Read Caribbean Javanese Yéhèskièl 34 Bible Online

Yéhèskièl 34 - Caribbean Javanese bible

Yéhèskièl 34

¹Terus ana tembungé GUSTI marang aku mengkéné:

²“Hé, anaké manungsa, kowé medara wahyu nglawan para pangoné Israèl, medara wahyu lan ngomonga marang wong-wong kuwi, marang pangon-pangon kuwi: Mengkéné tembungé Gusti GUSTI: Tyilaka para pangoné Israèl, sing ngengon awaké déwé! Kuduné apa ora wedus-wedus gèmbèl sing diengon karo para pangon kuwi?

³Kowé pada ngombé mèleké, wuluné kok gawé sandangan, sing lemu mbok belèh, nanging kowé ora ngengon wedus-wedus gèmbèl kuwi.

⁴Sing ringkih ora kok kuwatké, sing lara ora kok tambani, sing tatu ora kok blebet, sing kesasar ora kok gawa bali, sing ilang ora kok golèki, nanging sing kuwat kok idak-idak karo sak wenang-wenang.

⁵Awit sangka mengkono terus pada buyar, awit ora ana pangoné, nganti terus pada dadi pangané sak kabèhé kéwan alas. Wedus-wedus gèmbèl-Ku pada buyar

⁶lan pada kesasar ing kabèh gunung lan ing kabèh puntuk sing duwur-duwur, malah ing sak ubengé negara kono wedus gèmbèl-Ku enggoné pada buyar, ora ana wong siji-sijia sing perduli utawa nggolèki.

⁷Awit sangka kuwi, hé para pangon, pada rungokna tembungé GUSTI:

⁸Kanggo Aku sing urip, - mengkono tembungé Gusti GUSTI - jalaran wedus-wedus gèmbèl-Ku nyata dadi pangané sak kabèhé kéwan alas, awit ora ana pangoné, jalaran para pangon-Ku ora pada perduli marang wedus-wedus gèmbèl-Ku, nanging mung pada ngengon awaké déwé waé, nanging wedus-wedus gèmbèl-Ku ora pada diengon,

⁹jalaran sangka kuwi hé, para pangon, rungokna tembungé GUSTI:

¹⁰Mengkéné tembungé Gusti GUSTI: Aku déwé sing bakal dadi mungsuhé para pangon kuwi lan Aku bakal njaluk baliné para wedus gèmbèl-Ku lan bakal Tak jaluki tanggung jawapé enggoné dadi pangoné wedus gèmbèl-Ku. Pangon-pangon kuwi ora bakal pada tetep bisa ngengon awaké déwé; Aku bakal nylametaké wedus-wedus gèmbèl-Ku sangka tutuké, terus ora dadi pakané menèh.

¹¹Awit mengkéné tembungé Gusti GUSTI: Aku déwé bakal nggatèkké marang wedus-wedus gèmbèl-Ku lan bakal Tak golèki.

¹²Kaya pangon sing nggolèki wedusé sing pisah karo kumpulané wedus mengkono enggon-Ku bakal nggolèki wedus-wedus gèmbèl-Ku lan bakal Tak luwari sangka kabèh panggonan enggoné pada dipasrahké waktu dinané mendung lan peteng.

¹³Bakal pada Tak tuntun metu sangka sak tengahé para bangsa lan Tak klumpukké sangka negara-negara lan Tak tuntun ing negarané; Aku bakal ngengon wedus-wedus gèmbèl-Ku kuwi ing gunung-gunungé Israèl, ing bawah-bawah kaliné lan ing panggonané wong kono kabèh.

¹⁴Bakal pada Tak engon ing ara-ara sing betyik; panggonan pangonané ing gunung-gunungé Israèl sing duwur; ing panggonan pangonan sing betyik kuwi enggoné bakal pada njerum lan sing dadi pakané suket sing seger ing gunung-gunungé Israèl.

¹⁵Aku déwé sing bakal ngengon wedus-wedus gèmbèl-Ku lan pada Tak jarké njerum. Mengkono tembungé Gusti GUSTI.

¹⁶Sing ilang bakal Tak golèki, sing ilang bakal Tak gawa bali, sing tatu bakal Tak blebet, sing lara bakal Tak kuwatké, uga sing lemu lan sing rosa bakal Tak ayomi. Bakal pada Tak engon sing sak mestiné.

¹⁷Sak terusé, hé, kowé wedus-wedus gèmbèl-Ku, - mengkéné tembungé Gusti GUSTI - Aku bakal dadi rèkter kanggo wedus-wedus gèmbèl kuwi lan kanggo wedus gèmbèl lanang lan wedus lanang.

¹⁸Apa durung tyukup kanggo kowé, kowé pada ngentèkké suket ing ara-ara sing betyik déwé kuwi? Apa kowé ijik arep ngidak-idak ara-ara liyané karo sikilmu? Apa durung tyukup kowé ngombé banyu sing bening kuwi? Apa kowé ijik arep mbutekké turahé nganggo sikilmu?

¹⁹Apa wedus-wedus gèmbèl-Ku kuduné nyenggut suket-suket sing wis kok idak-idak lan ngombé banyu sing wis kok butèkaké karo sikilmu?

²⁰Awit sangka kuwi - mengkéné tembungé Gusti GUSTI - Aku déwé bakal dadi rèkter ing antarané wedus-wedus gèmbèl sing lemu lan sing kuru;

²¹awit kabèh sing ringkih pada kok sodok karo bangkèkanmu lan bahumu lan mbok sundang karo sungumu, nganti pada kok sruduk metu sangka kandangé.

²²Mulané Aku bakal nulungi wedus-wedus gèmbèl-Ku, supaya aja nganti dadi memangsané menèh lan Aku bakal dadi rèkter ing antarané wedus-wedus gèmbèl.

²³Aku bakal ngangkat sakwijiné pangon kanggo wedus-wedus gèmbèl kuwi, sing bakal ngengon, ya kuwi abdi-Ku Daved; kuwi sing bakal ngengon lan dadi pangoné.

²⁴Nanging Aku, GUSTI bakal dadi Gusti Allahé lan abdi-Ku Daved bakal dadi ratu ing sak tengahé. Aku, GUSTI, sing ngomong mengkono.

²⁵Aku bakal nganakké perjanjian rukunan karo wedus-wedus gèmbèl-Ku lan Aku bakal nyingkirké sak kabèhé kéwan galak sangka negara kono, terus wedus-wedus gèmbèl-Ku bisa manggon ing ara-ara samun karo ayem tentrem lan bisa turu ing alas.

²⁶Aku bakal ndadèkké wedus-wedus gèmbèl kuwi lan kabèh ing sak ubengé gunung dadi berkah; Aku bakal ngekèki udan ing pandumané ing waktuné; kuwi udan sing nggawa berkah.

²⁷Wit-witan ing ara-ara bakal pada ngetokké wohé lan lemah kuwi bakal ngekèkké pametuné. Wedus-wedus-Ku bakal urip karo ayem tentrem ing negarané. Bakal pada weruh, yèn Aku iki GUSTI, ya kuwi yèn Aku wis nugel kayuné pasangané lan ngluwari wedus-wedus gèmbèl kuwi sangka tangané wong sing ndadèkké batur.

²⁸Ing kono wis pada ora dadi rayahané para bangsa menèh lan kéwan alasan ora bakal nubruk lan pada bisa manggon ayem tentrem lan ora bakal digawé kagèt karo apa waé.

²⁹Aku bakal nganakké taman sing seger lan mbungahké, ing negara kono ora bakal ana wong sing mati jalaran ngelih, lan ora ana menèh sing ngalami kewirangan sangka para bangsa liya.

³⁰Ing wantyi kuwi bakal pada weruh, yèn Aku, GUSTI, Gusti Allahé, nunggal karo dèwèké kabèh; turunané Israèl kuwi umat-Ku. Mengkono tembungé Gusti GUSTI.

³¹Kowé kabèh pada dadi wedus gèmbèl-Ku, sing pada Tak senengi lan Aku iki Gusti Allahmu. Mengkono tembungé Gusti GUSTI.”