Read Caribbean Javanese Yéhèskièl 32 Bible Online

Yéhèskièl 32 - Caribbean Javanese bible

Yéhèskièl 32

¹Ing taun sing kaping rolas, tanggal sepisan sasi rolas ana tembungé GUSTI marang aku mengkéné:

²“Hé, anaké manungsa, kowé ngutyapna pesambat kanggo Parao, ratu Egipte lan tuturana mengkéné: Kowé kuwi madakké awakmu kaya singa nom ing antarané para bangsa. Nanging kowé kuwi kaya bajul ing segara; kali-kalimu pada kok gawé muntuk, kowé mbutekké banyuné karo sikil lan jempalikan ing lendut.

³Mengkéné tembungé Gusti GUSTI: Aku masang jaring-Ku kanggo nyekel kowé, karo kumpulané bangsa okèh, lan kowé Tak lebokké ing jaring-Ku.

⁴Kowé Tak banting ing bumi, Tak untyalké ing ara-ara; kabèh manuk ing awang-awang Tak kongkon méntylok ing kowé kéwan-kéwan ing sak lumahé bumi Tak wareki karo dagingmu.

⁵Dagingmu Tak jarké waé pada pating ketyètyèr ing pegunungan, jurang-jurang pada Tak kebaki batang-batangmu.

⁶Bumi Tak ombèni getihmu sing mili, uga gunung-gunung, lan dasar-dasaré kali bakal kebak getihmu.

⁷Yèn Aku ngentèkké kowé, langit bakal Tak tutupi lan lintangé pada Tak petengi. Srengéngé Tak tutupi mendung nanging mbulan ora bakal nylorotké sloroté.

⁸Kabèh sing semlorot ing langit bakal Tak dadèkké peteng awit sangka kowé. Pepeteng Tak tekakké marang kowé. Mengkéné tembungé Gusti GUSTI.

⁹Aku bakal nggawé bingungé atiné bangsa okèh, yèn kowé pada Tak dadèkké tawanan ing sak tengahé para bangsa, ing negara-negara, sing kowé durung tau weruh.

¹⁰Aku bakal nggawé kagèté bangsa okèh, yèn pada weruh marang kowé, para ratuné bakal pada gemeter weruh kowé ya kuwi yèn Aku ngobat-ngabétké pedang-Ku ing ngarepé. Bakal pada gemeter tanpa mandek, awit sangka ngélingi marang uripé, ing dina entèkmu mau.

¹¹Awit mengkéné tembungé Gusti GUSTI: Pedangé ratu ing Babèl bakal nekani kowé.

¹²Aku bakal nggawé golonganmu pada ambruk kena karo pedangé para pahlawan, sing seneng déwé ing antarané para bangsa. Kemlèlèté Egipte bakal dilebur lan sak golongané kabèh bakal dientèkké.

¹³Sak kabèhé kéwan-kéwan bakal Tak entèkké sangka pinggir kali-kali gedé; sikilé manungsa bakal ora mbutekké menèh lan ora ana kéwan sing ngubek-ngubek ing njeruhné.

¹⁴Banyuné terus bakal Tak beningké, kali-kaliné bakal Tak gawé mili kaya lenga. Mengkéné tembungé Gusti GUSTI.

¹⁵Yèn Egipte Tak dadèkké sepi mamring kabèh isiné negara uga entèk, lan kabèh rayaté wis Tak patèni, ing kono wong-wong bakal pada weruh, yèn Aku iki GUSTI.

¹⁶Ya iki pesambat sing kuduné dikidungké; para wong wadoné bangsa-bangsa bakal ngidungké kuwi; bakal pada ngidungké ditujokké marang Egipte lan rayaté kabèh sing okèh kuwi. Mengkéné tembungé Gusti GUSTI.”

¹⁷Ing taun sing kaping rolas, tanggal limalas sasi kaping pisan ana tembungé GUSTI marang aku mengkéné:

¹⁸“Hé, anaké manungsa, kowé ngaduh-ngaduha bab rayat Egipte, bebarengan karo para wong wadoné bangsa-bangsa sing ngidap-idapi, golongané wong Egipte kuwi pada dityemplungna ing bumi sing ngisor déwé, tyampur karo para wong sing wis medun ing juglangan kuburan.

¹⁹Apikmu kuwi ngungkuli sapa? Kowé muduna lan pada lumahna tyampur karo para wong sing ora sunat!

²⁰Kuwi bakal pada ambruk ing sak tengahé para wong sing mati karo pedang lan kabèh rayaté sing okèh kuwi bakal pada tiba mlumah bebarengan karo dèwèké.

²¹Para wong sing nyekel pangwasa lan gagah rosa-rosa uga para réwangé bakal ngomongké dèwèké ing sak tengahé ndonyané wong mati: Wong-wong kuwi wis pada medun, pada tiba mlumah lan tyampur karo wong sing pada ora sunat, sing pada mati karo pedang.

²²Asyur ing kana uga kabèh komplotané, diubengi karo kuburan-kuburané; kuwi kabèh pada mati karo pedang.

²³Kuburané didèkèkké ing pérangané juglangan sing jeru lan golongané ing sak ubengé kuburané; kabèh pada mati, ambruk dipedang. Ya kuwi sing nukulaké rasa wedi ing ndonyané wong urip.

²⁴Elam ing kono lan rayaté kabèh sing okèh kuwi ing sak ubengé kuburané; kuwi kabèh pada mati karo pedang, ya kuwi sing pada medun marang bumi sing ngisor déwé ora karo disunati, sing wis pada nukulké rasa wedi ing ndonyané wong urip lan kuwi pada nanggung kewirangané, tyampur karo wong-wong sing pada medun ing juglangan kuburan.

²⁵Ing sak tengahé para wong sing mati, awit dipatèni kuwi, dityawisi peturon uga kabèh rayaté sing okèh kuwi ing sak ubengé kuburané. Kuwi kabèh wong sing pada ora sunat, sing pada mati karo pedang, awit wis pada nukulké rasa wedi ing ndonyané wong urip lan pada nanggung kewirangané, tyampur karo wong sing pada medun ing juglangan kuburan; pada dipapanaké ing sak tengahé wong-wong sing mati awit dipatèni.

²⁶Mèsèk lan Tubal pada ing kono uga kabèh rayaté sing okèh kuwi, sing pada ngubengi kuburané; kuwi kabèh wong sing pada ora sunat, sing mati karo pedang, awit wis pada nukulké rasa wedi ing ndonyané wong urip.

²⁷Pada ora dikubur tyampur karo para pahlawan sing pada mati ing jaman mbiyèn, sing pada medun nang ndonyané wong mati bebarengan karo sak kabèhé gamané perang, sing pedangé terus disèlèhké ing sak ngisoré sirahé lan tamèngé ditumpangké ing balung-balungé; awit wis pada nukulké rasa wedi ing ndonyané wong urip.

²⁸Kowé bakal gemblundung ing sak tengahé para wong sing ora sunat, tyampur karo para wong sing pada mati karo pedang.

²⁹Edom ing kono, para ratuné lan kabèh penggedéné, sing pada dipapanaké ing sak tyedaké para wong sing mati karo pedang, senajan pada rosa-rosa; pada diglétakké sandingé wong-wong sing ora sunat lan wong-wong sing pada medun nang juglangan kuburan.

³⁰Para penggedéné sangka lor pada ing kono, kabèh kuwi lan sak kabèhé wong Sidon, sing karo kisinan pada medun lan tyampur karo para wong sing pada mati awit dipatèni, senajan wis pada njalari kagèté wong-wong mau karo kekuwatané; kuwi pada diglétakké ora karo disunati ing sak tyedaké wong-wong sing mati karo pedang lan pada nanggung kewirangané bebarengan karo wong-wong sing mudun nang juglangan kuburan.

³¹Parao bakal weruh wong kuwi kabèh lan bakal rumangsa olèh panglipur ing bab kahanané golongané kabèh. Parao uga suradaduné mati karo pedang. Mengkono tembungé Gusti GUSTI.

³²Awit Parao wis nukulké rasa wedi ing ndonyané wong urip, mulané diglétakké ing sak tengahé wong-wong sing ora pada sunat, tyampur karo wong sing pada mati karo pedang, Parao uga sak golongané. Mengkono tembungé Gusti GUSTI.”