Read Caribbean Javanese Yéhèskièl 27 Bible Online

Yéhèskièl 27 - Caribbean Javanese bible

Yéhèskièl 27

¹Ana tembungé GUSTI marang aku mengkéné:

²“Hé, kowé anaké manungsa, ngutyapna pesambat kanggo Tirus,

³lan ngomonga marang Tirus, sing manggon ing dalan sing tekan segara lan sing mlaku dagang karo para bangsa ing puluh-puluh ing pinggiré segara sing okèh: Mengkéné tembungé Gusti GUSTI: Hé Tirus, kowé ngomong: aku iki kapal sing apik.

⁴Negaramu ing tengah segara; Tukang bangunanmu nggawé apikmu karo sampurna.

⁵Awakmu sekujur sing digawé kayu beros sangka Senir, tukang-tukang njupuk kayu tyemara sangka gunung Libanon digawé tyagaké layarmu.

⁶Wit gedé sangka Basan kanggo nggawé dayunganmu; gladakmu sing digawé gading mlengkung karo kayu tyemara sangka pinggiré segara Kitim.

⁷Layarmu sing digawé mori lenan alus sing werna-werna rupané sangka negara Egipte; kuwi dadi tetengeranmu. Lan tarupmu sing digawé kain wungu tuwa lan kain wungu nom sangka pinggiré segara Elisa.

⁸Wong Sidon lan wong Arwad sing dadi tukang dayungmu; tukang-tukangmu, hé Tirus, para wong wijaksana, kuwi pada dadi pelautmu.

⁹Para pinituwa lan tukang-tukang sangka Gebal pada mèlu kowé arep ndandani karusakanmu. Kabèh kapal laut uga para pegawéné pada nekani kowé arep ngijolké barang dagangané.

¹⁰Wong Parsia, Lidiya lan Libia, sing pada dadi suradadumu ing antarané suradadumu. Tamèng lan topi dityantolké ing kowé; kuwi kabèh nambahi kamulyanmu.

¹¹Wong Arwad uga para suradaduné pada mènèk ing témbok-témbokmu mubeng lan wong Gamad pada mènèk ing panggung-panggungmu; pada nyantèlké tamèng-tamèngé ing témbok-témbokmu mubeng, kuwi pada njalari sampurnané apikmu.

¹²Tarsis dedagangan karo kowé awit sangka akèhé lan werna-wernané barang dagangan; pada ngijolké slaka, wesi, tembaga putih lan tembaga ireng karo barang-barangmu.

¹³Yawan, Tubal lan Mèsèk pada dedagangan karo kowé; kuwi pada ngijolké batur tukon, barang sangka tembaga karo barang dagangmu.

¹⁴Wong-wong ing Bèt-Togarma ngijolké jaran kréta, jaran tunggangan lan jaran bihal karo barang-barangmu.

¹⁵Wong Rodos dedagangan karo kowé; bawah pinggiré segara okèh sing dadi panggonan pasaranmu; kuwi pada nggawa gading lan kayu ireng kanggo urup-urupan.

¹⁶Edom dedagangan karo kowé, awit sangka akèhé pametumu; kuwi pada ngijolké watu-watu abang, kain wungu nom, sandangan werna-werna, kain mori lenan alus, inten lan watu-watu mulwa, diijolaké karo barang-barangmu.

¹⁷Yéhuda lan negara Israèl dedagangan karo kowé; kuwi pada ngijolké gandum sangka Minit, blendok mur, madu, lenga lan balsem diijolaké karo barang dagangmu.

¹⁸Damaskus dedagangan karo kowé awit sangka akèhé pametumu, awit sangka akèhé barangmu sing werna-werna. Anggur sangka Helbon, wulu wedus sangka Sakar,

¹⁹lan anggur diijolaké barang-barangmu; wesi sing wis digemblèng sangka Uzal, kayu teja lan tebu ketemu ing antarané barang dagangmu.

²⁰Dédan dedagangan karo kowé ing bab lulang kanggo lapaké jaran.

²¹Arab lan kabèh penggedéné Kedar dedagangan karo kowé ing bab tyempé, wedus gèmbèl lanang lan wedus lanang; ya kuwi sing kanggo dedagangan karo kowé.

²²Para pedagang ing Syéba lan ing Rama pada dedagangan karo kowé; kuwi pada ngijolké sak kabèhé bumbu-bumbu sing apik déwé, sak kabèhé watu-watu sing larang-larang lan emas, diijolaké karo barang-barangmu.

²³Haran, Kané, Eden, Asyur lan Kilmat dedagangan karo kowé.

²⁴Kuwi pada dedagangan ing pasar-pasarmu ing bab jubah sing luwih apik, kain wungu tuwa, sandangan sing werna-werna, kasur sing werna-werna lan tali plintiran sing kuwat.

²⁵Kapal-kapal Tarsis pada nggawa barang dagangan iki kanggo kowé. Kowé kebak momotan sing abot ing tengah segara.

²⁶Kowé digawa karo para tukang dayungmu menyang segara sing jembar banget. Nanging ing tengah segara kuwi kowé kena karo lésus sangka wétan.

²⁷Banda duwèkmu, barangmu, dagangmu, pegawéné jaranmu lan pelautmu para tukangmu lan para langgananmu uga kabèh suradadumu sing bareng kowé, malah kabèh sing pada numpak, pada kelep ing segara ing waktu kowé ambles.

²⁸Krungu jeritané para pelautmu kuwi tanah daratan gemeter.

²⁹Wong kabèh pada ninggal kapal-kapalé, kabèh sing pada ndayung. Kabèh penggedé kapal lan para pegawéné pada mlayu menyang daratan.

³⁰Pesambat banter, jeritan ngaru-ara krungu ing kowé; pada ngewur-ewuri awu nang sirahé, gulung-gulung ing lebu.

³¹Pada gundul, awit sangka kowé lan pada nganggo salin kasusahan; pada nangis, atiné ora karu-karuan awit sangka kowé pesambat sing banget.

³²Sak njeruhné ngaduh-aduh awit sangka kowé pada nangis karo sambat-sambat: Sapa sing kaya Tirus sing wis dientèkké ing tengahé segara kuwi.

³³Sak tekané barangmu sangka segara kowé nggawé wareké bangsa okèh, karo banda duwèkmu lan dagangmu sing okèh, kowé nyugihké para ratu ing ndonya.

³⁴Saiki kowé dirusak lan dientèkké sangka segara lan kelep menyang dasaré segara; dagangmu lan kabèh wongmu sing pada numpak kelep bareng karo kowé.

³⁵Wong pinggiré segara kagèt kabèh weruh kowé; para ratuné pada gemeter, praupané mrengut.

³⁶Bangsa-bangsa sing pada dedagangan, ngeses-ngeses ing bab kowé, pungkasané uripmu nggegirisi lan kowé entèk ing sak lawas-lawasé.”