Read Caribbean Javanese Yéhèskièl 30 Bible Online

Yéhèskièl 30 - Caribbean Javanese bible

Yéhèskièl 30

¹Ana tembungé GUSTI marang aku mengkéné:

²“Hé, anaké manungsa, kowé nubuata lan ngomonga: GUSTI ngomong mengkéné: Pada nangisa lan sambat: Oh, dina kuwi!

³Dina kuwi wis tyedak, dinané GUSTI wis tyedak, dina mendung sing peteng; kuwi dinané para bangsa.

⁴Pedang nekani Egipte lan Etiopia bakal gemeter ing waktu wong-wong pada ambruk dipatèni ing Egipte lan kasugihané digawa mblayu lan dasaré-tembok pada dibongkar.

⁵Wong Etiopia, Libia, Lidiya, wong sak kabèhé negara Arab, wong Kub lan para wong sangka negara sing komplotan karo bangsa-bangsa kuwi bakal pada ambruk mati karo pedang bebarengan.

⁶Mengkéné tembungé GUSTI: Para wong sing pada ngréwangi Egipte bakal ambruk mati, lan kemlèlèté Egipte sing awit sangka kekuwatané bakal entèk. Wiwit sangka Migdol nganti tekan Siené wong-wong bakal mati karo pedang. Mengkono tembungé GUSTI.

⁷Egipte bakal dientèkké ing sak tengahé negara sing wis pada sepi mamring lan kuta-kutané bakal ijik kegolong kuta sing wis pada rusak.

⁸Ing kono wong-wong bakal pada weruh, yèn Aku iki GUSTI, ya kuwi ing waktu Aku nganakké geni ing Egipte terus kabèh wong sing ngréwangi pada entèk.

⁹Ing dina kuwi para kongkonan-Ku bakal pada budal sing gelis-gelis perlu terus nggawé kagèté Etiopia sing ijik seneng-seneng, sak nalika bakal pada gemeter ing dina tibané paukuman kanggo Egipte; awit kuwi tenan-tenan bakal kelakon.

¹⁰Mengkéné tembungé GUSTI: Aku bakal ngilangi kasugihané Egipte lantaran Nebukadnésar, ratu Babèl.

¹¹Dèkné karo suradaduné; ya kuwi umat sing tegelan déwé ing antarané para bangsa, bakal ngentèkké negara kuwi lan bakal ngelungké pedang nglawan Egipte lan bakal pada ngebaki negara kuwi karo wong sing pada dipatèni.

¹²Aku bakal ngesatké tyawangané kali Nil lan bakal masrahaké negara kuwi ing tangané wong ala, uga bakal ngentèkké negara kuwi uga sak isiné lantaran bangsa liyané. Aku, GUSTI, sing ngetokké tembung bab kuwi.

¹³Mengkéné tembungé GUSTI: Aku bakal ngrusak para brahalané lan ngilangi retyané Mèmfis; ing negara Egipte bakal ora ana penggedéné menèh lan Aku bakal nukulké rasa wedi ing kana.

¹⁴Aku bakal ngentèkké Patros lan nganakké geni ing Soan lan nibakké paukuman marang Tebe.

¹⁵Aku bakal ngesokké bebendu-Ku marang Sin, bèntèngé Egipte lan ngentèkké kasugihané Tebe.

¹⁶Aku bakal nganakké geni ing Egipte, Sin bakal gemeter uga Tebe bakal direbut lan témbok-témboké bakal dibongkar.

¹⁷Para nom-noman On lan Pi-Beset bakal pada ambruk karo pedang lan para wong wadon bakal diboyong.

¹⁸Ing Tapanhes bakal ana mendung ireng ing wantyi awan, ya kuwi ing waktu Aku nugel pangwasané Egipte ing kana lan enggoné gemunggung, awit sangka kekuwatané, bakal entèk. Kuta kuwi bakal ketutupan karo mendung, nanging anak-anaké wadon bakal diboyong.

¹⁹Sak terusé Aku bakal nibakké paukuman marang Egipte, nganti wong-wong bakal weruh yèn Aku iki GUSTI.”

²⁰Ing taun sing kaping sewelas, tanggal pitu sasi kaping pisan, ana tembungé GUSTI marang aku mengkéné:

²¹“Hé, anaké manungsa, tangan kekuwatané Parao, ratu ing Egipte, wis Tak tugel lan tangané kuwi ora dibuntel supaya pulih menèh, ora ana sing mblebet supaya dadi kuwat menèh lan bisa ngatungké pedang.

²²Awit sangka kuwi mengkéné tembungé GUSTI: Aku dadi mungsuhé Parao, ratu ing Egipte lan Aku bakal nugel tangané, sing ijik kuwat lan sing wis tugel, uga bakal nibakké pedang ing tangané.

²³Wong Egipte bakal Tak buyaraké ing antarané para bangsa lan Tak buyaraké menyang kabèh negara.

²⁴Aku bakal nguwatké tangané ratu ing Babèl lan bakal ngekèkké pedang-Ku ing tangané, nanging tangané Parao bakal Tak tugel lan dèwèké bakal ngaduh-aduh kaya wong sing tatu banget ing ngarepé.

²⁵Aku mesti bakal nguwatké tangané ratu Babèl, nanging tangané Parao bakal lemes. Ing kono terus bakal pada weruh, yèn Aku iki GUSTI, ya kuwi dongé Aku ngekèkké pedang-Ku ing tangané ratu ing Babèl, sing terus diatyungké marang negara Egipte.

²⁶Aku bakal mbuyarké wong Egipte ing antarané para bangsa lan nyebar wong-wong mau menyang sak kabèhé negara. Ing kono terus bakal pada weruh, yèn Aku iki GUSTI.”