Read Caribbean Javanese Yéhèskièl 18 Bible Online

Yéhèskièl 18 - Caribbean Javanese bible

Yéhèskièl 18

¹Terus ana tembungé GUSTI marang aku mengkéné:

²“Ana apa ta kowé kuwi, nanging pada ngutyapké tembung semonan iki ing negara Israèl: Para bapak pada mangan woh mentahan lan untuné anak-anaké pada dadi linu?

³Kanggo Aku sing urip - mengkono tembungé GUSTI - kowé ora bakal ngutyapké tembung semonan iki menèh ing Israèl.

⁴Lah, ngertia kabèh nyawa kuwi Aku sing nduwèni! Apa nyawané bapak apa nyawané anak kuwi duwèk-Ku! Nanging wong sing nglakoni dosa, kuwi sing kudu mati.

⁵Yèn ana wong bener sing nindakké keadilan lan kabeneran,

⁶ora mangan daging kurban ing gunung utawa ora ndangak marang para brahalané Israèl, ora ngrusuhi bojoné sak pepadané lan ora nuroni wong wadon sing ijik éntuk,

⁷ora nindes wong liyané, mbalèkké gadèné wong, ora ngrampas apa-apa, ngekèki mangan wong ngelih, ngekèki sandangan marang wong wuda,

⁸ora nganakké duwit utawa njupuk anakané ngeboti wong, ngedohi laku sing ora jujur, nindakké tatanan sing bener ing antarané wong lan sak pepadané,

⁹mlakuné miturut katetepan-Ku lan tansah nglakoni pernatan-Ku karo setia - ya kuwi wong sing bener lan mesti bakal tetep urip. Mengkono tembungé Gusti, GUSTI.

¹⁰Nanging yèn wong mau nduwé anak sing dadi rampok lan sing seneng ngutahké getih utawa nglakoni salah sijiné penggawé sing kaya mengkono

¹¹- senajan bapaké ora nglakoni bab kuwi babar pisan - uga mangan daging kurban ing gunung lan ngrusuhi bojo wadon liyané,

¹²nindes wong sangsara lan mlarat, ngrampas, ora mbalèkké gadèné wong, ndangak marang para brahala lan nglakoni sing njijiki,

¹³nganakké duwit lan njupuk anakané ngaboti wong, wong sing mengkono kuwi kudu mati; getihé nampek marang awaké déwé.

¹⁴Lan yèn wong mau nduwé anak lan anak iki weruh kabèh dosa sing dilakoni karo bapaké, nanging mangertèni bab kuwi, terus ora nandangi mengkono, ya kuwi:

¹⁵ora mangan daging kurban ing gunung, ora ndangak marang para brahalané turunané Israèl, ora ngrusuhi bojoné liyané,

¹⁶ora nindes wong liyané, ora njaluk tanggungan, ora ngrampas apa-apa, ngekèki mangan marang wong ngelih, ngekèki sandangan marang sing wuda,

¹⁷ngedohi sing ala, ora nganakké duwit lan ora njupuk anakané ngaboti wong, nindakké pernatan-Ku lan mlakuné miturut ing katetepan-Ku - wong mengkono kuwi ora bakal mati awit sangka kesalahané bapaké, mesti urip.

¹⁸Bapakné sing gawéané memeres, sing ngrampas lan sing nglakoni bab sing ora betyik ing sak tengahé bangsané, kuwi bakal mati awit sangka kesalahané.

¹⁹Senajan mengkono kowé pada ngomong: Kenèng apa anak kok ora mèlu nanggung kesalahané bapaké? - Awit anak kuwi nglakoni keadilan lan kabeneran; nindakké kabèh katetepan-Ku karo setia, mulané mesti urip.

²⁰Wong sing nglakoni dosa, kuwi sing kudu mati. Anak ora bakal mèlu nanggung kesalahané bapaké lan bapak ora bakal mèlu nanggung kesalahané anaké. Wong bener bakal nampa berkahé keadilané lan wong duraka bakal nanggung dosané déwé.

²¹Nanging yèn wong duraka mratobat lan ngendek kabèh dosa sing digawé lan netepi kabèh katetepan-Ku lan nindakké keadilan lan kabeneran, kuwi mesti urip, ora bakal mati.

²²Kabèh duraka sing digawé ora bakal diitung menèh kanggo dèwèké; wong kuwi bakal urip awit sangka kabeneran sing ditandangi.

²³Apa Aku seneng awit sangka matiné wong duraka? Mengkono tembungé GUSTI. Apa ora awit sangka mratobaté supaya urip?

²⁴Yèn wong bener ninggal kesutyiané lan terus nindakké sing ala kaya kabèh sing njijiki sing digawé karo wong duraka - apa wong kuwi bakal urip? Kabèh kesutyian sing ditindakké ora bakal diitung menèh. Wong kuwi kudu mati awit sangka enggoné ora setia lan awit sangka dosa sing ditindakké.

²⁵Nanging kowé pada ngomong: Tumindaké GUSTI kuwi ora bener! Rungokna ndisik, hé turunané Israèl, tumindak-Ku apa tumindakmu sing ora bener?

²⁶Yèn wong bener ninggal kesutyiané lan nindakké sing ala terus mati awit sangka nindakké ala.

²⁷Nanging wong duraka yèn mratobat lan ninggal dosané sing digawé lan terus nindakké keadilan lan kabeneran, kuwi bakal mitulungi nyawané.

²⁸Wong kuwi wis ngrumangsani terus nyingkiri kabèh duraka sing ditindakké; kuwi mesti urip, ora bakal mati.

²⁹Senajan mengkono turunané Israèl ngomong: Tumindaké GUSTI kuwi ora bener! Hé, turunané Israèl, tumindak-Ku apa tumindakmu sing ora bener?

³⁰Awit sangka kuwi, hé turunané Israèl, kowé bakal pada Tak adili miturut tumindakmu déwé-déwé. Mengkono tembungé Gusti, GUSTI. Pada mratobata lan pada ninggala sak kabèhé dosamu, supaya kuwi ora dadi sandunganmu sing njalari nibakké kowé ing kesalahan.

³¹Pada buwangen kabèh duraka sing pada kok tindakké marang Aku lan atimu lan rohmu pada kok anyarké! Kenèng apa kowé bakal pada mati, hé turunané Israèl?

³²Awit Aku ora seneng, yèn wong kudu nanggung patiné. - Mengkono tembungé Gusti, GUSTI. - Mulané pada mratobat, supaya kowé urip!”