Read Caribbean Javanese Yéhèskièl 13 Bible Online

Yéhèskièl 13 - Caribbean Javanese bible

Yéhèskièl 13

¹Sakwisé mengkono terus ana tembungé GUSTI marang aku mengkéné:

²“Hé, anaké manungsa, kowé nubuata nglawan nabiné Israèl, nubuat lan ngomonga marang wong-wong sing nubuat sak senengé déwé waé kuwi mengkéné: Rungokna tembungé GUSTI!

³Mengkéné tembungé GUSTI: Tyilaka para nabi sing gemblung sing nuruti bisikané atiné déwé kuwi lan sing ora weruh wahyu.

⁴Kaya asu alasan ing sak tengahé gempuran; ya kaya mengkono kuwi para nabimu, hé Israèl.

⁵Kowé ora pada ngadek ing bolongan-bolongané témbok lan ora ngedekké témbok ing sak ubengé omahé Israèl, supaya pada bisa tetep urip ing peperangan ing dinané GUSTI.

⁶Wahyuné wong-wong kuwi ngapusi lan nubuaté kuwi goroh. Pada ngomong: Mengkéné tembungé GUSTI. Nanging pada ora diutus karo GUSTI, senajan mengkono pada ngarep-arep kelakoné tembungé mau.

⁷Sing pada kok deleng kuwi apa ora wahyu apus-apusan lan ramalan sing goroh, sing pada kok omongaké kuwi, yèn kowé ngomong: Mengkéné tembungé GUSTI, nanging Aku ora ngomong?

⁸Mulané mengkéné tembungé GUSTI: Awit kowé ngomongké tembung goroh lan seneng nyawang perkara-perkara palsu, awit sangka kuwi Aku bakal dadi mungsuhmu, mengkono pituturé Gusti Allah.

⁹Aku bakal ngatungké tangan-Ku nglawan para nabi sing ndeleng perkara sing ora nyata lan sing ngutyapké ramalan-ramalan sing goroh, wong-wong kuwi ora klebu ing golongané umat-Ku lan ora bakal ketulis dadi turunané Israèl, lan ora bakal mlebu menèh ing negara Israèl lan kowé bakal weruh, yèn Aku iki Gusti Allah, GUSTI.

¹⁰Awit, iki sejatiné, wong-wong kuwi pada nasarké umat-Ku karo tembungé: Tentrem rahayu, nanging babar pisan ora tentrem rahayu - pada ngedekké témbok lan dilabur karo kapur -

¹¹kowé ngomonga marang wong sing pada nglabur karo kapur mengkéné: Udan deres bakal nganakké banjir, bakal ana udan krikil lan angin lésus!

¹²Yèn témboké kuwi wis ambruk, apa wong ora bakal ngomong marang kowé: Endi saiki kapur sing kok témploké kaé?

¹³Mulané mengkéné tembungé GUSTI: Ing sak njeruhné bebendu-Ku Aku bakal nganakké lésus lan ing sak njeruhné nesu-Ku udan deres sing nukulké banjir, lan ing sak njeruhné bebendu-Ku udan krikil sing nggawé rusak.

¹⁴Sak terusé Aku bakal ngambrukké témbok sing kok labur karo kapur kuwi lan Tak ambruké ing lemah, nganti dasaré kétok; témboké kuta kuwi bakal ambrol lan kowé bakal pada mati ing njeruhné! Ing kono kowé bakal weruh, yèn Aku iki GUSTI.

¹⁵Mengkono enggon-Ku bakal ngesokké bebendu-Ku marang témbok kuwi marang wong sing pada nglabur karo kapur lan Aku bakal ngomong marang kowé: Wis entèk témboké lan wis entèk wong sing pada nglabur,

¹⁶ya kuwi para nabiné Israèl sing ngomongké ramalan kanggo Yérusalèm lan weruh wahyu bab tentrem keslametané, nanging babar pisan ora ana tentrem rahayu; mengkono tembungé GUSTI.”

¹⁷“Kowé anaké manungsa, nemonana golongané wong wadon bangsamu sing tukang ngramal sak énaké atiné waé kuwi lan ngomongké ramalan nglawan wong-wong kuwi:

¹⁸Kowé ngomonga: Mengkéné tembungé GUSTI: Tyilaka para dukun wadon, sing nalèni kabèh ugel-ugelé karo tali jimat lan ngenggokké kudungé ing sirahé wong kabèh, tuwa utawa nom, kanggo njiret nyawané wong. Kowé apa arep njiret nyawané wong sing ijik umat-Ku lan ngetokké wong-wong liyané pada urip kanggo keperluanmu?

¹⁹Kowé kuwi nerak kesutyian-Ku ing sak tengahé umat-Ku mung supaya olèh jewawut sak gegem lan roti sak iris karo matèni wong-wong sing kuduné ora mati lan ngejarké wong-wong pada urip, sing kuduné ora pantes urip, awit sangka enggonmu ngapusi umat-Ku, sing gelem ngrungokké tembung goroh.

²⁰Awit sangka kuwi mengkéné tembungé GUSTI: Aku bakal nglawan tali jimatmu, sing kok enggo njiret nyawané wong, bakal Tak rebut sangka tanganmu lan wong-wong sing pada kok tyekel kuwi bakal Tak utyulké kaya manuk.

²¹Kudungmu bakal Tak suwèk-suwèk lan bakal nylametaké umat-Ku sangka tanganmu lan kuwi pada ora bakal dadi memangsamu menèh ing tanganmu. Kowé terus pada weruh, yèn Aku iki GUSTI.

²²Awit kowé pada ngringkihké atiné wong bener karo goroh, senajan Aku ora nggawé kasusahané lan sak baliké kowé pada ngatoské atiné wong duraka, terus ora mratobat sangka klakuané sing duraka kuwi, lan kowé pada nglestarèkké wong kuwi urip.

²³Mulané kowé ora bakal weruh menèh perkara-perkara sing ngapusi lan ngetokké ramalan-ramalan sing goroh; Aku bakal ngluwari umat-Ku sangka tanganmu lan kowé bakal pada weruh, yèn Aku iki GUSTI.”