Read Caribbean Javanese Yéhèskièl 39 Bible Online

Yéhèskièl 39 - Caribbean Javanese bible

Yéhèskièl 39

¹Nanging kowé, hé anaké manungsa, kowé medara wahyu nglawan Gok lan ngomonga: Mengkéné tembungé Gusti GUSTI: Aku bakal dadi mungsuhmu, hé, Gok ratu ing negara Mèsèk lan Tubal,

²lan Aku bakal nggèrèt lan nuntun kowé lan Aku bakal nekakké kowé sangka pojok lor lan nggawa kowé menyang gunung-gunungé Israèl.

³Aku bakal ngantem tanganmu sing kiwa, nganti gendéwamu mrutyut lan panahmu pada utyul sangka tanganmu sing tengen.

⁴Kowé bakal ambruk ing gunung-gunungé Israèl bebarengan karo suradadumu kabèh lan bangsa-bangsa sing pada ngréwangi kowé, lan kowé bakal Tak pakakké marang werna-werna manuk-manuk galak lan marang kéwan-kéwan galak, dadia pangané.

⁵Kowé bakal ambruk ing ara-ara, Aku sing ngetokké tembung bab iki, mengkéné tembungé Gusti GUSTI.

⁶Aku bakal nekaké geni sing nyerang marang Magog lan marang wong-wong sing pada manggon ing bawah pinggiré segara karo tentrem lan ayem. Ing kono terus bakal pada weruh, yèn Aku iki GUSTI.

⁷Aku bakal nduduhké asma-Ku sing sutyi ing sak tengahé umat-Ku Israèl lan Aku ora bakal nglilani menèh asma-Ku sing sutyi dinajiské, terus para bangsa bakal pada weruh, yèn Aku iki GUSTI, sing Mahasutyi ing Israèl.

⁸Lah kuwi mesti bakal teka lan bakal kelakon, ya kuwi dina sing wis Tak omongaké kuwi.

⁹Nanging sing manggon ing kuta-kutané Israèl bakal pada metu terus ngurupké geni lan ngobong kabèh gamané Gok, ya kuwi tamèng tyilik lan gedé, gendéwa lan panah, pentung lan tumbak, lan enggoné ngobong kuwi suwéné pitung taun.

¹⁰Wong-wong mau ora bakal njupuk kayu sangka alas ara-ara utawa nyigari kayu obong ing alas, awit enggoné pada ngurupké geni kuwi nganggo gamané. Sak terusé bakal pada ngrampas sing mbiyèn ngrampas wong-wong mau lan njukuki sembarangé sing mbiyèn ngrebuti wong-wong mau. Mengkéné tembungé Gusti GUSTI.

¹¹Ing dina kuwi Aku bakal ngekèki panggonan marang Gok sing bakal kanggo ngubur dèwèké ing Israèl, ya kuwi legokan Sabrangan ing sisih wétané segara lan kuburan kuwi bakal ngalang-alangi wong-wong sing pada nyabrang. Gok lan sak kabèhé golongané bakal dikubur ing kono lan panggonan kuwi bakal disebut legokan golongané Gok.

¹²Para turunané Israèl enggoné ngubur wong-wong mau suwéné pitung sasi, karepé kanggo ngresiki negara kono.

¹³Sak kabèhé rayaté negara pada mèlu ngubur lan bab kuwi ndadèkké kondangé ing dina enggon-Ku ngétokké kamulyan-Ku. Mengkéné tembungé Gusti GUSTI.

¹⁴Ana wong sing pilihan kudu ngubengi ing sak tanahé kabèh perlu nguburi wong-wong sing ijik glimpangan ing lemah supaya negara kono dadi resik. Sakwisé pitung sasi negarané bakal dipriksa.

¹⁵Yèn sak njeruhné mubeng-mubeng kuwi ana sing weruh balung manungsa, ing sandingé terus didèkèki watu kanggo tenger nganti sak tekané tukang-tukang kubur, sing terus ngubur balung ing legokan golongané Gok.

¹⁶Uga ana kuta sing diarani Hamona. Kaya mengkono enggoné pada ngresiki negara kono.

¹⁷Nanging kowé, anaké manungsa, mengkéné tembungé Gusti GUSTI: Kowé ngomonga marang werna-werna manuk lan kabèh kéwan galak: Pada nglumpuka lan mrénéa, pada nglumpuka mréné sangka ngendi-endi, ing pésta kurban sing Tak anakaké kanggo kowé kabèh, ya kuwi pésta kurban sing gedé ing gunung-gunungé Israèl; kowé bakal pada mangan daging lan ngombé getih.

¹⁸Dagingé para pahlawan sing bakal kok pangan lan getihé para penggedéné ndonya sing bakal kok ombé; kuwi kabèh kaya wedus gèmbèl lanang, tyempé wedus gèmbèl, wedus lanang lan sapi lanang, kéwan-kéwan lemu sangka Basan.

¹⁹Kowé bakal pada mangan gajihé nganti warek lan ngombé getih nganti kowé pada mendem ing pésta kurban sing Tak anakké kanggo kowé kuwi.

²⁰Kowé bakal pada dadi warek enggonmu mangan ing pésta-Ku: jaran uga sing numpaki, pahlawan lan kabèh suradadu. Mengkono tembungé Gusti GUSTI.

²¹Aku bakal ngétokké pangwasa-Ku ing antarané para bangsa lan kuwi kabèh bakal pada weruh paukuman sing bakal Tak tibakké lan weruh tangan-Ku sing bakal Tak tibakké marang bangsa-bangsa mau.

²²Ing kono para turunané Israèl bakal weruh, yèn Aku iki GUSTI, Gusti Allahé, ya kuwi wiwit ing dina kuwi lan sak terusé.

²³Lan para bangsa bakal pada weruh, yèn turunané Israèl enggoné dibuwang kuwi awit sangka kesalahané lan jalaran sangka enggoné terus ora setia marang Aku, mulané Aku nutupi praupan-Ku yèn karo turunané Israèl kuwi, lan Aku terus ngekèkké wong-wong kuwi ing tangané para mungsuhé, kabèh terus pada mati karo pedang.

²⁴Tyotyok karo najisé lan dosané enggon-Ku mulangi wong-wong kuwi, lan Aku nutupi praupan-Ku yèn karo turunané Israèl kuwi.

²⁵Jalaran sangka kuwi mengkéné tembungé Gusti GUSTI: Tekan saiki, Aku bakal mulihké kahanané Yakub lan bakal nindakké kawelasan marang turunané Israèl lan awit sangka panasé ati-Ku, Aku bakal nyekel asma-Ku sing sutyi.

²⁶Wong-wong kuwi bakal lali marang kewirangané lan sak kabèhé tumindaké sing ora setia, sing digawé marang Aku yèn wis bali manggon ing negarané karo tentrem lan ora ana sing njalari wediné,

²⁷lan sakwisé Tak jikuk sangka sak tengahé para bangsa lan Tak klumpukké sangka negarané mungsuh-mungsuhé lan Aku ngétokké kesutyian-Ku marang dèwèké kabèh ing ngarepé para bangsa sing okèh.

²⁸Ing kono terus bakal pada weruh, yèn Aku iki GUSTI, Gusti Allahé, sing nggawa menyang negara pembuwangan ing sak tengahé para bangsa lan sing nglumpukké menèh ing negarané lan sing ora nglilani siji waé kèri ing kana.

²⁹Aku ora nutupi praupan-Ku menèh kanggo wong-wong kuwi, yèn Aku ngesokké Roh-Ku marang turunané Israèl. Mengkono tembungé Gusti GUSTI.”