Read Caribbean Javanese Yéhèskièl 28 Bible Online

Yéhèskièl 28 - Caribbean Javanese bible

Yéhèskièl 28

¹Terus ana tembungé GUSTI marang aku mengkéné:

²“Hé, anaké manungsa, ratu ing Tirus omongana: Tembungé GUSTI mengkéné: Awit kowé dadi gemunggung lan ngomong: Aku iki Gusti Allah! Aku lungguh ing damparé Gusti Allah, ing tengahé segara. Nanging kowé kuwi manungsa, duduk Gusti Allah, senajan atimu rumangsa pada karo Gusti Allah.

³Kawityaksananmu pantyèn ngungkuli kawityaksanané Danièl; ora ana barang sing didelikké sing kowé ora weruh.

⁴Awit sangka wityaksanamu lan pangertènmu kowé olèh kasugihan. Emas lan slaka kok klumpukké ing gedong simpenané bandamu.

⁵Awit sangka bangeté pintermu dedagangan kesugihanmu dadi okèh lan kuwi njalari kowé terus gemunggung.

⁶Mulané tembungé GUSTI mengkéné: Awit atimu rumangsa pada karo Gusti Allah,

⁷mulané, Aku nyeluk wong mantya supaya nglawan marang kowé, ya kuwi bangsa sing kereng déwé, sing bakal njabut pedangé, terus merangi kawityaksananmu sing dipuji kuwi lan kamulyanmu bakal dinajiské.

⁸Kowé sing dipatèni ing tengahé segara bakal diedunaké ing juglangan kuburan.

⁹Apa kowé ijik bakal ngomong ing ngarepé sing matèni kowé, ing tangané sing nyuduk kowé: Aku iki Gusti Allah? Nanging kowé kuwi manungsa, duduk Gusti Allah.

¹⁰Kowé bakal mati karo wong mantya kaya wong sing ora sunat. Awit Aku sing ngetokké tembung kuwi, mengkéné tembungé Gusti GUSTI.”

¹¹Terus ana tembungé GUSTI marang aku mengkéné:

¹²“Hé, anaké manungsa, kowé ngomongna pesambat kanggo ratu Tirus lan tuturana mengkéné: Mengkéné tembungé Gusti GUSTI: Kowé kuwi gambaré kasampurnan, kebak kawityaksanan lan apiké sing apik.

¹³Kowé kuwi ing taman Eden, ya kuwi petamanan Gusti Allah sing kebak sak rupané watu-watu sing okèh ajiné: yaspis abang, topas lan yaspis ijuh, watu-watu turkoois, onyx lan neprit, lazurit, watu-watu abang lan malakit. Tatahan sing digawé sangka emas lan kuwi dityawiské ing dina kowé digawé.

¹⁴Kowé Tak papanké tyedak kerup sing njaga kowé kuwi ing gunungé Gusti Allah sing sutyi lan mlaku-mlaku ing sak tengahé watu-watu sing semlorot.

¹⁵Tindak-tandukmu tanpa tyiri wiwit ing dina kowé digawé nganti kowé ketemu nglakoni duraka.

¹⁶Awit daganganmu gedé kowé terus dadi wong duraka lan nggawé dosa. Mulané kowé terus Tak buwang sangka gunungé Gusti Allah, lan kerup sing njaga terus ngentèkké kowé sangka sak tengahé watu-watu sing semlorot.

¹⁷Kowé gemunggung awit sangka apiké rupamu, kawityaksananmu kok entèkké kanggo kamulyanmu. Mulané kowé Tak buwang ing bumi, Tak pasrahaké marang para ratu dadi tontonan ing ngarepé.

¹⁸Awit sangka akèhé kesalahanmu lan ora jujurmu ing sak njeruhné mlaku dagang kowé nerak kesutyianmu. Awit sangka kuwi Aku bakal ngurupké geni sangka tengahmu, sing bakal ngobong kowé nganti entèk. Kowé Tak etokké, dadi awu ing bumi ing ngarepé kabèh sing weruh kowé.

¹⁹Kabèh wong antarané para bangsa sing kenal marang kowé pada kagèt weruh kahananmu. Pungkasané uripmu nukulaké rasa wedi lan kowé entèk ing sak lawas-lawasé.”

²⁰Terus ana tembungé GUSTI marang aku mengkéné:

²¹“Hé, anaké manungsa, kowé ngadeka madep nuju marang Sidon lan medara wahyu nglawan marang negara kuwi lan omongana:

²²Mengkéné tembungé Gusti GUSTI: Aku dadi mungsuhmu, hé, Sidon lan Aku ngétokké kamulyan-Ku ing tengah-tengahmu. Uga wong-wong bakal weruh, yèn Aku iki GUSTI, yèn Aku nibakké paukuman marang Sidon lan nduduhké kesutyian-Ku marang dèwèké.

²³Aku bakal nekakké lara pès ing Sidon lan getih bakal kutah ing dalan-dalané lan wong-wong bakal ambruk mati ing sak tengahé, awit pedang sing teka sangka sak ubengé nglawan marang dèwèké. Nganti wong-wong bakal weruh yèn Aku iki GUSTI.

²⁴Uga turunané Israèl ora bakal pada dirèmèhké menèh karo wong sangka sak kiwa-tengené kabèh, sing dadi eri sing nyubles utawa sunduk sing nglarani. Ing kono wong-wong bakal weruh, yèn Aku iki GUSTI.

²⁵Mengkéné tembungé Gusti GUSTI: Ing waktu Aku nglumpukké turunané Israèl sangka sak tengahé taler-taleré bangsa, sing pada diparani waktu dibuyaraké lan Tak duduhké kesutyian-Ku ing ngarepé para bangsa, terus bakal pada manggon ing negarané sing wis Tak wènèhaké marang abdi-Ku Yakub.

²⁶Enggoné manggon ing kono bakal karo tentrem; bakal pada mbangun omah lan nggawé kebon anggur. Malah pada manggon karo ayem tentrem ing waktu Aku nibakké paukuman marang kabèh tanggané sing pada ngrèmèhké. Ing kono terus bakal pada weruh, yèn Aku iki GUSTI, Gusti Allahé.”