem. Awit GUSTI sing ngwasani langit lan bumi nganakké kurban sing dibelèh ing negara lor ing sak tyedaké kali Efrat.

¹¹Hé prawan wadon Egipte!, menyanga ing Giléad njupuk balsem! Ora ana gunané enggonmu nggolèk tamba okèh, kowé ora bakal bisa waras!

¹²Para bangsa wis pada krungu kanggo tyirimu, bumi wis kebak sambatmu, awit para pahlawan pada tunjang-tunjangan, loro-loroné bareng ambruk.”

¹³Tembungé GUSTI marang Yérémia, bab tekané Nebukadnésar, ratu Babèl, arep menangké negara Egipte:

¹⁴“Kabarna ing Egipte, lan omongna ing Migdol! Omongna ing Mèmfis lan ing Tapanhes! Tuturana: Njukuka panggonanmu lan tata-tataa, awit ing sak kiwa-tengenmu wis resik, dipangan karo pedang!

¹⁵Kenèng apa Apis mblayu sapimu lanang apa ora kuwat ngadepi? Tenan, GUSTI wis menangké dèwèké!

¹⁶Sangka tengahmu okèh sing kejengklok lan ambruk, sing siji omong marang sijiné: Hayuk pada mulih menyang bangsa kita, negara kelairan kita, perlu ngéndani pedang sing ngamuk iki!

¹⁷Nyebuta jenengé Parao, ratu ing Egipte: Tukang ramé sing ora nggunakké waktu sing betyik.

¹⁸Kanggo Aku sing urip, mengkono tembungé Ratu sing asmané GUSTI sing ngwasani langit lan bumi, tekané bakal kaya waé gunung Tabor sing metongol duwur ing antarané gunung-gunung liyané, kaya gunung Karmèl ing pinggir segara.

¹⁹Hé anak wadon Egipte sing wis suwé manggonmu nyepakna samubarang sing kanggo mlakumu menyang ing pembuwangan. Awit Mèmfis bakal dadi sepi mamring, didadèkké ambruk sing ora dienggoni menèh.

²⁰Egipte kuwi pedèt sing bregas, nanging ana laler siji sing nekani sangka lor.

²¹Uga suradadu bayaran ing kono, kuwi kaya pedèt-pedèt sing lemu, pada minger lan mlayu bebarengan, pada ora bisa ngadepi, awit dinané tyilaka nyerang marang wong-wong kuwi, ya kuwi waktu tibané paukumané.

²²Swarané kaya ula sing ngeses, yèn pada maju karo suradadu; pada nyerang marang dèwèké karo nggawa kampak kaya para blandong.

²³Wong kuwi pada negori alasé, - mengkono tembungé GUSTI, - senajan ora kena dileboni: awit luwih okèh tenimbang walang, tanpa itungan tyatyahé.

²⁴Anak wadon Egipte dadi kewirangan dipasrahké marang ing tangané bangsa sangka elor.”

²⁵Tembungé GUSTI sing ngwasani langit lan bumi, Gusti Allahé Israèl: “Aku nekakké paukuman marang retya Amon sangka Tebe, marang Parao uga negara Egipte, para déwané lan para ratuné, ya kuwi marang Parao uga para wong sing pertyaya marang dèwèké.

²⁶Aku bakal ngekèkké wong-wong kuwi ing tangané wong sing ngarah marang nyawané, ya kuwi ing tangané Nebukadnésar, ratu Babèl lan para pegawéné. Nanging sakwisé kuwi, negara kuwi bakal dienggoni kaya dèk jaman mbiyèn, - mengkono tembungé GUSTI—.

²⁷Nanging kowé, hé abdi-Ku Yakub, aja wedi, hé Israèl, aja wedi! Awit, Aku mitulungi kowé sangka panggonan sing adoh, lan turunanmu sangka negara pembuwangané. Yakub bakal bali mulih lan urip ayem lan tentrem, tanpa ana sing nggawé wedi.

²⁸Nanging kowé, hé abdi-Ku Yakub, aja wedi, - mengkono tembungé GUSTI—, awit Aku nuntun kowé, kabèh bangsa ing negara, panggonan enggon-Ku mbuyarké kowé, kuwi bakal Tak entèkké, nanging kowé kuwi ora bakal Tak entèkké, Aku bakal nyabeti kowé miturut angger-angger, nanging Aku babar pisan ora nganggep kowé tanpa kesalahan.”