Read Caribbean Javanese Yéhèskièl 38 Bible Online

Yéhèskièl 38 - Caribbean Javanese bible

Yéhèskièl 38

¹Terus ana tembungé GUSTI marang aku mengkéné:

²“Hé, anaké manungsa, kowé madepa nuju marang Gok ing negara Magog, ya kuwi ratu ing negara Mèsèk lan Tubal lan medara wahyu nglawan dèwèké,

³kowé ngomonga: Mengkéné tembungé Gusti GUSTI: Aku bakal dadi mungsuhmu, hé, Gok ratu ing negara Mèsèk lan Tubal.

⁴Kowé bakal Tak gèrèt karo gantol ing uwangmu lan Tak gawa metu bebarengan karo suradadumu, ya kuwi suradadu jaran, kabèh pada nganggo klambi pepak, kumpulan gedé sing nggawa tamèng gedé lan tyilik lan nggawa pedang.

⁵Wong Pèrsia, Etiopia lan Libia pada mbarengi mlakuné, kabèh pada nyekel tamèng lan nganggo topi;

⁶wong Gomèr uga suradaduné kabèh, Bèt-Togarma sangka pojok lor uga suradaduné kabèh, okèh bangsa sing ngetutké kowé.

⁷Kowé tyetyepaka lan tata-tataa karo kabèh golongan sing pada ngetutké kowé lan kowé dadia pengayomané.

⁸Sakwisé sak untara suwé kowé bakal nampa préntah; ing dina sing pungkasan kowé bakal teka menyang sakwijiné negara sing wis dibangun menèh sakwisé rusak awit sangka perang lan kowé terus marani sakwijiné bangsa sing diklumpukké sangka sak tengahé para bangsa ing gunung-gunungé Israèl sing wis suwé dadi jugrukan. Bangsa iki wis ditokké sangka sak tengahé para bangsa lan kabèh terus wis pada manggon karo ayem tentrem.

⁹Kowé terus njedul kaya angin lésus lan tekamu kuwi kaya mendung sing nutupi sak lumahé bumi, kowé teka karo suradadumu kabèh lan okèh bangsa sing ngréwangi kowé.

¹⁰Mengkéné tembungé Gusti GUSTI: Ing dina kuwi kowé kanggonan karep ing sak njeruhné atimu, kowé nggawé rantyaman ala.

¹¹Kowé ngomong: Aku arep budal nyerang negara sing kuta-kutané tanpa témbok lan bakal arep nekani wong-wong sing uripé ayem lan manggon karo tentrem; panggonan panggonané tanpa témbok utawa palang lan tanpa gapura.

¹²Kowé arep ngrampas lan ngrayah lan ngatungké tanganmu marang jugrukan-jugrukan sing wis dienggoni menèh lan nyerang umat-Ku sing diklumpukké sangka sak tengahé bangsa-bangsa. Wong-wong kuwi wis pada nduwé kéwan-kéwan lan banda lan pada manggon ing puseré bumi.

¹³Negara Syéba lan Dédan, para wong sing tuku barang-barangé, para pedagangé lan para penggedéné negara Tarsis bakal pada ngomong marang kowé mengkéné: Tekamu kuwi apa ngrampas lan nglumpukké komplotan arep ngrampas, arep mbandang slaka lan emas, arep ngrampok kéwan-kéwan lan banda lan arep njukuki sembarangé sing okèh banget?

¹⁴Awit sangka kuwi, hé, anaké manungsa, kowé medara wahyu lan ngomonga marang Gok: Mengkéné tembungé Gusti GUSTI: Waktu umat-Ku Israèl ijik manggon karo ayem tentrem, ing waktu kuwi enggonmu bakal nandangi

¹⁵lan terus teka sangka panggonanmu sangka lor sing adoh banget, kowé karo bangsa okèh sing ngréwangi kowé, kabèh pada numpak jaran, kumpulan sing gedé lan suradadu sing kuwat.

¹⁶Kowé budal nglawan umat-Ku Israèl kaya mendung sing nutupi sak lumahé bumi. Ing dina sing pungkasan kuwi bakal kelakon lan Aku bakal nuntun kowé nglawan marang tanah-Ku, supaya para bangsa pada kenal marang Aku, ya kuwi yèn Aku ngétokké kesutyian-Ku marang kowé ing ngarepé, hé!, Gok.

¹⁷Mengkéné tembungé Gusti GUSTI: Ya kowé kuwi sing wis Tak omongaké ing waktu-waktu sing wis kepungkur lantaran para abdi-Ku, ya kuwi para nabiné Israèl, ing waktu kuwi nganti mataun-taun pada nubuat, yèn kowé bakal Tak lurukké nglawan marang umat-Ku.

¹⁸Ing waktu kuwi, ya kuwi waktu Aku nuntun Gok nglawan marang negara Israèl - mengkéné tembungé Gusti GUSTI - bakal tukul nesu-Ku ing sak njeruhné irung-Ku metu kebul,

¹⁹ing sak njeruhné panasé ati-Ku lan ing sak njeruhné mulat-mulat bebendu-Ku, Aku bakal ngomong: Ing dina kuwi mesti bakal ana lindu sing medèni ing negara Israèl.

²⁰Iwak-iwak ing segara, manuk-manuk ing awang-awang, kéwan-kéwan ing alas, kabèh kéwan sing nggremet lan kabèh manungsa ing bumi bakal pada gemeter weruh praupan-Ku. Gunung-gunung bakal pada jugruk, pèrèngané gunung bakal pada tiba lan saben témbok bakal ambruk.

²¹Aku bakal nganakké samubarang sing nggawé kagèté Gok - mengkéné tembungé Gusti GUSTI - terus pedang sing siji bakal mangan sijiné.

²²Aku bakal ngekèki paukuman marang Gok lara pès lan kutahé getih; Aku bakal nganakké udan deres, udan krikil, udan geni lan udan lirang sing nibani marang dèwèké marang suradaduné lan marang bangsa okèh sing pada ngréwangi dèwèké.

²³Aku bakal ngétokké kamulyan-Ku lan kesutyian-Ku lan bakal ngétokké sapa ta Aku ing ngarepé bangsa okèh, nganti wong-wong bakal pada weruh, yèn Aku iki GUSTI.