Read Caribbean Javanese Kidung Pesambat 5 Bible Online

Kidung Pesambat 5 - Caribbean Javanese bible

Kidung Pesambat 5

¹Duh GUSTI, Panjenengan supaya éling apa sing wis pada kita alami, supaya Panjenengan gelem weruh lan mangertèni marang kahanané kita sing asor iki.

²Negara panduman kita wis tiba marang bangsa liya, omah-omah kita marang wong mantya.

³Kita pada dadi botyah lola, ora nduwé bapak, ibu kita pada kaya randa.

⁴Enggèn kita ngombé banyu karo tuku, lan enggèn kita nganggo kayu karo mbayar.

⁵Kita pada diuber-uber ing tyedakan, pada kesel nanging ora olèh ngasuh.

⁶Kita wis pada ngatungké tangan marang wong Egipte, lan marang wong Asyur, supaya bisaa mangan warek.

⁷Para leluhur kita sing pada nggawé dosa wis ora ana, kita sing nyangga dosané.

⁸Réwang tukon pada mréntah kita, ora ana sing ngluwari kita sangka tangané.

⁹Enggèn kita golèk pangan karo antyaman, awit sangka anané mungsuh ing ara-ara samun.

¹⁰Kulit kita murup kaya prapèn, awit panasé nemen sing kaliren.

¹¹Para wong wadon ing Sion pada dirujak, mengkéné uga prawan-prawan ing kuta-kutané Yéhuda.

¹²Para penggedéné pada digantung karo tangané mungsuh, para pinituwa ora diajèni.

¹³Wong nom-noman pada dikongkon mikul gilingan, anak-anak lanang pada ambruk awit kabotan anggèné mikul kayu.

¹⁴Para tuwa pada ora kumpulan menèh ing gapurané kuta, para nom-noman mandek anggèné main harep

¹⁵Kebungahané ati kita wis ilang, jogètan kita pada malih dadi kasusahan.

¹⁶Makuta wis tiba sangka sirah kita, oh memelas; awit kita wis pada nggawé dosa!

¹⁷Ya awit sangka mengkono kuwi ati kita lara, ya awit sangka mengkono kuwi mripat kita terus dadi blawur.

¹⁸Awit sangka gunung Sion sing wis ludes, asu-asu alasan pada pating kluyur ing kono.

¹⁹Duh GUSTI, Panjenengan kuwi langgeng, dampar Panjenengan ora owah gingsir nganti turun-temurun.

²⁰Kenèng apa kok Panjenengan nganti ora éling marang kita kabèh ing sak lawasé, kenèng apa kok kita Panjenengan tégakaké nganti suwé?

²¹Duh GUSTI, kita supaya pada Panjenengan balèkké marang Panjenengan, sak nalika pada bakal mratobat, kahanané kita supaya Panjenengan pulihké menèh kaya waktu mbiyèn.

²²Utawa apa Panjenengan bakal nampik marang kita? Apa Panjenengan nesu banget marang kita?