Read Caribbean Javanese Yéhèskièl 10 Bible Online

Yéhèskièl 10 - Caribbean Javanese bible

Yéhèskièl 10

¹Aku terus weruh ing sak nduwuré pentèngan langit sing mayungi sirahé para kerup ing nduwuré ana sing kaya dampar, kétok kaya watu-watu diaman.

²Sing nganggo mori mau terus diomongi mengkéné: “Kowé mlebua ing sak ngisoré kerup sangka antarané glindingan-glindingan, njukuka karo tanganmu mawa murup sangka sak tengahé kerup kuwi lan sawurna ing sak nduwuré kuta kuwi.” Aku terus weruh wong mau mlebu.

³Kerup mau pada ngadek ing sak kidulé griya sutyi, waktu wong mau mlebu ing sak tengahé glindingan-glindingan lan plataran ing njeruh ketutupan karo mendung.

⁴Ing waktu kuwi kamulyané GUSTI munggah sangka sak nduwuré kerup lan ngalih ing undak-undakané lawangé griya sutyi lan griya sutyi kuwi kebak karo mendung lan platarané kebak semloroté kamulyané GUSTI.

⁵Swarané swiwiné kerup kuwi dikrungu nganti tekan plataran ing njaba kaya swarané Gusti Allah sing Mahakwasa yèn ngomong.

⁶Wong sing nganggo mori mau dikongkon mengkéné: “Kowé njupuka geni sangka sak tengahé glindingan-glindingan, ing sak tengahé kerup iki!” Sing nganggo mori terus budal lan ngadek ing sandingé salah sijiné glindingan kuwi.

⁷Terus kerup sing siji ngelungké tangané sangka sak tengahé para kerup marang geni ing sak tengahé, dijukuk setitik didèkèkké ing tangané sing nganggo mori. Wong iki nampani terus lunga.

⁸Kerup-kerup kuwi kétok nduwèni kaya tangané manungsa ing sak ngisoré swiwiné.

⁹Aku weruh sandingé kerup-kerup kuwi ana glindingan papat, saben kerup ing sandingé ana glindingané siji, lan glindingan-glindingan kuwi kétok gemebyar kaya watu-watu pirus.

¹⁰Kétoké papat kabèh kuwi pada, kaya glindingan sing siji manggon ing sak tengahé glindingan sijiné.

¹¹Yèn ngglinding bisa nuju ing patang panggonan, ora nganggo mingar minger mlakuné, awit menyang ngendi parané glindingan sing ngarep, glindingan liyané pada ngetutké, tanpa mingar minger mlakuné.

¹²Awaké kerup sekujur, gegeré, tangané, swiwiné lan glindingané papat pisan kebak mripat mubeng.

¹³Sak krunguku glindingan-glindingan kuwi jenengé ‘glindingan mubeng’.

¹⁴Siji-sijiné kanggonan praupan papat: kaping pisan praupan kerup, kaping pindo praupan manungsa, kaping telu praupan singa lan kaping papaté praupan garuda.

¹⁵Kerup mau terus pada mumbul. Kuwi makluk sing urip sing dèk mbiyèn tak deleng ing pinggir kali Kebar.

¹⁶Yèn kerup kuwi mlaku, glindingan-glindingan ya ngglinding ing sandingé, yèn kerup kuwi megarké swiwiné arep mabur sangka lemah, glindingan-glindingan mau ya ora obah sangka sandingé.

¹⁷Yèn kerup mau pada lèrèn, glindingan-glindingan ya lèrèn; yèn kerup kuwi pada mumbul, glindingané ya mèlu mumbul, awit rohé makluk sing pada urip kuwi manggon ing glindingan-glindingan kono.

¹⁸Kamulyané GUSTI terus lunga sangka ngarepé lawangé griya sutyi lan ngalih ing sak nduwuré kerup.

¹⁹Kerup-kerup kuwi pada megarké swiwiné lan waktu lungané aku weruh, kuwi pada mumbul sangka lemah bebarengan karo glindingan-glindingan. Terus pada lèrèn ing sak tyedaké lawangé gapurané griya sutyiné GUSTI ing sisih wétan lan kamulyané Gusti Allahé Israèl ing sak nduwuré.

²⁰Ya kuwi makluk-makluk urip sing dèk mbiyèn tak deleng ing sak ngisoré Gusti Allahé Israèl ing pinggir kali Kebar. Lan aku ngerti, yèn kuwi kerup.

²¹Siji-sijiné ana praupané papat lan ing sak ngisoré swiwiné ana sing modèlé kaya tangané manungsa.

²²Kétoké praupané tyotyok karo sing tak deleng ing pinggir kali Kebar. Kabèh mlakuné pada terus kentyeng manut sing ngarep.