Read Caribbean Javanese Yéhèskièl 19 Bible Online

Yéhèskièl 19 - Caribbean Javanese bible

Yéhèskièl 19

¹Hayuk kowé mbengokna kidung pesambat kanggo para ratu ing Israèl,

²lan kabaraké mengkéné: “Wah, emakmu kuwi pantyèn singa wédok ing antarané singa-singa! Nglémprak ing sak tengahé singa-singa nom lan nusoni anak-anaké.

³Anaké ana siji sing dirumati nganti dadi singa nom, sing sinau ndekep malah terus mangan manungsa.

⁴Bangsa-bangsa pada alok: Ana singa ngamuk! Terus singa mau ketyekel ing juglangan pasangané, terus ditalèni lan digiring menyang Egipte.

⁵Bareng ibuné singa mau ngerti yèn ngupaya kekuwatané gagal lan wis ora nduwé pengarep-arep babar pisan terus njupuk anaké liyané lan dirumati dadi singa nom.

⁶Anaké iki sesrawungan karo singa okèh terus wis dadi singa nom lan sinau ndekep malah terus mangan manungsa.

⁷Bèntèngé pada dirusak, kutané pada diobrak-abrik; bumi uga sak isiné kabèh pada kagèt krungu swarané nggeroné.

⁸Para bangsa terus pada ngadek nglawan sangka panggonan pangwasané ing sak ubengé, pada masang jaring kanggo nyekel lan kejegur ing juglangan pasangan.

⁹Terus dilebokké ing kandangé karo ditalèni, lan digawa menyang ngarepé ratu ing Babèl; terus dilebokké ing paukuman, supaya swarané aja dikrungu menèh ing gunung-gunungé Israèl.

¹⁰Emakmu kuwi kaya wit anggur ing kebon anggur sing ditandur ing sak tyedaké banyu, terus woh lan ngepang awit sangka akèhé banyuné.

¹¹Apa pangé sing tukul sing kuwat sing dadi tekené kraton; tukulé duwur ngungkuli kabèh pang liyané sing rapet, lan kétok wéla-wéla awit sangka duwuré lan awit ana pangé tyilik okèh.

¹²Nanging wit anggur kuwi terus kejebol awit sangka bebendu, lan dirubuhké ing bumi; angin sangka wétan nggawé alum lan garingé wohé pada gogrok. Pangé sing kuwat dadi garing lan terus dipangan karo geni nganti entèk.

¹³Lah saiki wit mau terus ditandur ing ara-ara samun, ing lemah sing garing lan kekurangan banyu banget.

¹⁴Terus geni sing metu sangka pangé sing ngobong pangé sing tyilik lan wohé nganti entèk, terus wis ora ana pangé sing kuwat, ora ana pangé sing kanggo teken kraton.” Ya iki kidung pesambat lan wis dadi kidung pesambat.