Read Caribbean Javanese Yérémia 52 Bible Online

Yérémia 52 - Caribbean Javanese bible

Yérémia 52

¹Sedèkia umuré selikur taun waktu dadi ratu, nanging enggoné dadi ratu ing Yérusalèm suwéné sewelas taun. Ibuné asmané Hamutal, anaké wadon Yérémia sangka Libna.

²Piyambaké nindakké apa sing ala ing ngarepé GUSTI persis karo apa sing ditindakké Yoyakim.

³Awit sangka bebenduné GUSTI kelakoné perkara iki kanggo Yérusalèm lan Yéhuda, ya kuwi, enggoné terus pada kebuwang karo GUSTI sangka ngarepé Gusti. Sedèkia mbruntak nglawan ratu ing Babèl.

⁴Mulané waktu ing taun sing kaping sanga jamané, ing sasi sing kaping sepuluh tanggal kaping sepuluh Nebukadnésar ratu ing Babèl karo suradaduné nyerang Yérusalèm. Terus pada masang tarup ngepung Yérusalèm lan ngedekké témbok kanggo ngepung ing sak ubengé.

⁵Kaya mengkono enggoné kuta kuwi dikepung nganti tekan ing taun sing kaping sewelas jamané Sedèkia.

⁶Ing tanggal sanga sasi papat, waktu pailan ing kuta kono wis nemen lan wis ora ana sing dipangan karo rayat,

⁷témboké kuta terus dibedah. Bareng ratu ngerti perkara kuwi terus mblayu lan sak balané ninggalké kuta kono ing wayah mbengi, lunga metu ing gapura ing sela-selané témbok loro, tyedak ing taman ratu, senajan suradadu Kasdim ngepung Yérusalèm mubeng. Enggoné pada mlayu nuju legokan Araba-Yordan.

⁸Nanging suradadu Kasdim nguber ratu lan Sedèkia ketyekel ing legokan Yériko; para suradaduné wis pada pating slebar ninggal piyambaké.

⁹Ratu dibanda lan dituntun digawa menyang ratu Babèl ing Ribla ing negara Hamat; Ratu terus netepké paukumané.

¹⁰Ratu ing Babèl ngongkon mbelèh anak-anaké Sedèkia ing ngarepé, mengkono uga kabèh para penggedéné Yéhuda ya pada dibelèhi ing Ribla.

¹¹Sedèkia terus dityungkil mripaté lan digawa karo ranté tembaga, digawa menyang Babèl, ketutupan ing paukuman, nganti tekan ing matiné.

¹²Waktu sasi kaping lima tanggal kaping sepuluh - kuwi taun sing kaping sangalas jamané Nebukadnésar, ratu Babèl - Nébusaradan, penggedéné suradadu pengawal, sing ngladèni ratu ing Babèl, teka ing Yérusalèm.

¹³Griyané GUSTI, kratoné ratu lan sak kabèhé omah ing Yérusalèm, sak kabèhé omahé para penggedéné pada diobongi.

¹⁴Témbok sak ubengé kuta Yérusalèm diembrukké karo suradadu Kasdim sing pada mèlu penggedéné suradadu pengawal mau.

¹⁵Sak golongané wong sing ringkih déwé lan turahé wong sing ijik manggon ing kono lan para wong sing malik mripat mbalik mèlu ratu ing Babèl, uga turahé para tukang pada diboyong menyang pembuwangan karo Nébusaradan, penggedéné suradadu pengawal kuwi.

¹⁶Mung tunggalé para wong mlarat ing negara kono, ana siji-loro sing ditinggal karo Nébusaradan, penggedéné suradadu pengawal mau, supaya dadi tukang kebon anggur lan tukang tani.

¹⁷Tyagak-tyagaké tembaga ing griyané GUSTI kréta penyangga lan segara-segaraan tembaga ing griyané GUSTI pada dirusak karo suradadu Kasdim lan kabèh tembaga diusungi menyang negara Babèl.

¹⁸Kwali-kwali, sodok-sodokan, lading-lading, bokor-bokor kanggo nyirami lan piring-piring uga kabèh piranti tembaga sing kanggo nindakké pangabekti, dijupuki kabèh.

¹⁹Uga jambangan-jambangan, dupa-dupa, bokor-bokor kanggo nyirami, kwali-kwali, dimar-dimar, piring-piring lan tuwung-tuwung, emas lan slaka, dijukuk karo penggedéné suradadu pengawal mau.

²⁰Nanging tyagak loro, segara-segaraan siji lan sapi tembaga rolas ing sak ngisoré kréta penyangga, sing digawé karo Salomo, kanggo griyané GUSTI, kuwi nganti ora kena timbang boboté tembaga kabèh piranti kuwi.

²¹Nanging tyagak-tyagak kuwi, sangka siji duwuré wolulas éluh lan diblebeti bolah sing dawané rolas éluh, kandelé patang driji lan ing njeruhné growong.

²²Ing sak nduwuré ana kribelé tembaga, sing siji kuwi duwuré limang éluh, lan diubengi enam-enaman lan woh-wohan mulwa, kabèh tembaga. Lan sing kaping loro uga kaya mengkono.

²³Kanggo wohé mulwa ana sangang puluh nem woh mulwa sing rupa gambar mrentol metu, tyatyahé woh-wohan mulwa kuwi kabèh ana 100 ngubengi enam-enaman kuwi.

²⁴Penggedéné suradadu pengawal kuwi terus nyekel imam Seruya, pengarepé pinituwané para imam lan imam Sépanya wakilé lan penjaga gapura telu.

²⁵Sangka kuta kono sing dityekel sakwijiné penggedé kraton sing diangkat dadi penggedéné para suradadu lan abdiné ratu pitu ing kuta kono lan juru tulisé pahlawan sing nglumpukké rayat dadi suradadu, uga wong suwidak sangka antarané rayat ing sak njeruhné kuta kono.

²⁶Nébusaradan penggedéné suradadu pengawal mau ngongkon nyekel para wong kuwi terus diadepaké marang ratu Babèl, ing Ribla.

²⁷Ratu Babèl terus ngongkon matèni para wong kuwi ing Ribla ing negara Hamat. Mengkono enggoné wong Yéhuda pada diboyong menyang pembuwangan sangka negarané.

²⁸Iki tyatyahé rayat sing diboyong menyang pembuwangan karo Nébusaradan: waktu ing taun kaping pitu, 3.023 jiwa sangka Yéhuda;

²⁹waktu taun sing kaping wolulas jamané Nebukadnésar, 832 jiwa sangka Yérusalèm;

³⁰waktu ing taun sing kaping telu likur jamané Nebukadnésar, sing diboyong menyang pembuwangan karo Nébusaradan, penggedéné suradadu pengawal mau 745 jiwa sangka Yéhuda; gunggungé kabèh ana 4.600 jiwa.

³¹Terus waktu ing taun sing kaping telung puluh pitu sakwisé Yoyakin, ratu ing Yéhuda, kebuwang, waktu sasi rolas tanggal selawé ing sasi kuwi, Ewil-Merodak, ratu Babèl, ing taun jamané, ngétokké kawelasan marang Yoyakin, ratu ing Yéhuda, terus ngluwari piyambaké sangka paukuman.

³²Ewil-Merodak tumindaké grapyak marang Yoyakim lan ngekèki pangkat sing luwih duwur tenimbang karo ratu-ratu liyané sing bebarengan karo piyambaké ing Babèl.

³³Yoyakin dililani ngganti sandangané paukuman lan ing selawasé uripé dililani ajek mangan roti ing ngarepé ratu ing Babèl.

³⁴Lan kanggo uripé ing saben dinané dikèki karo ratu Babèl, ing sakjeké uripé nganti tekan ing matiné.