Read Caribbean Javanese Yéhèskièl 12 Bible Online

Yéhèskièl 12 - Caribbean Javanese bible

Yéhèskièl 12

¹Terus tembungé GUSTI marang aku mengkéné:

²“Hé, anaké manungsa, kowé kuwi manggon ing sak tengahé golongan sing mbruntak sing nduwèni mripat kanggo ndeleng, nanging ora weruh lan nduwèni kuping kanggo ngrungokké, nanging ora krungu, awit wong kuwi golongan sing mbruntak.

³Mulané kowé, anaké manungsa, nyawisna barang-barang keperluané wong buwangan lan ing wantyi awan kowé mlakua kaya wong buwangan ing ngarepé wong-wong mau; lungaa sangka panggonanmu saiki menyang panggonan liyané kaya wong buwangan ing ngarepé. Menawa terus pada ngakoni yèn pada wangkot.

⁴Barang-barangmu pada gawanen metu kaya barangé wong buwangan ing wantyi awan, ing ngarepé wong-wong mau; lan ing wantyi mbengi kowé déwé metua ing ngarepé mripaté wong-wong mau, kaya wong sing kudu metu lan budal menyang panggonan pembuwangan.

⁵Kowé nggawéa bolongan ing témbok ing ngarepé mripaté wong-wong mau lan metua mbrobos kono.

⁶Barang-barangmu panggulen ing ngarepé lan gawanen metu ing wantyi mbengi sing peteng; kowé nutupana praupanmu, nganti kowé ora weruh lemah; awit kowé Tak dadèkké gambarané turunané Israèl.”

⁷Aku terus nindakké apa préntahé Gusti marang aku: ing wantyi awan aku nggawa barang-barang kaya barangé wong buwangan lan ing wantyi mbengi aku nggawé bolongan ing témbok karo tanganku; ing wantyi mbengi sing peteng ing ngarepé mripaté wong-wong aku metu karo manggul barang-barangku.

⁸Esuké ana tembungé GUSTI marang aku mengkéné:

⁹“Hé, anaké manungsa, apa turunané Israèl sing wangkot kuwi ora takon marang kowé: Sampéyan kuwi nindakké apa?

¹⁰Kuwi semaurana: Gusti GUSTI ngomong mengkéné: Utyapané Gusti iki tumuju marang ratu ing Yérusalèm lan kabèh turunané Israèl ing kana.

¹¹Kowé ngomonga: Aku iki dadi gambaran kanggo kowé kabèh. Apa sing tak tindakké iki bakal ditibakké marang wong-wong kuwi: bakal dadi wong buwangan dibuwang ing pembuwangan.

¹²Lan ratuné bakal manggul barang-barangé ing wantyi mbengi sing peteng lan bakal lunga metu. Wong bakal mbobol témbok kanggo dalan metuné. Panjenengané bakal nutupi praupané supaya ora weruh lemah.

¹³Aku bakal masang jaring-Ku kanggo nyekel dèwèké. Wong kuwi bakal kena ing jaring-Ku lan terus bakal Tak gawa menyang Babèl, negarané wong Kasdim, nanging negara kuwi ora bakal dideleng, terus bakal mati ing kana.

¹⁴Lan sak kabèhé wong sing pada ing sak tyedaké, para abdiné lan suradaduné, bakal Tak buyaraké ing kabèh kéblat lan Aku bakal ing mburiné karo ngelungké pedang.

¹⁵Ing kono bakal pada weruh, yèn Aku iki GUSTI, ya kuwi yèn wis pada Tak buyaraké ing antarané para bangsa lan Tak sebar-sebar menyang kabèh negara.

¹⁶Nanging ana tunggalé sing bakal Tak turahké setitik, sing utyul sangka pedang, sing ora mati kaliren lan ora katekan lara pès, supaya pada nyritakké sak kabèhé penggawéné wong-wong mau sing ala ing sak tengahé para bangsa, sing pada ditekani, terus pada weruh, yèn Aku iki GUSTI.”

¹⁷Terus ana tembungé GUSTI marang aku mengkéné:

¹⁸“Hé, anaké manungsa, kowé mangana panganmu karo gemeter lan ngombéa karo ngowèl lan karo ati sing sumelang

¹⁹lan ngomonga marang para sing pada manggon ing negara iki mengkéné: Mengkéné tembungé Gusti, GUSTI bab para wong Yérusalèm ing negara Israèl: Kuwi bakal pada mangan pangané karo ati sumelang lan ngombé banyu karo ati sing susah banget, supaya negarané dadi sepi mamring, awit isiné wis entèk, awit sangka panganiayané para wong sing pada manggon ing kono kabèh.

²⁰Kuta-kuta sing ijik dienggoni karo wong bakal pada dadi gempuran lan negara kono bakal dadi sepi mamring; ing kono kowé bakal pada weruh, yèn Aku iki GUSTI.”

²¹Terus ana tembungé GUSTI marang aku mengkéné:

²²“Hé, anaké manungsa, bebasan apa sing ketemu ing sak tengahmu ing negara Israèl, sing isiné mengkéné: Waktuné wis suwé, nanging ora ana wahyu siji waé sing kelakon?

²³Mulané ngomonga marang wong-wong mau: Mengkéné tembungé GUSTI: Aku bakal ngilangi bebasan iki, terus bakal ora ana wong sing ngutyapké kuwi menèh ing negara Israèl; malah pada kok omongna mengkéné: Waktuné wis tyedak lan saben wahyu bakal kelakon.

²⁴Awit ora bakal ana menèh wahyu apus-apusan utawa ramalan ing sak tengahé turunané Israèl.

²⁵Awit Aku, GUSTI bakal ngomong lan apa sing Tak omongaké bakal kelakon lan tembungé kuwi ora bakal tak undur-undurké menèh awit sak njeruhné kowé ijik pada urip, hé golongan turunan sing wangkot, Aku bakal ngomongké tembungé sing bakal Tak tetepi. Mengkono tembungé GUSTI.”

²⁶Terus ana tembungé GUSTI marang aku mengkéné:

²⁷“Hé, anaké manungsa, turunané Israèl pada ngomong: Wahyu sing dideleng kuwi ijik suwé banget bakalé kelakon, nubuat sing diutyapké kuwi ijik adoh banget.”

²⁸Mulané kowé ngomonga marang wong-wong mau: Tembungé GUSTI mengkéné: Ora ana tembung-Ku siji waé sing bakal Tak undur-undurké. Apa sing Tak omongaké bakal kelakon. Mengkono tembungé GUSTI.