Read Caribbean Javanese Yérémia 48 Bible Online

Yérémia 48 - Caribbean Javanese bible

Yérémia 48

¹Kanggo Moab. Mengkéné tembungé GUSTI sing ngwasani langit lan bumi, Gusti Allahé Israèl: “Tyilaka Nébo, awit kuta kuwi wis dirusak! Kiryataim wis kewirangan lan wis direbut! Kuta sing dipageri watu kuwi kewirangan lan wedi!

²Kamulyané Moab wis entèk! Ing Hèsbon wong ngrantyam tyilaka kanggo kuta kuwi: Hayuk pada dientèkké bangsa kuwi! Hé Madmen, uga kowé bakal dibingkem, kowé bakal diuyak-uyak karo pedang.

³Rungokna! Sambat sangka Horonaim: Karusakan! Gempuran gedé!

⁴Moab wis digempuri nganti lebur, sambaté wong krungu nganti tekan Soar.

⁵Lah, wong pada munggah ing unggah-unggahan Luhit karo nangis. Lah, ing dalan medun menyang Horonaim, krungu sambat awit kena sangsara.

⁶Mblayua, slametna nyawamu; dadia kaya rerungkutan alas ing ara-ara samun!

⁷Lah, awit kowé pertyaya bèntèngmu, lan kesugihanmu, kowé uga bakal direbut. Kamos bakal menyang pembuwangan, bareng karo para imam lan penggedéné.

⁸Tukang pengrusak bakal nekani saben kuta, ora ana kuta sing bisa utyul! Legokan bakal dirusak, negara daratan entèk babar pisan, kaya sing dadi tembungé GUSTI.

⁹Moab wènèhana swiwi, supaya bisa lunga mabur; kuta-kutané bakal dadi sepi mamring, ora ana wong sing manggon ing kono menèh.

¹⁰Kenaa ing bebendu wong sing nindakké kerjanané GUSTI karo sembrana, lan kenaa ing bebendu wong sing menggak pedangé enggoné ngutahké getih!

¹¹Moab uripé tentrem wiwit nom-nomané, uripé ayem kaya anggur ing nduwuré endek-endekané, ora sangka wadah sing siji marang sijiné, ora tau klebu ing pembuwangan, mulané rasané ora malih lan ambuné ora owah.

¹²Mulané, bakal tekan ing wantyiné, - mengkono tembungé GUSTI, - Aku bakal ngutus para tukang sing bakal ngiling nyuntaki wadah-wadahé lan ngremuk gutyi-gutyiné.

¹³Nanging Moab bakal kewirangan awit sangka déwa Kamos, pada kaya turunané Israèl enggoné kewirangan awit sangka Bétel, sing dadi pengandelé.

¹⁴Kepriyé nanging kowé wani ngomong: Kita iki pahlawan, wong sing gagah rosa-rosa kanggo perang?

¹⁵Tukang pengrusak wis nyerang negara Moab uga kuta-kutané, para nom-noman pilihan wis pada menyang pembelèhan, mengkono tembungé Ratu, sing asmané GUSTI sing ngwasani langit lan bumi.

¹⁶Patiné Moab wis arep teka, kasangsarané gelis bakal nekani.

¹⁷Hé wong ing sak ubengé, pada nangisana, hé wong sing pada weruh jenengé! Omongna: tengeré pangwasané, tekené kamulyan wis putung!

¹⁸Hé anak wadon Dibon sing wis suwé manggon ing kono, meduna sangka kaluhuranmu lan lungguha ing tlétongan! Awit tukang pengrusak Moab wis maju nyerang kowé, lan ngentèkké panggonan-panggonanmu sing ana témboké.

¹⁹Hé para wong Aroèr, ngentènana ing pinggir dalan lan ngungaka! Takona marang sing pada mblayu lan bisa utyul, takona, apa sing wis kelakon!

²⁰Moab wis kewirangan, awit wedi. Nangisa lan sambata, kabarna ing kali Arnon: Tenan, negara Moab wis rusak!

²¹Negara daratan rata sing duwur wis pada ditibani paukuman, uga kuta-kutané: Holon, Yahas, Mefaat,

²²Dibon, Nébo, Bèt-Diblataim,

²³Kiryataim, Bèt-Gamul, Bèt-Méon, Kériot, Bosra

²⁴lan kabèh kuta-kuta ing negara Moab sing adoh lan sing tyedak.

²⁵Sungu kekuwatané Moab wis tugel, lan bau pangwasané wis semplak! Mengkono tembungé GUSTI.

²⁶Gawénen mendem,, awit nyombongké awaké déwé ing ngarepé GUSTI. Moab bakal glimpangan ing utah-utahané lan dèwèké déwé uga bakal dadi guyonané wong.

²⁷Apa mbiyèn duduk Israèl sing dadi guyonan? Apa dèwèké ing sak tengahé para maling, nganti kowé gèdèk-gèdèk, saben kowé ngomongké dèwèké?

²⁸Hé wong Moab, tinggalen kuta-kutamu lan manggona ing gunung watu! Dadia kaya manuk dara sing nusuh ing bolongané guwa.

²⁹Aku wis pada krungu bab gemunggungé Moab, - banget enggoné gemunggung, - bab angkuhé, gemunggungé lan kemlèlèté, lan gemedéné atiné!

³⁰Aku wis weruh kementusé, - mengkono tembungé GUSTI, - ora bener tembungé, ora apik pertingkahé.

³¹Mulané aku arep nangisi Moab, arep sambat awit sangka Moab kabèh lan ngaduh-aduh awit sangka wong Kir-Heres!

³²Aku bakal nangisi kowé, ngungkuli enggonku nangisi Yaéser hé wit anggur Sibma! Gagang-gagangé mrambat tekan ing segara, nggedabyah tekan ing Yaéser. Si tukang ngrusak wis ambruk nibani panènanmu waktu ketiga lan olèh-olèhé anggurmu.

³³Seneng-seneng lan bungah-bungah wis entèk, sangka kebon woh-wohan lan sangka negara Moab. Aku wis ngedohké anggur sangka tanduran, tukang ngiles wis ora ana sing ngiles, suraké kabungahan wis ora krungu menèh.

³⁴Hèsbon lan Eléalé gembar-gembor, wong pada ngumbar swarané nganti tekan Yahas, sangka Soar tekan Horonaim lan Eglat-Selisia, awit banyuné kali Nimrin uga wis asat.

³⁵Tembungé GUSTI: Aku bakal mbubarké wong Moab enggoné ngekèki kurban obongan ing puntuk pangurbanan lan ngabekti marang allahé.

³⁶Awit sangka kuwi kaya Aku trenyuh krungu swarané sulingan, mengkono uga ati-Ku trenyuh weruh kahanané Moab lan kahanané para wong Kir-Heres; kabèh bandané sing ditumpuk-tumpuk apa ora wis ilang kabèh?

³⁷Lah, saben sirah lan saben jénggoté dityukur, kabèh tangan ana blarètané lan pada nganggo sandangan kasusahan ing wetengé.

³⁸Ing payon-payoné omah ing Moab lan ing lemah-lemahé sing rata mung ana kasusahan tok; —lah, Aku wis ngantem Moab kaya wadah beling, nganti ora ana wong sing seneng marang kuwi, - mengkono tembungé GUSTI.

³⁹Tenan kagèté Moab! Tenan wirangé Moab, nganti ndelikké praupané! Moab wis dadi guyonan lan rasa wedi kanggo wong sak ubengé kabèh.

⁴⁰Awit - mengkéné tembungé GUSTI: - Lah, tekané ngléyang kaya manuk garuda, lan megarké swiwiné ing sak nduwuré tanah Moab.

⁴¹Kuta-kuta pada dibedah, bèntèng-bèntèng watu digempuri, atiné para penggedéné Moab ing waktu semono kaya atiné wong wadon sing arep mbayi.

⁴²Moab bakal mandek enggoné dadi bangsa, awit nyombongké urip ing ngarepé GUSTI.

⁴³Hé wong isiné negara Moab, rasa wedi, juglangan lan jiret dadi pandumanmu; - mengkono tembungé GUSTI. -

⁴⁴Sing mblayu awit sangka rasa wedi bakal kejegur ing juglangan, sing krèngkèlan sangka juglangan kena karo jiret. Lah, Aku nekakké iki kabèh marang Moab, ing taun tibané paukumané, - mengkono tembungé GUSTI. -

⁴⁵Ing pangayomané Hèsbon, para wong sing mblayu pada mandek, entèk kekuwatané, nanging terus ana geni sing metu sangka Hèsbon, urupé geni sangka kratoné Sihon, sing mangan pilingané wong Moab lan sirahé para wong sing nggawé ramé.

⁴⁶Tyilaka kowé, hé Moab!, kowé bakal entèk, hé bangsa sing nyembah marang déwa Kamos. Awit anak-anakmu lanang wis pada dityolong dadi bandangan lan anak-anakmu wadon dadi tawanan.

⁴⁷Nanging mbésuk Aku bakal mulihké kahanané Moab. Mengkono tembungé GUSTI.” Tekan seméné tembungé bab paukuman kanggo Moab.