Read Caribbean Javanese Yéhèskièl 1 Bible Online

Yéhèskièl 1 - Caribbean Javanese bible

Yéhèskièl 1

¹Ing taun sing kaping telung puluh, tanggal kaping lima sasi papat, waktu aku ing pinggir kali Kebar bebarengan karo para wong buwangan, terus langit mbiyak lan aku weruh wahyu sangka Gusti Allah.

²Ing tanggal kaping lima sasi kuwi, ya kuwi ing taun kaping lima sakwisé Yoyakin dibuwang,

³ana tembungé GUSTI tumuju marang imam Yéhèskièl, anaké Busi, ing negarané wong Kasdim ing pinggir kali Kebar lan ing kono tangané GUSTI numpangi Yéhèskièl.

⁴Aku terus weruh, ana lésus sangka lor, sing nggawa mendung peteng lan geni mulat-mulat; mendung mau diubengi karo pepadang sing semlorot; ing njeruhné pernahé ing tengahé geni kuwi ana sing kaya slaka semlorot.

⁵Ing tengah-tengahé kono uga ana sing rupané kaya makluk papat sing urip lan kuwi kétoké mengkéné: rupané kaya manungsa,

⁶nanging siji-sijiné praupané papat lan ana swiwiné papat.

⁷Sikilé lurus-lurus lan tlapakané sikil kaya tratyak pedèt, semlorot kaya slaka sing entas digosok.

⁸Ing sak ngisoré swiwi ana tangané manungsa peneré ing sisih papat pisan. Nanging praupan lan swiwiné mau mengkéné:

⁹swiwiné pada tempuk; yèn mlaku ora nganggo mingar minger, nanging lurus mengarep.

¹⁰Praupané kétoké mengkéné: Praupané papat sing ngarep praupan manungsa, sing sisih tengen praupan singa, sing sisih kiwa praupan sapi, ing mburiné praupan manuk garuda.

¹¹Swiwiné pada diegaraké menduwur lan adu-arep loro-loro, nanging swiwi liyané nutupi awaké.

¹²Kabèh mlakuné lurus mengarep, menyang ngendi kekarepané roh, ya mrana parané; enggoné mlaku ora nganggo mingar minger.

¹³Ing sak tengahé makluk-makluk mau ana sing kétok kaya karo geni mengangah, kaya ontyor sing obah mrana-mréné ing antarané makluk-makluk sing urip kuwi; geni mau semlorot lan metu klélapé sing pada sesamberan.

¹⁴Makluk-makluk sing urip kuwi pada mabur mrana-mréné kaya klélap.

¹⁵Aku weruh, ing bumi ana glindingan ngadek sandingé makluk-makluk papat mau ing iringané ana glindingané siji,

¹⁶rupané semlorot kaya watu-watu lazurit, papaté kembar lan kétoké ing tengahé glindingan kaya ana glindingané.

¹⁷Yèn pada mlaku, bisa nuju menyang kéblat papat, ora nganggo mingar minger.

¹⁸Glindingan-glindingan mau ana lés-pinggiré lan aku weruh pinggiran papat kuwi pada kebak mripat mubeng.

¹⁹Yèn makluk sing urip kuwi pada mlaku, glindingané uga mlaku ing sandingé; lan yèn makluk sing urip kuwi pada diumbulké sangka bumi, glindingané ya pada katut diumbulké.

²⁰Menyang ngendi kekarepané roh, ya mrana parané para makluk mau lan glindingan-glindingan pada diangkat bebarengan karo makluk-makluk kuwi, awit rohé makluk-makluk sing urip kuwi manggon ing glindingané.

²¹Yèn makluk sing urip kuwi pada mlaku, glindingané uga pada mlaku, yèn makluk mau pada mandek, glindingané ya pada mandek lan yèn makluk mau pada diumbulké sangka bumi, glindingané ya pada katut diangkat bebarengan karo makluk-makluk kuwi, awit rohé para makluk kuwi manggon ing glindingané.

²²Ing sak nduwuré sirahé makluk-makluk sing urip kuwi ana rupané sing mèmper langit, sing kétok kaya kristal ès sing medèni, digelar ing sak nduwuré sirahé.

²³Lan ing sak ngisoré langit kuwi swiwiné dibèbèr jejek, sing siji tempuk karo sijiné, kabèh pada nduwé swiwi loro sing nutupi awaké.

²⁴Yèn pada mlaku, aku krungu swara kebutané swiwiné kemrasak, kaya swarané grojokan, kaya swarané sing Mahakwasa, gembruduk kaya swarané suradadu okèh; yèn pada mandek, swiwiné diingkupaké.

²⁵Aku terus krungu swara sangka sak nduwuré langit sing mayungi sirahé; yèn makluk mau pada mandek, swiwiné diingkupaké.

²⁶Ing sak nduwuré langit sing mayungi para makluk mau ana rerupan sing kétok kaya dampar, kaya karo watu-watu diaman; lan ing sak nduwuré sing rupané kaya dampar kuwi ana sing kétoké kaya manungsa.

²⁷Wiwit sing kaya bangkèkan kuwi nganti tekan nduwur, aku weruh sing semlorot kaya slaka lan kaya geni ing sak ubengé ketutupan; lan sangka sing kaya bangkèkan tekan ngisor aku weruh sing kaya geni sing diubengi karo pepadang.

²⁸Kaya kluwung sing waktu udan kétok ing mendung, ya kaya mengkono kuwi kétoké pepadang sing ngubengi. Kaya mengkono kétoké gambaré kamulyané GUSTI. Bareng aku weruh kuwi aku terus nyembah sujut lan krungu swarané Panjenengané sing nggelar tembungé.