Read Caribbean Javanese Yéhèskièl 35 Bible Online

Yéhèskièl 35 - Caribbean Javanese bible

Yéhèskièl 35

¹Terus aku diomongi karo GUSTI mengkéné:

²“Hé, anaké manungsa, kowé madepa marang pegunungan Seir, medara wahyu nglawan kuwi

³lan ngomonga mengkéné: Gusti GUSTI ngomong mengkéné: Aku bakal dadi mungsuhmu, hé pegunungan Seir lan Aku bakal ngatyungké tangan-Ku nglawan marang kowé lan bakal Tak entèkké lan Tak dadèkké sepi mamring.

⁴Aku bakal ndadèkké kuta-kutamu dadi jugrukan lan kowé bakal dadi sepi mamring lan kowé bakal weruh, yèn Aku iki GUSTI.

⁵Awit atimu kanggonan rasa memungsuhan turun-temurun lan kowé ngekèkké wong Israèl dadi memangsané pedang ing dinané kasangsarané lan waktu tibané pengadilané sing pungkasan,

⁶mulané, kanggo Aku sing urip - mengkono tembungé Gusti GUSTI - kowé bakal Tak dadèkké getih lan bakal diuyak karo getih; awit kowé kesalahan ngilèkké getih, mulané getih bakal ngoyak kowé.

⁷Aku bakal ngentèkké pegunungan Seir lan Tak dadèkké sepi mamring lan Aku bakal ngentèkké sapa sing lunga-teka ing kono.

⁸Pegunungané uga bakal Tak kebaki karo wong-wong sing mati awit dipatèni. Wong-wong sing mati kena pedang bakal pada ambruk ing puntuk-puntukmu, ing legokan-legokanmu lan ing dasar-dasaré kalimu.

⁹Kowé bakal Tak dadèkké sepi mamring ing sak lawas-lawasé lan kuta-kutamu ora bakal dienggoni menèh. Ing kono kowé bakal pada weruh, yèn Aku iki GUSTI.

¹⁰Awit kowé ngomong: Bangsa loro lan negara loro kuwi bakal dadi duwèkku lan kita sing bakal nduwèni - nanging sejatiné GUSTI ing kono -

¹¹mulané, kanggo Aku sing urip - mengkono tembungé Gusti GUSTI - Aku bakal nindakké marang kowé kaya sing wis kok tindakké marang turunané Israèl ing sak njeruhné nesumu lan mèrimu, awit sangka sengitmu marang wong-wong mau; lan Aku bakal nekani kowé yèn Aku ngadili kowé.

¹²Ing kono kowé bakal weruh, yèn Aku iki, GUSTI, krungu kabèh ala-alamu sing kok omongaké marang gunung-gunungé Israèl ya kuwi mengkéné: Gunung-gunung kuwi wis dadi sepi mamring lan dipasrahké marang kita dadi pangan kita.

¹³Karo mengkono kuwi kowé nyombongké awakmu déwé ing ngarep-Ku karo tembungmu lan okèh banget tembungmu marang Aku. Kuwi Tak runggokké.

¹⁴Mengkéné tembungé Gusti GUSTI: Sak lumahé bumi bakal pada bungah ing waktu kowé Tak dadèkké sepi mamring.

¹⁵Kaya enggonmu bungah-bungah ing bab pandumané turunané Israèl, sing wis dadi sepi mamring, ya kaya mengkono kuwi sing bakal Tak tibakké marang kowé. Kowé bakal dadi sepi mamring, hé, pegunungan Seir lan kowé, Edom sak duwèkmu kabèh. Ing kono wong-wong bakal weruh, yèn Aku iki GUSTI.”