Read Caribbean Javanese Yéhèskièl 17 Bible Online

Yéhèskièl 17 - Caribbean Javanese bible

Yéhèskièl 17

¹Terus ana tembungé GUSTI marang aku mengkéné:

²“Hé, anaké manungsa, turunané Israèl wènèhana bedèkan lan semonan.

³Ngomonga ngéné: Mengkéné tembungé Gusti, GUSTI: Ana sakwijiné manuk garuda gedé sing swiwiné gedé dawa, wuluné ketel werna-werna, kuwi teka ing gunung Libanon lan notol putyuké wit tyemara.

⁴Putyuké sing duwur déwé ditugel terus digawa nang sakwijiné negara dagang, terus disèlèhké ing kutané wong dagang.

⁵Terus njupuk trubusan ing lemah kono terus ditandur ing kebon sing wis kari nanduri waé; trubusan mau dipernahaké ing sak tyedaké banyu sing mubal-mubal, tyarané kaya nandur wit gandurasa.

⁶Banjur terus tukul dadi wit anggur sing ketel, endèk pangé okèh pada temelung nuju marang manuk mau, nanging oyot-oyoté tetep ing sak ngisoré. Mengkono enggoné terus dadi wit anggur sing metu pangé lan trubusané mrambat-mrambat.

⁷Ing kono terus ana manuk garuda gedé liyané, sing swiwiné gedé, wuluné ketel. Lan wit anggur mau terus nujukké oyot-oyoté marang manuk kuwi lan pangé ditelungké mrana uga, supaya manuk kuwi ngilèni banyu luwih betyik tenimbangané karo ing panggonané wit mau sing ditandur.

⁸Nanging wit kuwi wis ditandur ing kebon sing betyik, tyedak karo banyu okèh sing lubèr supaya terus metu pangé lan wohé lan supaya dadi wit anggur sing betyik.

⁹Kowé ngomonga: Mengkéné tembungé Gusti, GUSTI: Sing mengkono kuwi apa bakal ngetokké asil? Apa oyot-oyoté ora bakal dibungkari karo wong lan wohé apa ora bakal diprotoli, terus godong-godongé sing nom pada dadi garing? Ora usah tangan sing rosa lan wong okèh sing mbedoli sak oyot-oyoté.

¹⁰Apa kuwi pantyèn ditandur, nanging apa bakal ana asilé? Apa kuwi ora bakal alum garing yèn katekan angin wétan? Mesti bakal alum lan garing ing panggonan tukulé kuwi.”

¹¹Terus ana tembungé GUSTI marang aku mengkéné:

¹²“Ngomonga marang golongan sing mbruntak kuwi mengkéné: Apa kowé ora weruh marang tegesé iki? Ngomonga: ratu Babèl bakal teka ing Yérusalèm lan nyekel ratuné lan para penggedéné terus pada diboyong menyang Babèl.

¹³Terus njupuk sakwijiné turunané ratu, diajak nganakké perjanjian karo sumpah. Wong-wong sing nyekel pangwasa ing negara kono ya pada dityekeli,

¹⁴supaya kraton kuwi dadi ringkih lan ora nglawan menèh, uga supaya netepi perjanjiané lan karo mengkono terus bisa tetep ngadek.

¹⁵Nanging wong kuwi meksa mbruntak marang ratu ing Babèl, ngutus kongkonan menyang Egipte, supaya dibantu numpak jaran lan suradadu okèh. Apa bakal kelakon karepé? Apa wong sing mengkono penggawéné kuwi bisa utyul? Apa wong sing mbubrah perjanjian kuwi bisa utyul?

¹⁶Kanggo Aku sing urip - mengkono tembungé Gusti, GUSTI - wong kuwi mesti bakal mati ing negara Babèl, ing panggonané ratu sing ndadèkké ratu, awit nganggep èntèng marang sumpah marang ratu kuwi lan mbubrah perjanjiané karo ratu mau.

¹⁷Parao ora bakal ngekèki bantuan enggoné perang rupa suradadu okèh lan wong sak golongan gedé, waktu témbok lan bèntèng kanggo ngepung didekké kanggo ngentèkké wong okèh.

¹⁸Ya, wong mau pantyèn ngrèmèhké sumpah lan mbubrah perjanjian. Lah, nanging senajan enggoné saguh kuwi karo nyekel tangan, nanging kabèh mau pada diterak, mulané ora bisa utyul.

¹⁹Awit sangka kuwi tembungé Gusti, GUSTI mengkéné: Kanggo Aku sing urip, sumpahé marang Aku sing dianggep èntèng lan perjanjiané ing ngarep-Ku sing dibubrah, kuwi bakal Tak tampekké marang sirahé.

²⁰Aku bakal masang jaring-Ku kanggo nyekel wong kuwi, mesti bakal kena Tak jiret, terus bakal Tak gawa menyang Babèl lan ing kana bakal Tak gawé perkara awit ngowahi kasetiané marang Aku.

²¹Nanging kabèh suradaduné pilihan bakal mati karo pedang, nanging sing bisa utyul bakal kasebar menyang kabèh kéblat. Ing kono kowé bakal weruh, yèn Aku iki GUSTI, sing ngetokké tembung kuwi.

²²Mengkéné tembungé GUSTI: Aku déwé bakal njupuk pangé sangka putyuké wit tyemara sing duwur bakal Tak tandur; putyuké sing nduwur déwé sing ijik nom bakal Tak tugel lan bakal Tak tandur déwé ing gunung sing metongol duwur;

²³kuwi bakal Tak tandur ing gunungé Israèl sing duwur, supaya bisa ngepang lan woh lan dadi wit tyemara sing ngidap-idapi; kabèh manuk lan sing karo wulu lan swiwi pada manggon ing sak ngisoré, pada ndelik ing sak ngisoré pangé.

²⁴Ing kono kabèh wit-witan ing ara-ara bakal pada weruh, yèn Aku, GUSTI, ngalahké wit sing duwur lan ngluhurké wit sing asor, ndadèkké alum lan garing wit sing seger lan ndadèkké trubusan menèh wit sing alum lan garing. Aku, GUSTI, sing ngomongké lan bakal nindakké kuwi.”