Read Caribbean Javanese Yéhèskièl 43 Bible Online

Yéhèskièl 43 - Caribbean Javanese bible

Yéhèskièl 43

¹Aku terus digawa menyang gapura, ya kuwi gapura sing madep mengétan.

²Kamulyané Gusti Allahé Israèl teka sangka wétan terus krungu swara kaya swarané grojokan lan bumi kétok semlorot awit sangka kamulyan-Né.

³Sing tak deleng waktu Gusti teka perlu ngentèkké kuta kuwi lan kaya sing tak deleng ing pinggir kali Kebar, mulané aku terus sujut.

⁴Waktu kamulyané GUSTI mlebu ing griya sutyi, ngliwati gapura sing madep mengétan.

⁵Roh mau terus njunjung aku lan nggawa aku menyang plataran njeruh, griya sutyi kuwi kebak karo kamulyané GUSTI.

⁶Aku terus krungu Piyambaké ngomongi aku sangka sak njeruhné griya sutyi —wong lanang sing ngukur griya sutyi mau ngadek nang sandingku—

⁷mengkéné tembungé Gusti marang aku: “Hé, anaké manungsa, kuwi dampar-Ku lan panggoné tlapakan-Ku; Aku bakal manggon ing kéné ing sak tengahé wong Israèl, tekan sak lawas-lawasé lan turunané Israèl ora bakal najisaké asma-Ku menèh sing sutyi, ya wong-wong kuwi kabèh, ya para ratuné, karo enggoné mlaku bédang utawa karo layoné para ratuné sing wis pada mati;

⁸uga ora karo mernahké tlundakané lawangé tyedak ing ngarep lawang-Ku utawa ngedekké tyagak-tyagaké lawangé tyedak karo tyagak-tyagaké lawang-Ku, nganti mung témbok sing misahaké Aku lan wong-wong mau. Enggoné najisaké asma-Ku sing sutyi karo pertingkahé sing ala, mulané awit sangka nesu-Ku terus bakal Tak entèkké.

⁹Saiki bakal pada ngedohké enggoné ora setia lan layoné para ratuné sangka ngarep-Ku lan Aku bakal manggon ing sak tengahé tekan sak lawas-lawasé.

¹⁰Nanging kowé, hé, anaké manungsa, kowé ndunungna marang turunané Israèl bab griya sutyi iki, supaya pada kisinan weruh kesalahan-kesalahané; uga bab rupané lan tata-tyarané griya sutyi kuwi.

¹¹Nanging yèn pada rumangsa kisinan weruh samubarang kabèh sing ditindakké, griya sutyi kuwi gambaren, pérang-pérangané, lawang-lawangé metu lan lawang-lawangé mlebu lan wujud-wujudé kabèh; pada ngertia marang kabèh pernatané lan angger-anggeré lan kuwi tulisen ing ngarepé, supaya terus pada nglakoni kabèh angger-anggeré lan pernatané karo setia.

¹²Iki katetepané kanggo griya sutyi kuwi: panggonan ing putyuké gunung kuwi kabèh Mahasutyi. Ya iki sing ditentokké kanggo griya sutyi kuwi.”

¹³Iki ukuran-ukurané mesbèh nganggo ukuran éluh, ya kuwi éluh sing dawané pada karo éluh lumrah ditambahi sak èpèk-èpèk tangan: kalèné njeruhné sak éluh, ambané sak éluh lan ing sak ubengé kalèn, pinggirané duwuré sak èpèk-èpèk tangan. Iki duwuré mesbèh kuwi:

¹⁴sangka dasaré ing lemah nganti tekan pinggiran ngisor ana rong éluh lan ambané pinggiran mau sak éluh. Sangka pinggiran ngisor nganti tekan pinggiran nduwur ana patang éluh nanging lés-pinggiré ambané uga sak éluh.

¹⁵Prapèn mau duwuré patang éluh lan ana sunguné papat.

¹⁶Prapèné dawané rolas éluh lan ambané rolas éluh, dadiné pesagi.

¹⁷Lés-pinggiré prapèn kuwi dawané patbelas éluh lan ambané patbelas éluh, dadi uga pesagi. Ing sak ubengé mesbèh mau ana kalèné, sing ambané sak éluh lan ing sak ubengé kalèn kuwi ana pinggirané, sing ambané setengah éluh. Undak-undakané mesbèh ing sisih wétan.

¹⁸Aku terus diomongi: “Hé, anaké manungsa, mengkéné tembungé Gusti GUSTI: pernatan kanggo mesbèh kuwi mengkéné: Yèn wis rampung penggawéné lan bakal diwiwiti masrahaké kurban obongan ing kono lan bakal nyiramké getih,

¹⁹para imam turunané Lèwi turunané Sadok wènèhana sapi lanang siji sing ijik nom kanggo kurban ngluwari dosa, awit ya wong-wong kuwi sing Tak lilani ngadep ing ngarep-Ku perlu masrahaké pangabekti. Mengkono tembungé Gusti GUSTI.

²⁰Lan kowé njupuka getih kuwi setitik terus lèlètna ing sunguné mesbèh papat pisan lan ing pojoké papat mubengé lan ing pinggiré mubeng; kaya mengkono enggonmu nyutyèkké mesbèh mau lan enggonmu nganakké rukunan kanggo kuwi.

²¹Kowé terus njupuka sapi lanang kanggo kurban ngluwari dosa mau, kuwi kudu diobong ing panggonan sing wis ditemtokké ing panggonané griya sutyi, ing sak njabané panggonan sutyi.

²²Ing dina sing kaping pindo kowé masrahna wedus lanang sing tanpa tyiri kanggo kurban ngluwari dosa lan mesbèhé sutyèkna kaya waktu disutyèkké karo sapi lanang.

²³Sakwisé kowé ngrampungké upatyara nyutyèkké kuwi, kowé masrahna sapi lanang nom sing tanpa tyiri siji lan wedus gèmbèl lanang siji tunggalé wedus-wedus gèmbèl sing tanpa tyiri.

²⁴Kuwi gawanen ing ngarepé GUSTI lan imam-imam terus pada nyawur-nyawurna uyah kéwan-kéwan kuwi terus pasrahna kanggo kurban obongan marang GUSTI.

²⁵Ing sak njeruhné pitung dina ing saben dinané kowé ngolaha wedus siji kanggo kurban ngluwari dosa; kowé uga ngolaha sapi lanang nom siji lan wedus gèmbèl lanang siji tunggalé wedus-wedus sing tanpa tyiri.

²⁶Pitung dina suwéné enggoné kudu nebus lan nyutyèkké mesbèh kuwi; mengkono kuwi tyarané enggoné ngresmèkké mesbèh.

²⁷Sakwisé mungkasi pitung dina, ing dina kaping wolu lan sak terusé imam-imam pada masrahna kurban-kurbanmu obongan lan kurban-kurban keslametanmu ing mesbèh kono; ing kono Aku bakal seneng marang kowé kabèh. Mengkono tembungé Gusti GUSTI.”