Read Caribbean Javanese Yérémia 49 Bible Online

Yérémia 49 - Caribbean Javanese bible

Yérémia 49

¹Kanggo turunané Amon. Mengkéné tembungé GUSTI: “Apa ora ana turunané Israèl, apa ora ana tyedak turunané? Kena apa déwa Molok nduwèni Gad, lan bangsané ngenggoni kuta-kutané?

²Mulané, bakal tekan ing wantyiné - mengkono tembungé GUSTI, - Aku bakal nggawé anané surak raméné peperangan, nglawan Raba kutané turunané Amon. Kuta kuwi bakal dadi puntuk sing garing, lan kuta-kuta pangwasané bakal pada diobongi, nanging Israèl bakal ngebeki wong-wong sing mbiyèn nduwèni kuwi - mengkono tembungé GUSTI. -

³Hé Hèsbon, nangisa, awit pengrusak wis maju nyerang, hé para anak wadon ing Raba, nganggoa sandangan kasusahan, nelangsaa, ngubengana kuta karo tatuné blèrèkan, awit Molok bakal diukum menyang ing pembuwangan bareng karo para imam lan para penggedéné.

⁴Hé anak wadon sing gemunggung, kowé kok ngegung-ngegungké legok-legokanmu lan pertyaya bandamu lan ngomong: Sapa sing wani teka nyerang aku?

⁵Lah, Aku nekakké rasa wedi marang kowé, mengkono tembungé GUSTI sing ngwasani langit lan bumi, sangka kabèh panggonan ing sak kiwa-tengenmu nganti kowé pada pating jlerit mlayu miturut parané déwé-déwé, lan ora ana sing nglumpukké para wong sing pating plentyar kuwi.

⁶Nanging sakwisé mengkono Aku bakal mulihké kahanané turunané Amon kuwi. Mengkono tembungé GUSTI.”

⁷Kanggo Edom. Mengkéné tembungé GUSTI sing ngwasani langit lan bumi: “Apa wis ora ana kawityaksanan ing Téman? Apiké para wong pinter karo pikiran apa wis ilang? Kawityaksanané apa wis ilang?

⁸Hé wong kuta Dédan, mblayua gelis, ndelika ing guwa-guwa! Awit Aku bakal nekakké tyilaka marang Esau ing waktu Aku ngukum dèwèké.

⁹Yèn tukang ngunduhi anggur nekani kowé, bakal ora ngèrèkké turahané unduh-unduhané? Yèn ana maling ing wayah mbengi nekani kowé, apa ora bakal ngrusak sak senengé?

¹⁰Nanging Aku wis ngrampasi barangé Esau, blak-blakan nduduhké panggonané pandelikané nganti ora bisa ndelik menèh. Turunané wis entèk, nanging seduluré uga tangga-tangga bangsané wis ora ana menèh.

¹¹Tinggalen anak-anakmu sing lola, bakal Tak uripi, bèn randa-randamu pertyaya marang Aku!”

¹²Awit mengkéné tembungé GUSTI: “Senajan para wong sing ora pantes ngombé isiné tuwung kuwi, kepeksa wis ngombé, apa ya kowé bakal luwar sangka paukuman? Kowé ora bakal luwar sangka paukuman, nanging mesti ngombé!

¹³Awit Aku wis sumpah, kanggo Aku déwé, - mengkono tembungé GUSTI—, Bosra bakal dadi garing, tyiri, ambruk lan bebendu lan sak kabèhé kutané bakal dadi ambruk sing langgeng!”

¹⁴Aku wis krungu kabar sangka GUSTI, sakwijiné kongkonan wis dikongkon menyang ing sak tengahé para bangsa: “Pada ngumpula, majua, serangen, tata-tataa maju perang!

¹⁵Awit, Aku wis ndadèkké kowé asor ing antarané para bangsa, dirèmèhké ing antarané manungsa.

¹⁶Tumindakmu sing medèni lan kemlèlèté atimu, ngapusi kowé déwé, ya kowé ing guwa-guwa watu, lan ing nduwur gunung! Senajan kowé nggawé susuhmu ing panggonan sing duwur, kaya manuk garuda, Aku bakal ngedunké kowé sangka kono, - mengkono tembungé GUSTI—.

¹⁷Edom bakal dadi garing; saben wong sing ngliwati panggonan kono kagèt rodok nggumun lan ngeses awit kabèh bebenduné!

¹⁸Kaya waktu Sodom lan Gomora lan kuta-kuta ing sak ubengé diobrak-abrik - tembungé GUSTI - ora ana wong siji-sijia sing manggon lan ora bakal ana manungsa siji waé sing manggon ing kono.

¹⁹Lah, kaya singa sing njedul sangka alas grumbulané laut Yordan, marani suketan ing panggonané kumpulan wedus, mengkono uga Aku bakal ndadèkké wong kuwi dadakan pada mlayu sangka negara kono lan ngangkat ing kono sapa sing Tak pilih. Awit sapa sing kaya Aku? Sapa sing wani ndakwa Aku? Pangon sing endi sing wani adu-arep karo Aku?

²⁰Mulané rungokna pernatané GUSTI kanggo Edom lan rantyamané Gusti kanggo wong Téman. Yèn sing tyilik déwé sangka antarané kumpulan wedus bakal disèrèt. Yèn panggonan suketan déwé bakal krasa kagèt semu nggumun awit sangka kahanané kuwi.

²¹Bumi bakal horek awit sangka swarané tibané; jeritané krungu nganti tekan ing segara Abang.

²²Terus mumbul mabur kaya manuk garuda, ngléyang lan megarké swiwiné ing duwuré Bosra. Atiné para penggedéné Edom ing dina kuwi bakal kaya atiné wong wadon sing arep mbayi.”

²³Kanggo Damaskus. “Hamat lan Arpad pada kisinan, awit pada krungu kabar sing ala; atiné dek-dekkan awit semplak, ora bisa tentrem.

²⁴Damaskus wis ora nduwé daya kekuwatan, ménguh arep mlayu, ngalami rasa wedi, kangèlan lan krasa lara kaya wong wadon sing arep mbayi, kaya wong wadon sing arep nglairké.

²⁵Lah, kuta sing dadi elem-eleman lan seneng kuwi wis ditinggal prung.

²⁶Mulané para nom-nomané bakal pada ambruk ing alun-aluné lan kabèh suradaduné bakal pada ora tyemruwit ing dina kuwi. - Mengkono tembungé GUSTI. -

²⁷Aku bakal ngurupké geni ing témboké kuta Damaskus lan ngobong kratoné Bènhadad.”

²⁸Kanggo Kedar lan kraton-kratoné Hasor, sing digetyek diasorké karo Nebukadnésar, ratu ing Babèl. Mengkéné tembungé GUSTI: “Tata-tataa, majua perang nglawan Kedar, para wong sisih wétan entèkna!

²⁹Tarup-tarup lan kumpulané wedusé rayahen nganti resik, uga tarup-tarupé lan kabèh pirantiné. Unta-untané rebutana kabèh, lan pada rusaken: Ombyak sangka kéblat papat!

³⁰Mblayua, mblayua gelis, ndelika ing guwa-guwa, hé wong kuta Hasor! - mengkono tembungé GUSTI. - Awit Nebukadnésar, ratu ing Babèl wis nggawé putusan kanggo kowé kabèh lan wis nggawé rantyamané kanggo kowé.

³¹Tata-tataa, majua perang nglawan bangsa sing kuwat uripé, sing manggon karo ayem-tentrem, - mengkono tembungé GUSTI, - uga sing ora nduwé gapura utawa slorok kantyingé lawang lan mentyil panggonané.

³²Unta-untané bakal dadi rebutan lan kéwan-kéwané sing okèh tyatyahé kuwi dadi rayahan. Aku bakal mbuyarké nang kéblat papat kabèh wong sing nyukur putyuké rambuté mubeng lan Aku bakal nekakké tyilaka kanggo para wong kuwi, —mengkono tembungé GUSTI.—

³³Hasor bakal dadi pandelikané asu alasan, dadi panggonan ngentak-entak ing sak lawas-lawasé. Ora ana wong siji-sijia sing bakal manggon ing kono lan ora ana manungsa siji waé sing bakal manggon ing kono menèh.”

³⁴Tembungé GUSTI marang Yérémia kanggo Elam, ing waktu wiwit jamané Sedèkia, ratu ing Yéhuda:

³⁵Mengkéné tembungé GUSTI sing ngwasani langit lan bumi: “Aku nugel gandéwané Elam, ya kuwi dasaré kekuwatané.

³⁶Aku nekakké marang Elam angin papat sangka kéblat papat lan bakal mbuyarké wong-wong kuwi nang kéblat papat, nganti ora ana bangsa siji-sijia sing ora katekan wong Elam sing pating plentyar mau.

³⁷Aku ndadèkké kagèté Elam ing ngarepé mungsuhé lan ing ngarepé para wong sing ngarah nyawané, Aku bakal nekakké tyilaka marang Elam, ya kuwi nesu-Ku sing mulat-mulat, - mengkono tembungé GUSTI. - Aku bakal ngutus pedang nguber wong-wong mau nganti Tak entèkké kabèh.

³⁸Aku bakal ngedekké dampar-Ku ing Elam, lan Aku bakal ngentèkké para ratu lan para penggedéné ing kono - mengkono tembungé GUSTI. -

³⁹Nanging mbésuk Aku bakal mulihké kahanané Elam. Mengkono tembungé GUSTI.”