Read Caribbean Javanese Yéhèskièl 23 Bible Online

Yéhèskièl 23 - Caribbean Javanese bible

Yéhèskièl 23

¹Terus ana tembungé GUSTI marang aku mengkéné:

²“Hé, anaké manungsa, ana wong wadon loro, sing tunggal ibu.

³Wong loro pada dadi wong wadon lonté ing negara Egipte; enggoné nandangi mengkono waktu ijik nom; ing kana susuné diemek-emek lan dadané sing ijik prawan diutyel-utyel.

⁴Sing tuwa jenengé Ohola nanging sing nom Oholiba. Loro-loroné kuwi duwèk-Ku lan pada nglairké anak lanang lan wadon. Kanggo jeneng-jeneng mau, Ohola kuwi Samaria, nanging Oholiba kuwi Yérusalèm.

⁵Tyritané Ohola kuwi laku bédang, nanging dadi duwèk-Ku. Banget enggoné gandrung marang para seneng-senengané, para wong Asyur, para pahlawan perang,

⁶sing nganggo mori wungu tuwa, para bupati lan para sing nyekel pangwasa, kabèh wong nom sing ngganteng, para suradadu numpak jaran.

⁷Ohola laku bédang karo wong-wong mau, kabèh kuwi wong Asyur pilihan; dèwèké najisaké awaké karo kabèh wong sing pada digandrungi lan karo para brahalané.

⁸Enggoné laku bédang wiwit sangka negara Egipte kuwi ora dilèrèn-lèrèni, awit wiwit nomé wis nandangi mengkono, dielus-elus dadané sing ijik prawan terus pada ngesokké nglonténé marang dèwèké.

⁹Mulané terus Tak pasrahké ing tangané para sing didemeni, ing tangané wong Asyur, sing digandrungi.

¹⁰Kuwi pada mbukaki kewirangané; anaké lanang lan wadon pada dityekel, nanging dèwèké déwé terus dipatèni karo pedang. Awit sangka kuwi jenengé tansah dadi tembungan ing antarané golongan wong wadon, awit wis ditibani paukuman.

¹¹Senajan Oholiba, adiké, weruh bab kuwi, karep nglonténé tambah nemen lan enggoné laku nglonté ngungkuli yuné.

¹²Gandrung marang wong Asyur, marang para bupati lan para sing pada nyekel pangwasa, marang para pahlawan perang sing sandangané apik banget, marang suradadu numpak jaran, sing ijik nom kabèh lan ngganteng-ngganteng.

¹³Aku weruh enggoné najisaké awaké; loro-loroné kelakuané pada.

¹⁴Malah enggoné nglakoni sing njijiki tambah ndodro: dèwèké weruh gambar-gambaré ukiran wong lanang ing témbok, gambaré para wong Kasdim, sing diukir karo werna abang,

¹⁵bangkèkané sabukan, nganggo serban karo kuntyir, kabèh pahlawan-pahlawan kaya wong Babèl sangka Kasdim, tanah kelairané!

¹⁶Sakwisé weruh kuwi mau, terus gandrung marang wong-wong mau, terus kongkonan marani menyang negara Kasdim.

¹⁷Terus ana wong Babèl sing pada teka lan nuroni lan najisaké Oholiba karo nglonténé; bareng wis dadi reget terus sumingkir sangka wong-wong mau.

¹⁸Awit enggoné nglakoni nglonté kuwi blak-blakan lan mbukaki kewirangané, mulané Tak dohi awit sangka enggon-Ku jelèh, kaya enggon-Ku ngedohi seduluré wadon.

¹⁹Enggoné nglakoni nglonté mundak ndodro menèh malah karo kèlingan marang dèk nomé, waktu nandangi nglonté ing negara Egipte.

²⁰Kantya-kantyané sing diajak mlaku nglonté kuwi digandrungi, sing kewirangané kaya kewirangané kimar lan nepsuné kaya planangané jaran.

²¹Kowé kepéngin marang pokal-gawému sing rusuh waktu nom-nomanmu, waktu wong Egipte pada nguyel-nguyel dadamu lan ngemek-ngemek susumu sing ijik prawan.

²²Mulané, hé! Oholiba, mengkéné tembungé Gusti GUSTI: kowé kuwi pantyèn wis ngedohi para senenganmu, nanging kuwi bakal pada Tak omongi tandang nglawan marang kowé, kuwi bakal pada Tak tuntun nglawan sangka sak kiwa tengenmu:

²³Wong Babèl lan kabèh wong Kasdim, wong Pekod, wong Soa lan wong Koa, lan kabèh wong Asyur pada bebarengan, para nom-noman sing ngganteng, para bupati lan para pahlawan perang, kabèh suradadu numpak jaran.

²⁴Kuwi bakal pada teka nglawan kowé karo kréta lan glindingan okèh lan karo bangsa-bangsa sak grombolané; pada nata tamèng gedé lan tyilik lan karo topi ing sak kiwa-tengenmu, apa menèh bakal pada Tak pasrahi perkara iki lan kowé bakal diadili miturut angger-anggeré.

²⁵Panasé ati-Ku bakal Tak tibakké marang kowé, nganti wong-wong kuwi pada nindakké marang kowé karo nesuné, irung lan kupingmu bakal diperungi lan turahanmu bakal mati karo pedang. Anak-anakmu lanang wadon bakal pada dityekeli, nanging turahé bakal diobong karo geni.

²⁶Kowé bakal diblèjèti lan reréganmu dirampas.

²⁷Aku bakal ngendek pokal-gawému sing reget lan tumindakmu sing ala wiwit sangka negara Egipte, terus kowé ora bakal nglirak-nglirik marang wong-wong kuwi menèh lan ora bakal ngéling-éling menèh marang wong Egipte.

²⁸Awit mengkéné tembungé Gusti GUSTI: Aku bakal ngekèkké kowé marang tangané wong sing kok sengiti, senajan kowé wis ngedohi wong-wong mau.

²⁹Wong kuwi bakal geting marang kowé, kabèh olèh-olèhé rekasamu bakal dirampas lan kowé ditinggal wuda blejet, nganti kewiranganmu kétok. Tumindakmu sing reget lan pokal-gawému sing ala

³⁰sing nekakké kuwi kabèh marang kowé, awit kowé nandangi nglonté karo ngendelké para bangsa lan najisaké awakmu karo para brahalané.

³¹Uripmu kuwi niru kelakuané sedulurmu tuwa, mulané kowé bakal Tak ombèni sangka tuwungé.

³²Mengkéné tembungé Gusti GUSTI: Kowé kudu ngombé sangka tuwungé, tuwung sing jeru lan sing amba tyangkemé, ya kuwi tuwung sing okèh isiné, kowé bakal dadi guyon lan diétyé.

³³Kowé bakal kebak mendem lan kasusahan. Tuwungé rasa wedi karo kahanan sepi kuwi tuwungé Samaria sedulurmu.

³⁴Kuwi kok ombé sak ampasé, nganti tekan remukané kok krikiti lan kok remes-remes susumu. Awit Aku sing ngetokké tembung kuwi; mengkono tembungé GUSTI.

³⁵Awit sangka kuwi mengkéné tembungé GUSTI: Awit kowé lali marang Aku lan nyingkur marang Aku, saiki kowé déwé sing nanggung pokal-gawému sing reget lan nglontému.”

³⁶GUSTI terus ngomong marang aku: “Hé, anaké manungsa, apa kowé gelem ngadili Ohola lan Oholiba, lan ngomongi bab tumindaké sing ala?

³⁷Awit wong kuwi pada mlaku bédang, tangané dlèwèran getih, pada mlaku bédang karo tyara nyembah marang para brahalané kanggo pangané.

³⁸Kejaba sangka kuwi pada nduwé pokal gawé mengkéné marang Aku; pada najisaké griya sutyi-Ku ing dina kuwi lan pada nerak kesutyiané dina sabat-Ku.

³⁹Sak terusé waktu pada mbelèh anak-anaké kanggo para brahalané kuwi, ing dina kuwi ya nekani griya sutyi-Ku lan nerak kesutyiané. Tenan iki sing ditindakké ing griya-Ku.

⁴⁰Tambah menèh pada nyeluk wong-wong sangka panggonan sing adoh karo ngutus kongkonan ngundang wong-wong mau lan kuwi, ya terus pada teka. Awit sangka tekané mau kowé terus adus nganti resik, alismu kok klimisi lan kowé terus nganggo paèsan.

⁴¹Kowé lungguh ing peturon sing kabèh apik, ing ngarepé ana méjané sing wis ditatani panganan; peturon iki kok dèlèhi dupa lan lenga duwèk-Ku.

⁴²Terus krungu swarané wong sing pada ramé-ramé, pada seneng-seneng karo dèwèké lan karo para wong tunggalé wong okèh, ditambahi para wong mendem sangka ara-ara samun. Kuwi pada nganggo gelang ing tangané lan makutané sing apik ing sirahé.

⁴³Aku terus mikir: Apa kembang sing wis alum iki ijik mlaku bédang? Wong pada nglonté karo dèwèké, ya karo dèwèké.

⁴⁴Wong-wong mau enggoné mara kaya tyarané wong nekani wong wadon lonté. Kaya mengkono enggoné pada nekani Ohola lan Oholiba perlu nindakké bebédangan.

⁴⁵Nanging para wong bener lan sutyi bakal ngadili wong-wong mau kaya wong sing ngadili para wong sing mlaku bédang lan sing ngutahké getih, awit wong-wong kuwi pada mlaku bédang lan tangané dlèwèran getih.”

⁴⁶Awit tembungé Gusti GUSTI mengkéné: “Bèn ana wong sak golongan sing nglawan marang wong-wong mau, bèn pada disiya-siya lan dirampasi.

⁴⁷Bakal pada dibandemi watu karo wong sak golongan mau lan dipatèni karo pedangé lan omahé pada diobong nganti entèk.

⁴⁸Aku bakal ngendek tumindak nglonté ing negara kono lan para wong wadon bakal nggatèkké pepélingé kuwi lan ora bakal nindakké bebédangan menèh kaya sing pada kok lakoni.

⁴⁹Mlakumu sing nglonté kuwi bakal ditampekké marang kowé lan kowé kudu pada nanggung dosamu, awit kowé pada nyembah para brahala. Ing kono kowé bakal weruh, yèn Aku iki Gusti GUSTI.”