Read Caribbean Javanese Yéhèskièl 4 Bible Online

Yéhèskièl 4 - Caribbean Javanese bible

Yéhèskièl 4

¹“Hé, anaké manungsa, kowé njupuka bata, sèlèhna ing ngarepmu, lan nggambara kuta ing nduwuré, ya kuwi Yérusalèm.

²Kuta kuwi gambaren ijik dikepung: dèlèhna bèntèng kanggo ngepung, nggawéa unduk-undukan lemah sing dadi tanggulé kanggo ngepung, dèkèkna tarup panginepané suradadu lan ing sak ubengé kuta kuwi tatanen piranti kangggo ndobrak.

³Terus kowé njupuka wesi waja blébékan, kuwi dekna ing tengahmu lan kuta mau kanggo pager wesi, sakwisé mengkono adepna praupanmu marang kuta kuwi, dadiné kuta kuwi dikepung lan kowé sing ngepung. Iki dadi tanda kanggo turunané Israèl.

⁴Terus ngglétaka miring ngiwa, kowé nanggunga paukumané Israèl, pirang ndina enggonmu ngglétak mengkono kuwi, ya semono suwéné enggonmu nyangga paukumané.

⁵Mengkono enggon-Ku netepké kanggo kowé: Pirang taun enggoné turunané Israèl diukum, ya kuwi tyatyahé dina enggonmu nanggung paukumané, ya kuwi 390 dina.

⁶Yèn kuwi wis kok tandangi, terus ngglétaka miring menèh, nanging miring nengen lan kowé nyanggaa paukumané Yéhuda suwéné patang puluh dina; Aku netepké kanggo kowé sedina kanggo setaun.

⁷Kowé mandenga marang Yérusalèm sing dikepung kuwi lan gegemen tanganmu lan medara wahyu nglawan kuta kuwi.

⁸Kowé bakal Tak talèni, terus enggonmu ngglétak ora bisa alihan nganti kowé wis nggenepi dinané pangepunganmu kuwi.

⁹Sak terusé kowé njupuka gandum jewawut, kedelé, katyang, gandum lan beras, kuwi dadèkna siji ing wadah, terus olahen dadèkna roti. Kuwi kanggo panganmu sak suwéné kowé ngglétak miring kuwi, ya kuwi 390 dina.

¹⁰Lan panganmu kuwi tyatyahé bakal ditemtokké nganggo ditimbang: sedinané rong puluh sèkel; kuwi panganen ing waktu-waktu sing wis ditemtokké.

¹¹Banyu sing arep mbok ombé uga bakal ditemtokké: sak pronem hin; kuwi ombènen ing waktu-waktu sing wis ditemtokké.

¹²Roti kuwi panganen kaya roti jewawut bunder lan kudu kok bakar karo geniné tainé manungsa ing ngarepé wong-wong mau.”

¹³GUSTI terus ngomong menèh: “Wong Israèl bakal Tak buwang menyang ing sak tengahé bangsa-bangsa lan karo mengkono bakal mangan rotiné ing kana karo reget.”

¹⁴Aku terus ngomong: “Duh GUSTI, Gustiku. Tenan kula durung tau ngregeti lan wiwit enom nganti teka saiki durung tau mangan batang utawa turahané memangsané kéwan galak, apa menèh tutuk kula durung tau klebon daging bosok.”

¹⁵Aku terus diomongi mengkéné: “Lah yèn mengkono, kowé Tak lilani nganggo tlétongé sapi kanggo gantiné tainé manungsa lan rotimu dibakar ing kono.”

¹⁶Sakwisé mengkono aku terus diomongi mengkéné: “Hé, anaké manungsa, Aku bakal ngentèkké simpenané pangan ing Yérusalèm - lan wong-wong mau karo kasusahan enggoné mangan roti sing boboté wis ditemtokké; mengkono uga enggoné bakal ngombé banyu sing wis ditemtokké takerané, ya karo susah banget -

¹⁷kuwi supaya pada kekurangan pangan lan ngombé, terus pada ngenes lan pada gering ing sak njeruhné paukumané.