Read Caribbean Javanese Yérémia 9 Bible Online

Yérémia 9 - Caribbean Javanese bible

Yérémia 9

¹Yèn sirahku kebak banyu, lan mripatku dadi sumberé luh, mesti awan wengi enggonku nangisi patiné para botyah wadoné bangsaku.

²Yèn aku nduwé tarup ing ara-ara samun, kanggo wong sing nglembara, aku mesti bakal lunga adoh ninggal bangsaku! Awit kabèh wong mlaku bédang, golongané wong sing ora setia.

³Kuwi pada mentèng ilaté kaya gendéwa sing ala lan duduk kabeneran, ngwasani negara. Tenan, kebatyut-batyut enggoné pada nglakoni sing ala, nanging pada ora kenal marang GUSTI.

⁴Apiké saben wong jaga-jaga marang kantyané, lan aja ngandel marang saben sedulur, awit kabèh sedulur dadi tukang ngapus lan saben kantya mlaku mbrana-mbréné gawéané seneng ngarani ala.

⁵Sing siji ngapusi sijiné, lan ora ana wong siji-sijia sing tembungé bener, pada ngulinakké ilaté ngomong goroh, pada nindakké kesalahan lan emoh mratobat.

⁶Penggawé ala numpuk-numpuk, para wong goroh numpuk-numpuk! Pada ora gelem kenal marang GUSTI.

⁷Mulané mengkéné tembungé GUSTI sing ngwasani langit lan bumi: “Aku gelem nglebur lan nguji bangsa iki, awit apa menèh ta sing bisa Tak tindakké kanggo anaké wadon umat-Ku?

⁸Ilaté kuwi panah sing matèni, tembung sing kewetu sangka tutuké kuwi ngapus, semauré marang kantyané: tentrem, nanging ing sak njeruhné batiné isi ngintyim-intyim.

⁹Apa Aku ora bakal nibakké paukuman marang wong-wong kuwi, awit sangka iki kabèh? Apa Aku ora bakal mbales ukuman marang bangsa sing kaya mengkéné iki? Mengkono tembungé GUSTI.

¹⁰Nangisa lan sambata awit sangka gunung-gunung, lan nangisa awit sangka suketan ing ara-ara samun, awit wis suwung kabèh, nganti ora ana sing ngambah, lan ora krungu menèh swarané kéwan-kéwan, senajana manuk ing awang-awang, senajana kéwan galak wis pada mlayu kabèh, wis ora ana.

¹¹Aku bakal nggawé Yérusalèm dadi ambruk panggonan delikané asu alasan. Aku bakal nggawé kuta-kuta Yéhuda dadi sepi mamring, ora ana sing manggon menèh.”

¹²Endi wong sing wityaksana, sing nganti bisa ngerti bab iki, wong sing nampani tembungé sangka tutuké GUSTI, supaya bisa ngomongké kuwi? Apa sebabé negara iki rusak, suwung kaya ara-ara samun, nganti ora ana wong sing ngambah?

¹³Tembungé GUSTI mengkéné: “Awit wong kuwi wis pada nglalèkké angger-angger-Ku, sing wis Tak wènèhaké lan ora ngrungokké marang swara-Ku lan ora nuruti marang kuwi,

¹⁴nanging pada nuruti apa sak karepé atiné, uga miturut marang para Baal kaya sing diwulangké para leluhuré,

¹⁵mulané tembungé GUSTI sing ngwasani langit lan bumi, Gusti Allahé Israèl mengkéné: Aku bakal makani kayu pait marang bangsa iki lan Tak ombèni ratyun.

¹⁶Aku bakal nyebar wong iki ing tengahé para umat sing durung tau kenal wong-wong kuwi lan para leluhuré lan Aku bakal ngetyulké pedang sing ngoyak wong-wong kuwi, nganti arep pada Tak entèkké.”

¹⁷Pada gatèkna! Ngundanga para tukang tangis wadon, supaya pada mréné, lan kongkonen, supaya para wong wadon sing wityaksana, pada mréné!

¹⁸Bèn pada gelis teka lan pada nangisi kita, supaya mripat kita ngetokké luh, lan mripat kita kebek banyu!

¹⁹Awit ing Sion krungu tangis: Oh pada mati aku! Aku pada banget diwirangké! Awit aku kudu pada ninggal negara iki, nanging omah-omahku pada dirubuhké.

²⁰Hé para wong wadon, rungokna tembungé GUSTI, pada ngrungokna préntahé Gusti; anak-anakmu wadon pada wulangna tangisan lan saben wong wadon mulangana kidung sambat marang kantyané:

²¹“Oh, pati wis nlusup ing jendéla-jendéla kita, kraton kita wis pada dileboni, botyah-botyah ing dalan-dalan pada dientèkké, semono uga para nom-noman ing lapangan.

²²Layoné wong-wong pada klèlèran kaya rabuk ing kebon, kaya bentèlan gandum ing sak mburiné wong sing pada panèn, lan ora ana sing nglumpukké.”

²³Tembungé GUSTI mengkéné: “Wong sing wityaksana aja ngendel-ngendelké kawityaksanané, wong rosa aja mamèrké kekuwatané, wong sugih aja ngegung-ngegungké kasugihané;

²⁴nanging sapa sing arep nyombongké, sombonga sing mengkéné: yèn dèwèké ngerti lan manut marang Aku, yèn Aku iki GUSTI, sing nduduhké katrésnan, keadilan lan kabeneran ing bumi; tenan, kuwi sing ndadèkké senengé ati-Ku,” mengkono tembungé GUSTI.

²⁵Préntah tembungé GUSTI mengkéné: “bakal tekan ing waktuné enggon-Ku ngekèki paukuman marang wong sing wis sunat, nanging ijik ikuten:

²⁶wong Egipte, wong Yéhuda, wong Edom, turunané Amon, wong Moab lan kabèh wong sing rambuté dityukur ing iringan mubeng lan wong sing manggon ing ara-ara samun, awit kabèh bangsa ora pada sunat lan tyedak turunané Israèl ya ora disunati atiné.”