Read Caribbean Javanese Yéhèskièl 41 Bible Online

Yéhèskièl 41 - Caribbean Javanese bible

Yéhèskièl 41

¹Aku terus digawa ing sak njeruhné kamar gedé ing griya sutyi kono lan Panjenengané ngukur tyagaké témboké: kandelé ing sisih kéné enem éluh, ing sisih kana uga enem éluh.

²Ambané lawangé sepuluh éluh lan ambané témbok sandingé ing sisih kéné limang éluh, ing sisih kana uga limang éluh. Dawané kamar gedé ya diukur; patang puluh éluh, nanging ambané rong puluh éluh.

³Panjenengané terus mlebu ing kamar njeruh. Tyagaké témboké terus diukur: kandelé rong éluh, nanging ambané lawangé déwé: enem éluh, lan témbok ing sandingé ing sisih kéné pitung éluh, ing sisih kana pitung éluh.

⁴Terus ngukur kamar njeruh mau, dawané rong puluh éluh, ambané rong puluh éluh pada karo ambané kamar gedé. Aku terus diomongi mengkéné: “Iki panggonan Mahasutyi.”

⁵Panjenengané terus ngukur témbok ing griya sutyi kuwi: kandelé enem éluh lan ambané kamar tambahan sing ketemu ing sak ubengé griya sutyi mau, patang éluh.

⁶Kamar-kamar tambahan iki susun telu lan saben larik kamaré telung puluh. Ing sak ubengé griya sutyi témboké ana balok-baloké sing diedeki kamar-kamar tambahan mau, supaya pada dadi kuwat, awit kamar-kamar mau ora digandèngké karo témboké griya sutyi.

⁷Sak terusé kamar-kamar tambahan mau wiwit ing larikan ngisor nganti larikan sing kaping telu, mundak gedé mundak gedé, tyotyok karo balok-baloké sing munggah ya mundak amba ing larikan ing nduwur ngliwati larikan tengah.

⁸Ing sak weruhku dasaré griya sutyi luwih duwur tenimbangané ing sak ubengé. Dasaré kamar-kamar tambahan kuwi ukurané sak teken tyotyok, dadi duwuré enem éluh.

⁹Kamar tambahan kuwi témboké sing njaba kandelé limang éluh, pérangané dasaré griya sutyi sing ora ana apa-apané kuwi ambané limang éluh. Ing antarané dasaré gedong-gedong lan

¹⁰kamar-kamar leté rong puluh éluh, kuwi ing sak ubengé griya sutyi kabèh.

¹¹Lan lawang-lawang ing kamar tambahan, sing metuné tekan pérangan sing ora kanggo apa-apa, siji ing sisih kidul. Nanging ambané panggonan sing ora kanggo apa-apa kuwi limang éluh mubeng.

¹²Gedong ing plataran tutupan ing sisih kulon ambané pitung puluh éluh, nanging témboké mubeng kandelé limang éluh lan dawané sangang puluh éluh.

¹³Piyambaké terus ngukur griya sutyi mau: dawané 100 éluh, nanging plataran tutupan karo gedongé lan témboké uga 100 éluh;

¹⁴mengkono uga ambané sisih ngarep griya sutyi karo plataran tutupan ing sisih wétan ya 100 éluh.

¹⁵Sakwisé mengkono Piyambaké terus ngukur dawané gedong ing plataran tutupan ing sisih kulon karo èmpèr-èmpèré ing sisih kiwa-tengené, kuwi ana 100 éluh. Kamar-kamar gedé, kamar njeruh lan pendapané

¹⁶ketutupan karo kayu lan ing sak ubengé kamar telu kuwi ana tyendéla-tyendélané sing karo geber, èmpèré uga ana. Ing ngarepé undak-undakané griya sutyi kuwi kabèh ketutupan kayu wiwit ing jogané nganti tekan tyendéla-tyendélané. - Tyendéla-tyendélané kuwi pada ketutupan -

¹⁷Malah nganti tekan sak nduwuré lawang lan kamar njeruh lan uga ing njaba. Témboké pérangan njeruh lan pérangan njaba kabèh

¹⁸digambari karo gambar-gambaré kerup lan wit kurma ukir-ukiran, ing antarané kerup loro wité kurma sak uwit, lan kerup kuwi praupané loro,

¹⁹sing siji rupa praupan manungsa, sijiné praupané singa sing madep marang wit kurma; kaya mengkono kuwi enggoné griya sutyi mau digawé.

²⁰Wiwit ing jogané nganti tekan sak nduwuré lawang témboké digambari karo kerup lan wit kurma ukir-ukiran.

²¹Tyagak-tyagaké lawangé kamar-kamar gedé pesagi. Lan ing ngarepé panggonan Sutyi kétok ana rupané sing kaya mesbèh kayu,

²²duwuré telung éluh, dawané rong éluh; pojok-pojoké lan dasaré lan gedèk-gedèkké sing digawé kayu. Piyambaké terus ngomong marang aku: “Iki méja ing ngarepé GUSTI.”

²³Kamar-kamar gedé kuwi lawangé loro lan panggonan Mahasutyi

²⁴lawangé uga loro: Ing lawang-lawang kono ana lawang-lawangé loro sing bisa mubeng; loro ing lawang sing siji lan loro ing lawang sijiné.

²⁵Lawang-lawang iki, ya kuwi lawang-lawangé kamar-kamar gedé, digambari karo kerup lan wit kurma ukir-ukiran kaya témbok-témboké. Ing ngarepé griya sutyi mau, ya kuwi ing njaba ana undak-undakané kayu.

²⁶Ing témbok sisih kiwa-tengené pendapa ana tyendéla-tyendélané sing karo geber lan wit kurma ukir-ukiran.